My Voice

مصر لشعبها

2011-02-11T20:49:00.007+02:00

مبرووووووووووووووووووك يا شعب مصر

إرادة الشعب انتصرت

الحمد لله رب العالمين

هي دي مصروشعب مصر وشباب مصر مصر لشعبها مصر مش لمبارك ومبارك مش لمصر مصؤ لشعب مصر

أول ثورة إلكترونية في العالم

من النهارده دي بلادنا نحافظ عليها ماندفعش رشوة مانستخدمش واسطه مانرميش ورقة ومانكسرش إشارة ومانزورش ورقة نحافظ عليها علشان بقيت بلادنا

أنا فــــــــــــخــــــــــــــــورة اني مصريه دلوقتي بس فخوره دلوقتي بس المصري ليه كرامة من يوم25 يناير والمصري صحي وبقى عنده كرامة

المصري مامتش المصري عايش بكرامته

مش عارفه اوصف فرحتي بس الحمد لله لنصرة شعب مصر

كان نفسي أكون في ميدان شهداء التحرير دلوقتي

مبرووووووووووووووووووووووووك يا شعب مصر

افرحوا يا شهداء التحرير (شهداء جميع المحافظات) مش شهداء الميدان

مبروك يا مصر عليكي التحرير

11 -2-2011

تنحي الرئيس محمد حسني مبارك وتخلى عن منصبه كرئيس للجمهورية وكلف المجلس الاعلى للقوات المسلحة بادارة شئون البلاد في الفترة المقبلة بعد عناد شديييد وتشبث بالسطه

الحمد لله الذي تتم بنعمته الصالحات

2010-10-08T22:51:00.010+02:00

الحمد لله الذي تتم بنعمته الصالحات....>>

ربنا يرجعهم لنا بالسلامه

2010-03-01T21:49:00.006+02:00

مشكلتي في الحياة المواصلات... مش فكرة انها تكون زحمه وتتاخر كل ده سهل المشكله الحقيقية النااااااااس اللي مش عارفه هما عاملين ليه كده
بعيداً عن عربية السيئات اللي كلها صداع ووش وخنقه وخناق وان كل مصيبه وراها واحده ست والكلام اللي بقولوا على طول ده
وبعيداً عن المترو.. عن كل ده ... اللي بشوفوا اليومين دول ماشوفتوش قبل كده بصراحه
لما تبقى بنت وحيده واقفه مستنيه الميكروباص الصبح بدري اوي ومجموعه كبيره من الشباب والرجاله مجموعه كبيره كبييييره يعني اللي اعرفه ان المفروض يكون في ذوق شويه ... أنا ضد ان راجل كبير أو راجل في سن بابا يقوم ويخلي بنت تقعد وكمان مش بطلب ان شاب يقوم ويقعد بنت... لكن ماوصلتش ان الشاب والرجل يخبطوا البنت وعلى استعداد كامل يوقعوا البنت علشان يركبوا هما ويهجموا هجوم غير آدمي خاااااااالص على المواصله ايه ده مش هقول فين الشهامه والحاجات دي علشان باين كده سافروا ومش ناويين يرجعوا مصر مش عارفه اقول فين الاحترام ولا الاخلاق ولا ايه بالظبط مابقاش في حد عنده احساس ولا دم بقت الحاجات دي نادره جداً جداً جداً
مثلاُ مثلاً لما واحد يبقى نازل من المترو (أيوه المترو اللي دايماً فاااااااضي ف أي وقت ده) ومعاه شنطه من الكبار أوي بتوع الجيش دول ويخبط بنت صغيره في وشها بكل قوته ماماتها قالتله يا (متخلف) بصراحه الخبطه كانت جامده جداً تدوخ والله انتوا عارفيني مش بدافع عمري عن واحده لكن فعلاً الأم غصب عنها رد هو وقالها بكل برووووود انا برضه اللي متخلف!!!!!!.... طب ايه بقى
عديت مرحلة اني اتكلم عن واحد يقول: حد يقوم للست الكبيره دي يا رجاله وواحد قاعد يقوله مافيش رجاله
كل ده بقى عاااااادي جداً .... مابقاش في احساس عند الناس دي بجد... انا أول مره أغلط كده هنا بس فعلاً اللي بشوفه أكتر بكتيير من اللي بقوله
تاني مره::: ماكنتش متخيله ان معظم الناس بقت كده بس مابين 1 من 50 مثلاً ممكن تلاقي واحد جدع
ربنا يرجعلنا الرجوله والشهامه بألف سلامه وربنا يستر ومايكونوش هاجروا
ياريت لو انت واحد من 49 فكر ان البنت اللي هتخبطها وتوقعها دي تكون امك أو أختك أو بنتك او زوجتك.... ماعلينا الكلام مافيش فيه فايده... حسبي الله ونعم الوكيل

اللهم آمين

2010-02-07T00:00:00.002+02:00

لا إله إلا الله الحليم الكريم، لا إله إلا الله العلي العظيم، لا إله إلا الله رب السموات السبع ورب العرش العطيم

اللهم يا مؤنس كلّ غريب ويا صاحب كلّ وحيد ويا ملجأ كل خائف ويا كاشف كلّ كربة أسألك لأن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير.

اللّهم الصبر والقدرة لأرضى بما ليس منه بد، وهبني اللّهم الشجاعة والقوة لأغير ما تقوى على تغييره يد، وهبني اللهم السداد والحكمة لأميز بين هذا وذاك.

اللهم آت نفسي تقواها , وزكّها, أنت خير من زكّاها , أنت وليّهاومولاها ،اللهم إني أعوذ بك من علم لا ينفع, وقلب لا يخشع , ونفس لا تشبع , ودعوة لا يستجاب لها ،اللهم إني أعوذ بك من شر ما عملت , ومن شر ما لم أعمل , وأعوذ بك من شر ما علمت , ومن شر ما لم أعلم اللهم إني أعوذ بك من زوال نعمتك , وتحول عافيتك , وفجاءة نقمتك , وجميع سخطك ".

اللهم من اعتزّ بك فلن يُذل، ومن اهتدى بك فلن يضِلّ، ومن استكثر بك فلن يقلّ، ومن استقوى بك فلن يضعف، ومن استغنى بك فلن يفتقر، ومن استنصر بك فلن يُخذل، ومن استعان بك فلن يُغلب، ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هُدي إلى صراط مستقيم، اللهم فكن لنا وليّاً ونصيرا، وكن لنا معيناً ومجيرا، إنك كنت بنا بصيرا.
اللهم لاسهل الا ماجعلته سهل وانت تجعل الحزن اذا شئت سهلاً

وأما بنعمة ربك فحدث

2010-01-15T01:27:00.005+02:00

المفترض واللي كنت فاكراه ان الواحد لما بيفرح بيحب يفرح الناس معاه لكن المشكله اللي عرفتها ان فعلاً مش كل الناس ممكن تفرحلك
لحد قريب كنت فاكره ان الاصحاب والاصدقاء والاقارب والناس اللي حواليك ممكن يفرحوا علشانك بس الغريب ان مش كلهم كده أنا بحب ان لما ربنا يرزقني بحاجه جميله أفرح الناس معايا زياده في الرزق أوحاجه جميله أي حاجه جميله بلاقي نفسي بتكلم عنها كتييييير ومش ببقى حاطه في دماغي ان اللي قدامي مش فرحانه ليا

على فكره أنا مازلت على رأيي في البنات (بعض البنات أكيد مش كلهم) لأ بجد جواهم نفسنه كده عجييييييبه مش عارفه بجد ايه ده تلاقي غليان كده وسواد وحقد وغــــل وغـــــــل وغـــــل ^ 100 رأيي فيهم ماتغيرش في الحته دي بالذات

يعني لما واحده ربنا يرزقها بحاجه كويسه تذم برضه وتفضل تشتكي خوف من الحسد وخوف من ان اللي قدامها ماتفرحلهاش يعني لو اتخطبت أو اتزوجت من بنى آدم كويس وهايل وهي بتحبه ماتقدرش تتكلم عليه وتفرح بيه علشان الكلام ده بالعكس المفروض مثلاً طول ماهي قاعده تذم فيه وتقول انه مش كويس وقارفني وكده يعني!!!!
رزق زياده... عربيه جديده تخبيها علشان كده برضه!!!! ... اللي بتعمل كده معذوره لكن اللي بتحقد دي ايـــــــــــه عذرها غير ان قلبها اسود

طبعاً أنا عارفه ناس من اللي بتفرح وناس من اللي بتحقد بس للأسف الشنيع ان اللي بيحقدوا أكتر كتييير ... شوفت في عين كذا واحده غل وحقد من كذا حد لمجرد ان الحد ده ربنا حددله رزقه أكتر شوية ده أنا ببقى حاسه ان قلبها بيطلع دخان من كتر الغليان اللي جواه
(ده توزيع أرزاق يعني مالناش أي كلام فيه)

المشكله اني مابعرفش بقى أعمل كده الواحد يقول الحقيقه أو مايقولش ومايتكلمش خالص وأنا غالباً بقع وبقول الحقيقه والحمد لله ... أصل أختكم ماشاء الله عليها على رأي واحده صحبتي بتقولي (يا خايبه يا عبيطه) بس هعمل ايه طيب من وانا صغيره وانا لما بفرح بحب أفرح أهلي معايا ولما كبرت مجالي اتسع شويه وبقيت أحب أفرح اصحابي معايا بيني وبينكم بحاااول ماقولش الحقيقه أحياناً علشان ماشوفش نظرة الغل دي في عين اصحابي واكرههم فبسكت أحسن أو بقول للناس اللي واثقه فيهم جداً جداً والله أعلم بيهم برضه بس خير ان شاء الله أديني بفترض حسن النيه إلا أن يثبت العكس

اتقوا الله يا بنات بالذات وسيبوا الغل والحقد والكره ده شويه بقى ربنا يطهر قلوبكن منه

أنا مش عارفه هل الموضوع ده أزمه برضه بالنسبه للشباب زي البنات كده؟؟؟ مش حاسه انه أزمه أوي ولو أزمه مش هيبقى زي البنات كده؟؟؟ مافتكرش خالص يعني

بقالي كتييييييير ماكتبتش وحاسه اني مش عارفه أكتب حاجه كفايه عليكم كده
أخيراً وليس آخراً
علمت أن رزقى لا يأخذه غيرى فاطمأن قلبى، وعلمت أن عملى لا يقوم به غيرى فاشتغلت به وحدى، وعلمت أن الله مطلع علي فاستحييت أن يرانى عاصيا، وعلمت أن الموت ينتظرنى فأعددت الزاد للقاء ربى.

على فكره هوندا كانت اتكلمت في موضوع يشبه ده بس ركزت على الحسد قبل كده

الحمد لله

2009-12-29T23:31:00.002+02:00

الحمد لله الذي تواضع لعظمته كل شيئ

الحمد لله الذي ذل لعزته كل شيئ

الحمد لله الذي خضع لملكه كل شيئ

الحمد لله الذي استسلم لقدرته كل شيئ

الحمد لله حمدا كثيرا طيبا مباركا كما ينبغي لجلال وجهك وعظيم سلطانك

الحمد لله والشكر لله حمدا كثيرا طيبا مباركا فيه ملئ السموات والارض وملئ ما بينهما وملئ العرش وملئ زنة العرش وملئ مايشاء ربي ويرضى

الحمد لله رب العالمين عدد ماكان وعدد مايكون وعدد الحركات والسكون
الحمد لله الذي لا يحمد على مكروه سواه

عيد مبارك بالعربي :)

2009-11-25T22:37:00.003+02:00

كل سنه وانتم طيبين وعيد أضحى مبارك علينا جميعاً

2009-11-20T23:23:00.003+02:00

أول مره أحس اني بحب علم مصر أوي كده وبعشق مصر وأهل مصر بالطريقه دي

احنا طلعنا محترميييين أوي يا جماعه والله وعندنا روح رياضيه
بجد حزينه على حال العرب والتخلف اللي بيحصل ده والجهل وانعدام الأخلاق وماحدش يقنعني ان السبب ماتش كوره!!!!!ا
بجد حسبي الله ونعم الوكيل

بابا ونيس والاخلاق والانتماء

2009-09-19T02:02:00.006+02:00

أنا من أشد المعجبين بيوميات ونيس واللي عاجبني أكتر بابا ونيس اللي من زمان وانا بحس اني معاهم وبتعلم منهم ولحد دلوقتي ... كنت عايزه أوي اعرف لو هو في الزمن ده هيتعامل مع اولاده ازاي ... الراجل ده بحترمه جداً من البدايه احترامه لوفاة كل من شارك في الاجزاء السابقه ودور مايسه اللي لسه مخلص ليها ... اللي عاجبني كمان انه مش انسان مثالي ومش بيغلط بالعكس هو بيغلط كتير زي أي انسان ... بجد اتعلمت منه كتييييير وفي حياتي طبقت حاجات كتير اتعلمتها منه من اسلوب تربيه وتعامل مع الناس واتعلمت ازاي اتعامل مع أسئلة اولادي ان شاء الله يعني ... الراجل ده بيحب بلده ونفسه يخليها أحسن نفسه يبقى في أمانه وصدق ومافيش فضول وحقد ... ربى اولاده على الأخلاق والقيم النموذجيه ... في بوست قبل كده سألت ازاي نربي اولادنا على الاخلاق واحنا في الزمن ده
في الحلقات الأولى بابا ونيس رد عليا لما اولاده ناقشوه انه رباهم غلط وقالهم انا ربتكم على الاخلاق والقيم وكان الحل في جملة لا تحملوا أولادكم على أخلاقكم فانهم خلقوا لزمن غير زمانكم
ومن الحاجات الجميله اللي قالها قبل ماتفكروا في مصاريف الزواج والجهاز فكروا ازاي تبنوا أسرة لا تهدم
من أقوى الحاجات اللي أثرت فيا وقالها أولاً ثقافة أطفالنا وثقافتنا ومعلومتنا عن بلدنا اللي أصبحت شبه معدومه
ثانياً الانتماء ومعنى الانتماء ... خلاني أفكر في حاجات كتيير وعرفت احنا ليه بقينا كده وليه مش عايزين نعطي.. من وجهة نظري لأننا حاسين اننا مش بناخد مش حاسين انها بتاعتنا حاسين اننا اغراب والاغراب اللي بجد بيتعاملوا أحسن مننا فيها... ممكن.. دي وجهة نظري
اللي عايز يسمع درس الانتماء ده من بابا ونيس يتفضل .... على فكره اللينك ده خدته من هوندا شكراً يا هوندا :)

من أول ماعرفت انه هيعمل جزء جديد وهدفه ايه فرحت انه فكر في كده وشخصية حفيده أمان اللي حلمه يبقى رئيس جمهورية ده لأنه قال قبل كده ان حلو رئاسة الجمهوريه مات عند أطفالنا حب يورينا نموذج لطفل نفسه يبقى رئيس جمهورية

على فكره كنت حابه اشوف بوجي وطمطم بعد الموبايل والكمبيوتر والتغيير الكتير في كل حاجه منهم الاخلاق لكن استعيلت نفسي أوي لما شوفتها ولاقيتها بايخه وشخصيات كتير بارده وماعجبتنيش زي زيزي اللي كانت مجنونه وبقت هاديه
أيوه انا لسه مش بحب التليفزيون لكن بحب أخد منه المفيد واستفاد منه وده تحدي من وانا صغيره مش لازم تعرفوه :) ومش من الناس اللي بتبكي بدل الدموع بطيخ لما حلقة تروح مني... على فكره البوست ده كله وجهة نظري سواء فينا أو في اعجابي لبابا ونيس ووجهة نظري تحترم حتى لو مختلفين معايا ولا ايــــــه؟!!ا

وأخيراً كل سنه وانتم طيبيين بمناسبة العيد ورمضان اللي بيجري وهو الوحيد اللي بيجري لكن السنه الميلاديه ماعرفش طويله كده ليه السنه دي بالذات :)
أه وعلى فكره في رمضان أنا باكل زبادي وبشرب عرق سوس ومش باكل الحلويات الشرقيه ولا الكحك وكنت بشوف بوجي وطمطم "زمان" وباكل المانجه مكعبات :D
وكل سنه وانتم طيبين
سلام

شاب ياباني يخترع زوجه له

2009-07-06T19:33:00.008+03:00

أيوه دي حقيقه... تقدروا تقولو ان في ميل جالي وعملت بحث لاقيت الخبر منتشر وأنا أخر من يعلم
الراجل قال بدل وجع الدماغ أو حتى بدل ما أجيب واحده صغيره واربيها على ايدي أنا فاضي اربي لأ أنا اخترعلي واحده كده بكل المواصفات اللي عايزها ولا تشتكي ولا تصدعني ولا أي حاجه مش عارفه أقول غير لا حول ولا قوة الا بالله مش علشان اللي في دماغكم والزواج والكلام ده لأ والله بس ده حرام فعلاً مع كل احترامي وتقديري وحبي الشدييييييييد لليابان وشعبها وتحيه كبيره أوي ليهم
طبعاً يالا يا بنات الحقوا اتجوزوا بقى أحسن الشباب يسافروا اليابان ويفصلوا واحده
ده نص الكلام بالصور كمان (الصور مصغره اضغط عليها)

استطاع شاب ياباني أن يبتكر انساناً آلياً على هيئة أنثى تقوم بكل الأعمال المنزلية

طوال الاربع وعشرين ساعة

ولا تتحدث الا اذا طلب منها، وتقرأ

الجريدة بصوت عال، وتتعرف على المشروب

المفضل، وشكلها جذاب

وأوردت صحيفة كورييري ديلا سيرا الايطالية أن مخترعا يابانيا يعيش في كندا قرر أن يبتكر لنفسه زوجة مثالية تكون شريكته في حياته، بعدما أعياه البحث عن فتاة بمواصفات تشبع رغباته دون أن تصدر منها اية شكوى

وبالفعل بدأ الشاب ويدعي " لي ترونج" – 33 عاما – في العمل في المشروع واستطاع انجازه في عامين من العمل المتواصل ليل نهار وأطلق على ابتكاره" أيكو"، وأنفق عليه 16 ألف يورو وباع من أجله سيارته و طلب قرضا من البنك. ويبلغ عمر الزوجة الآلية عشرين عاما وتتعرف على الألوان وبعض الوجوه وتقرأ اليابانية والانجليزية وتنطق 13 ألف جملة في اللغتين، وتحل المعادلات الرياضية وتتعرف على الاتجاهات

من جانبه، قال ترونج إنه لم يجد فتاة أحلامه، وكان الاختيار الأوحد المتاح هو أن يصنعها بنفسه باستخدام التكنولوجيا. وأوضح أن تلك الأنثى الآلية تتميز بمعظم الخصائص الأنثوية ومصنوعة من السيليكون، وإذا احتضنها أحد بقوة تقوم بصفعه على وجهه. وتم تزويدها بكل المشاعر الإنسانية ، واختتم المخترع قائلا إنه تعرض لأزمة قلبية العام الماضي، وعانى كثيرا من الممرضات، بينما الآن لديه زوجة تعمل طوال 24 ساعة دون أن تشتكي أو تطلب إجازة، إنها بالفعل الزوجة المثالية

بين الأخلاق والزمان

2009-07-01T22:24:00.003+03:00

لما غبت عن أصحابي في ظروف غامضه ورجعت أكلمهم تاني لاقيت في اختلاف ملحوظ ... كل لما أكلم واحده أقولها ايه يابنتي طولة اللسان دي تقولي أه مانا اتعلمتها والحمد لله ماهو الواحد لازم يبقى كده علشان يعرف يتعامل مع الناس
هو يعني الواحد مايعرفش يتعامل مع الناس الا بطولة اللسان والشتيمه... بجد كتير منهم ألاقيهم بيشتمو بابن كذا كمان (طبعاً إلا بعضهم) وبصراحه اللي بلاقيها لسانها انحرف كده ببعد عنها علشان مش هعرف أتعامل معاها
يعني المفروض اني أتعامل مع الناس بالطريقه اللي أحب يعاملوني بيها أنا ماقبلش على نفسي ان حد يشتمني بالأهل --هما أهلي كبروني علشان يتشتموا في الأخر؟!-- وبالتالي مش هشتم حد

الحاجه الأغرب اللي لاقيتها اليومين دول بقى... المفروض برضه ان معاملة الزوج وزوجته والخطيب وخطيبته تكون فيها احترام من الطرفين لبعضهم وبما اني بتكلم في نقطه واحده اللي هي طولة اللسان يبقى ماينفعش حتى أهزر مع زوجي أو خطيبي (لما ربنا يكرمني يعني ان شاء الله) وأشتمه ولا بيني وبينه ولا قدام الناس ولا حتى بيني وبين نفسي والا هكون مش محترماه وانسان مش بحترمه مش هقدر أعيش معاه ... دي وجهة نظري ومازالت وستظل ... لكن اللي بلاقيه من اللي حواليا --ودي حصلت قدامي كذا مره-- ان الشتيمه دي حاجه عاديه يعني واحد يشتم خطيبته وهي تشتمه عااااااااادي جداً على انهم بيهزروا وكل اللي بعمله اني ببص للاتنين بقرف وبسكت أصلي لو اتكلمت هبقى ايه العقد اللي انتي فيها دي احنا بنهزر (وحصلت فعلاً واتقالي كده) ...واحده كانت بتتكلم عن زوجها المتوفي وبتقول كان بيقولي كذا وكذا شتايم يعني وكأنها بتقول انه كان بيدلعها ياماما ده كان بيشتمك بأهلك أنا مش عارفه الناس اللي بتقول واللي بتسمع مش مستوعبه ولا ايه
يعني انت ترضاها على نفسك ان خطيبتك أو زوجتك تشتمك وتبقى عادي انت زعلت ولا ايه احنا بنهزر؟؟؟؟؟؟

أنا يا جماعه مش معقده بس كل حاجه في الدنيا لو حدودها اتكسرت هتبوظ أو تتتهز... الزمان أه اتغير بس احنا اللي بنغيره ومهما اتغير الأخلاق مش بتتجزء... أنا كنت قولت قبل كده اني عايزه أخد كورس في الشتايم علشان أنا بليده أوي فيها وساعات مش بعرف ان اللي اتقال ده شتيمه ولا بعرف معناها لكن دلوقتي مش عايزه بصراحه أخد كورسات الحمد لله ان لساني مش واخد على الشتايم ويارب مايتأثرش بالالسنه التانيه

موضوع تاني له علاقه بالأخلاق برضه التعامل مع الناس بس في المصالح ... رشوه وواسطه... مهما اختلفت المسميات الرشوه رشوه لعن الله الراشي والمرتشي والواسطه واسطه وبحس كده ان الواسطه بنت عم الرشوه أو أختها قريبه منها أوي لأن ليها نفس المعنى انك بتعمل حاجه ممكن تكون سبب في انك تاخد حاجه مش من حقك بس المشكله ان ده بيتطلب منك يعني الموظف يقولك فين السجاير بتاعتنا أو يقولك معاك واسطه؟ بجد ربنا يرحمنا من الرشوه والواسطه والناس الظالمه
السؤال المهم بقى هنعلم أولادنا ايه؟؟؟؟؟؟؟؟ هنعلمهم الأخلاق المعروفه ولا هنعلمهم اللي يتعاملوا بيه في الزمن اللي احنا فيه أو اللي هما هيبقوا فيه ... ولا هنعلمهم الأخلاق وهما يصتدموا بالواقع؟؟

جوامع الاستغفار

2009-06-30T00:21:00.002+03:00

أستغفر الله العظيم الذي لا إله إلا هو الحي القيوم وأتوب إليه وأسأله التوبة والمغفرة ..

أستغفر الله العظيم الذي لا إله إلا هو الحي القيوم وأتوب إليه توبة عبد ظالم لا يملك لنفسه ضرا ولا نفعا ولا موتا ولا حياة ولا نشورا..

اللهم مغفرتك أوسع من ذنوبي ، ورحمتك أرجي عندي من عملي. سبحانك لا إله غيرك أغفر لي ذنبي وأصلح لي عملي إنك تغفر الذنوب لمن تشاء. وأنت الغفور الرحيم يا غفار أغفر لي يا تواب تب علي يا رحمن أرحمني يا عفو أعفو عني يا رؤف أرأف بي..

اللهم إني أستغفرك من كل ذنب أذنبته وتعمدته أو جهلته. وأستغفرك من كل الذنوب التي لا يعلمها غيرك ، ولا يسعها إلا حلمك..

اللهم إني أستغفرك لكل ذنب يعقب الحسرة. ويورث الندامة ويحبس الرزق ويرد الدعاء..

اللهم إني أستغفرك من كل ذنب تبت منه ثم عدت إليه. وأستغفرك من النعم التي أنعمت بها علي فأستعنت بها على معاصيك. وأستغفرك من الذنوب التي لا يطلع عليها أحد سواك. ولا ينجيني منها أحد غيرك. ولا يسعها إلا حلمك وكرمك ولا ينجيني منها إلا عفوك..

اللهم إني أستغفرك وأتوب إليك من كل ذنب أذنبته ولكل معصية أرتكبتها. فأغفر لي يا أرحم الراحمين..

اللهم إني أستغفرك لكل ذنب يدعو إلى غضبك أو يدني إلى سخطك أو يمل بي إلى ما نهيتني عنه أو يبعدني عما دعوتني إليه..

اللهم إني أستغفرك من كل ذنب يصرف عني رحمتك أو يحل بي نقمتك أو يحرمني كرامتك أو يزيل عني نعمتك..

اللهم إني أستغفرك لكل ذنب يزيل النعم ويحل النقم ويهتك الحُرَم ويورث الندم ويطيل السقم ويعجل الألم..

اللهم إني أستغفرك لكل ذنب يمحق الحسنات ويضاعف السيئات ويحل النقمات ويغضبك يا رب الأرض والسماوات..

اللهم إني أستغفرك لكل ذنب يكون في إجترائه قَطْعُ الرجاء ورد الدعاء وتوارد البلاء وترادف الهموم وتضاعف الغموم..

اللهم إني أستغفرك لكل ذنب يرُدُّ عنك دعائي ويقطع منك رجائي ويطيل في سخطك عنائي ويقصر بي عنك أملي..

اللهم إني أستغفرك لكل ذنب يميت القلب ويشعل الكرب ويشغل الفكر ويرضي الشيطان ويسخط الرحمن..

اللهم إني أستغفرك من كل ذنب يدعو إلى الكفر ويورث الفقر ويجلب العسر ويصد عن الخير ويهتك الستر ويمنع الستر..

اللهم إني أستغفرك لكل ذنب يدني الآجال ويقطع الآمال ويشين الأعمال..

اللهم إني أستغفرك يا عالم الغيب والشهادة من كل ذنب آتيته في ضياء النهار وسواد الليل وفي ملأٍ وخلاءٍ وسرٍ وعلانية يا حليم..

اللهم أغفر لي ذنبي مغفرة أنسى بها كل شئ سواك ، وهب لي تقواك وأجعلني ممن يحبك ويخشاك..

اللهم إني مستغيث أستمطر رحمتك الواسعة من خزائن جودك ، فأغثني يا رحمن. لا إله إلا أنت سبحانك وبحمدك ظلمت نفسي فأرحمني إنك أرحم الراحمين..

يا من إذا عظٌمت على عبده الذنوب وكثرة العيوب ، فقطرة من سحائب كرمك لا تبقي له ذنبا ، ونظرةُُ من رضاك لا تترك له عيباً ، أسألك يا مولاي أن تتوب علي وتغفر لي..
*********************************************************

أنا رجعت تاني ويارب ماحدش يكون نسيني

!!!كدبة ابريل

2009-03-31T01:07:00.002+02:00

بضايق جداً من كلمة كدبة ابريل دي ولا بحبها أصلاً اشمعني يعني ابريل وكدبة ابريل مش عارفه
المهم لحد دلوقتي سمعت اشاعتين النهارده بس والاتنين اكتشفت انهم طالعين من يومين مثلاً ومش عارفه هل ليهم علاقه بالكدبه دي ولا ايه
الاشاعه الأولى: ان ماحدش يرد على الأرقام الغريبه على الموبايل علشان في رقم لو رديت عليه الرقم يتحول لنجمه يبعتلك فيروس يدخل على المخ وتموت ... عفريت يا ناس
ياسلام منتهى العقل اننا نصدق الكلام ده مش كده برضه؟؟!!!!

الاشاعه التانيه: النور هيتقطع عن مصر من الساعه 8 أو 8ونص لحد 10 أو 10 ونص مش عارفه بالظبط ... ليه؟؟؟ توفير للكهرباء!!! بجد والله ياســــــــــــــــلام لأ ماتقوليش

بجد لو عايزين يعملوا (زي) اليابان في موضوع قطع الكهرباء ده مافيش مشكله بس نبقى (زيها) بقى مع عدم احترامي لكلمة (زيها) إطلاقاً مطلقاً بس بقيت بسمعها كتييييييير اليومين دول جداً أوي يعني وكأن كله عايز يبقى (زي) كله مش أكتر من كده مع ان لو كله ركز انه يبقى هو مش هيحتاج ل(زي) ولا (زيها) ولا (زيه)
مش عايزه حد يقولي الجمله الشهيره "هو كام بيروح فين منين" الكلام واضح أهو بجد:) ا

الحمد لله

2009-03-27T17:50:00.007+02:00

يظهر يا جماعه اللي بعمله ف الناس بيطلع عليا.... بعد البوست الغريب ده بتاع الحوادث وكنت مركزه أوي فيه على الحرق والنار والجو ده
بس الحمد لله ربنا كريـــــــــــــــم لأكتر ماكنت أتخيل بجد ربنا رحيم جداً جداً جداً ....... الحمد لله
الحمد لله الذي تتم بنعمته الصالحات
الحمد لله رب العالمين
اللهم لك الحمد كما ينبغى لجلال وجهك وعظيم سلطانك
اللهم لك الحمد كما ينبغى لجلال وجهك وعظيم سلطانك
اللهم لك الحمد كما ينبغى لجلال وجهك وعظيم سلطانك
الحمد لله الذى نجانى
الحمد لله الذي عافاني وفضّلني على كثير ممن خلق تفضيلاً
الحمد لله الذي استسلم لقدرته كل شيء، الحمد لله الذي ذل لعزته كل شيء، الحمد لله الذي خضع لملكه كل شيء
الحمد لله الذي لا يغلق بابه ، ولا يرد سائله ولا يخيب آمله
الحمد لله الذي يؤمن الخائفين وينجي الصالحين ويرفع المستضعفين
الحمد لله الذي من خشيته ترعد السماء وسكانها وترجف الأرض وعمارها وتموج البحار ومن يسبح في غمارتها
الحمد لله الذي يخلق ولم يخلق ، ويرزق ولم يرزق ، ويطعم ولا يطعم ، ويميت الأحياء ويحيي الموتى ، وهو حي لا يموت بيده الخير ، وهو على كل شيء قدير
سبحان الله وبحمده سبحان الله العظيم
اللهم لك الحمد كما ينبغى لجلال وجهك وعظيم سلطانك
اللهم لك الحمد كما ينبغى لجلال وجهك وعظيم سلطانك
اللهم لك الحمد كما ينبغى لجلال وجهك وعظيم سلطانك

بحبك يا أمي

2009-03-21T00:23:00.006+02:00

كل سنه وانتي طيبه يا مامتي يا حبيبتي يا أحلى أم ف الدنيا
على فكره في مسابقه اسمها الأم المثاليه ... بصراحه أنا رأيي ان كل أم مثاليه ف عين أولادها ... بس مسابقه تحترم وكل واحد ووجهة نظره بقى ولا ايه ... أنا عن نفسي ماما أحسن ماما ف الدنيا وربنا يخليها ليا يارب ومايحرمنيش منها ولا يحرمها مني
بالنسبه للهديه بقى أنا أســـــــاسي ماجبتش هديه علشان أنا أصلاً أكبر هديه لأمي وبعدين مانا طول عمري باخد منها الفلوس واجبلها الهديه قولت أوفر عليها المره دي

on 22-03

مش مهم العنوان

2009-03-14T02:24:00.007+02:00

قالت لهُ...أتحبني وأنا ضريرة ...وفي الدُّنيا بناتُ كثيرة ...الحلوةُ و الجميلةُ و المثيرة ...
ما أنت إلا بمجنون ...أو مشفقٌ على عمياء العيون ... قالَ ...بل أنا عاشقٌ يا حلوتي ...ولا أتمنى من دنيتي ...إلا أن تصيري زوجتي ...وقد رزقني الله المال ...وما أظنُّ الشفاء مٌحال ...
قالت ...إن أعدتّ إليّ بصري ...سأرضى بكَ يا قدري ...وسأقضي معك عمري ....
لكن .. من يعطيني عينيه ...وأيُّ ليلِ يبقى لديه ...
وفي يومٍ جاءها مُسرِعا ...
أبشري قد وجدّتُ المُتبرِّعا ...وستبصرين ما خلق اللهُ وأبدعا ...وستوفين بوعدكِ لي ...وتكونين زوجةً لي ... ويوم فتحت أعيُنها ...كان واقفاَ يمسُك يدها ... رأتهُ ...فدوت صرختُها ...أأنت أيضاً أعمى؟!!... وبكت حظها الشُؤمَ ...لا تحزني يا حبيبتي ...ستكونين عيوني و دليلتي ...فمتى تصيرين زوجتي ...
قالت ...أأنا أتزوّجُ ضريرا ...وقد أصبحتُ اليومَ بصيرا ...
فبكى ...وقال سامحيني ...من أنا لتتزوّجيني ...ولكن ...قبل أن تترُكيني ...أريدُ منكِ أن تعديني ...

أن تعتني جيداً بعيوني
*****************************************

طبعاً دي رائعة نزار قباني... بغض النظر عن حبي لمعظم أشعار نزار وعن كره معظم الناس ليها
بعد ما قرأت الكلام ده سألت نفسي سؤال أصلاً على بالي على طول بس ألح عليا أكتر... ممكن يكون مختلف عن اللي في القصيده
بس مش تشاؤم ده كلام واقعي ممكن يحصل... وبجد أنا بسأل ومش عارفه الاجابه
هل لو واحد متزوج واحده جميله وبيحبها وحصل ليها حادث خلاها مشوهه هيفضل يحبها وهيفضل واقف جنبها ولا ممكن يتخلى عنها لمجرد ان شكلها اتغير... الحقيقه أنا أعرف حد زوجته حصل لها حادث ومن الأخر يعني احترقت وحصل ف جسمها تشوهات كانت حروق صعبه و الحمد لله اتعالجت بعد كذا سنه علاج و فضلت مأثره على شكلها والرجل ده فضل متزوجها وعايش معاها لحد دلوقتي ومعاهم أطفال والدنيا تمام الحمد لله...
ونموذج تاني من الناس واحده عندها 24 سنه وزوجها ربنا ابتلاه بمرض وحالياً مش بيشتغل وعلى كرسي وكده وف الأخر اكتشفوا ان عنده أورام ورغم انها مش متزوجاه عن حب لكن واقفه جنبه للأخر وبدون الدخول في تفاصيل
مش بس حوادث الحروق والتقاعد
طيب لو واحده تزوجت واحد وبيحبوا بعض وكل حاجه هل لو حصله أي حادث هتفضل معاه ولا تتخلى عنه
من غير ما أقول الحوادث يعني أحسن تتخنقوا مني بس على سبيل المثال زي ما قولت حرق أو قطع أحد الأطراف
أعوذ بالله مني
من وجهة نظري اللي يتخلى عن زوجته أو اللي تتخلى عن زوجها يبقى خاين وندل ومش جدع
ممكن تكون وجهة نظر رومانسيه شويه (مع ان بعد الحوادث دي كلها مافيش فيا ريحة الرومانسيه) بس بجد أنا فكرت ف الموضوع ده ولسه بفكر لو أنا حصلي حاجه بعد الزواج ان شاء الله زي دي لاقدر الله هل زوجي هيفضل متمسك بيا ولا هيسبني ؟؟ ده ماعرفتش أجاوب عليه بس اللي عرفت أجاوب عليه هو سؤالي لنفسي هل لو العكس أنا ممكن أسيبه؟؟؟ ومن منطلق اني جدعه ورومانسيه فكرت انه لو لا قدر الله ... ولا أقولكم بلاش أكمل أحسن
المهم اني برضه من منطلق الواقعيه وان مافيش حاجه مستحيل فكرت في الكلام ده كله وف كل الاحتمالات وماقدرتش أجاوب على لسان الرجال لكن أنا عن نفسي مش ممكن أتخلى عنه ... برغم الكلام اللي قالته الأنثى الندله صاحبة القصيده (واللي ف نفس ذات الوقت غبيه)
بس الرجال قلبهم مش حجر وبني آدم زينا كده يعني أفتكر ان رأيهم مش هيختلف كتير عن رأيي ... ولا ايه؟...
كنت بسمع كلمه بتقال زمان ودلوقتي ف الأفلام وكده... "أنا بحب زوجي حتى ولو عظم ف قُفه" أو "الست بتفضل تحب زوجها حتى ولو عظم ف قُفه" الكلام ده هل هو حقيقي ولا لأ ؟؟ مش عارفه مع العلم ان الكلام ده من زمان وزمان أغلب الزواج كان مش عن حب يعني بيشوفها يوم كتب الكتاب بس ...يعني موضوع التمسك ده مش حب وبس في حاجات كتير غير الحب... بس أعتقد ان دي قاعده وليها استثناءات بدليل ان في سيدات ممكن تقبل تتزوج بعد زوجها مع اختلاف وتعدد الأسباب
بصراحه أنا محتاره بس مش خايفه
وعايزه أعرف رأي الناس ف الموضوع ده
أنا آسفه لو في كلام جامد ومؤذي في البوست مع العلم اني ماكتبتش كل اللي فكرت فيه واني حاولت أعدل في الكلام علشان مايكونش مؤذي ولتاني مره: ده مش تشاؤم ولا حاجه

سنه تانيه

2009-03-10T00:00:00.002+02:00

كل سنه ومدونتي طيبه

رغم ان السنه دي ماعملتيش حاجه ولا كتبتي حاجه جديده يا مدونتي بس برضه مستحملاني وده كفايه عليكي بصراحه
وعلشان عيد الميلاد ده عملت التيمبلت ده... عايزه أعرف رأيكم فيه ... بس أنا مبسوطه اني المره دي عملت التيمبلت الحمد لله كتصميم يعني وتظبيط وكده
بس ايه رأيكم فيه وف اللون الليلاه اللي بحبه ده؟؟
يارب مايكونش عاجبكم ... لسبب واحد بس اني مش بحب حد يقولي اني ديزاينر
بصوا بقى زي عيد الميلاد اللي فات عايزكم تردوا على الأسئله دي واللي تعتبر هدية عيد الميلاد
في خلال السنه دي من مارس 2008 لحد مارس 2009 واللي عايز ف خلال السنتين ماشي عادي يعني
1- ايه أكتر موضوع عجبكم؟
2- ايه أكتر موضوع مش عجبكم؟
3- مش هسأل على اسلوبي علشان مش هغيروا ... بس مش مشكله ايه رأيكم ف اسلوبي؟
4- ايه رأيكم في الشكل الجديد؟
ملحوظه:: اللي عايز يديني أي هدايا أخرى من لاب توب وخلافه طبعاً أنا موافقه يعني مافيش أييييي مشكله
وعلشان عيد الميلاد وكده... في حاجات عملتها ف المدونه ومنها اني عملت فلتر ليها ومسحت منها شوية حاجات كده ... بس تخيلو سنتين ولسه ماوصلتش للبوست ال100!! بس مش مشكله خااالص بالنسبه ليا بصراحه.. المهم انها عندها سنتين والحمد لله ماعندهاش نقص كالسيوم ولا حصبه وان شاء الله السنه اللي جايه تمشي وتقول ماما وبابا ...أيوااااان المدونه
على فكره في بوستات تم التعديل فيها بالحذف... بوستات كتيييييير الحمد لله ... رغم مبدأي اني عمري ما بحذف اللي بكتبه هنا بالذات لكن للمباديء أولويات ولذلك أعلن عدم ندمي على اللي مسحته
شكراً للناس اللي متبعاني واللي بتسأل عليا
واتفضلو التورته جاهزه

تاج هوندا السري

2009-03-06T04:06:00.002+02:00

البوست ده بتاريخ 11 أغسطس 2008 وماكونتش هنشره ولا حاجه بس بالغلط وأنا بفلتر البلوج ماعرفتش انه اتنشر الا لما دخلت على الريدر قولت خلاص اللي حصل حصل :) وبوست يفوت ولاحد يموت كويس انها جت ف ده
وقال ايه كاتبه وعد الحر دين عليه وكده زمان هوندا نسيته زي مانا نسيته... بس الوعد دين:$ وسامحيني يا هوندا
نبدأ... بس بشرط... الكلام اللي هنا من أول كلمه جايه لحد الآخر بالتاريخ القديم ماغيرتش فيه كلمه الا بعض تصحيح املائي بس ولكن بعترف ان كل اللي جاي مافيش حاجه اتغيرت فيه الا ان العصبيه خفت شويه الحمد لله
نبدأ بقى:)

كان في مثل بيقول السر لو خرج مابين 2 مايبقاش سر
أومال بقى لو على الملأ كده ماشاء الله يعني يبقى ايه ... فضيحه ؟؟ ممكن برضه
هوندا دبستني بقى والبنت مش بتطلب مني حاجه وأنا وعدت اني لأزم أجاوبه ... ووعد الحر دين عليه
نقول بسم الله الرحمن الرحيم

اذكر اسم من طلب منك حل هذا الواجب

هوندا

اذكر 6 أسرار قد لا يكتشفها من يقابلك أول مره

مش بقولكم فضايح

1- السر الرهيب والخطير اني عصبيه شويتين تلاته كده ... الناس فاكره اني هاديه وشكلي يقول اني هاديه لكن الحقيقه المره اني عصبيه ... ومايعرفش كده الا اللي عارفني أويي وبيتعامل معايا كتييير... مش دايماً عصبيه لكن لما بتعصب بتبقى مشكله ... بس المشكله الوحيده اني مش بعرف أشتم وماعنديش قاموس الشتايم ويمكن لو سمعت كلمه مافهمش انها شتيمه والمشكله الأكبر ان صوتي مش بيكمل الزعييء يعني نفسي مش طويل:)) ... عصبيه من غير صوت ولا شتيمه .. حتى العصبيه فاشله فيها

2- بكره الغباء كره العمى ... ومش بعرف أتعامل مع حد غبي ... مش ادعاء مني اني ذكيه ولابتاع ماش أنا غبيه ومش بعرف اتعامل مع حد ذكي .... بس زي ماتقولوا كده مؤمنه بالمثل اللي بيقول عدوك الناصح ولا صاحبك العبيط ... والغباء والبرود أكتر حاجتين يعصبوني ... بحب أتكلم مع الناس اللي ممكن تفهمني تنزل لمستوى غبائي :))

3- ممكن لو حد خد مجهود حد أكسفه قدام نفسه وقدام اللي بيعرض عليه المجهود ده... أكتر حاجه بكرهها في حياتي ان حد ينسب لنفسه حاجه مش بتاعته

4-بتكسف جداً من جوايا وساعات كتير بحاول أداري الكسوف ده... باني أتوه الكلام أو أغير الموضوع ... بس اللي اكتشفته انه برضه بيبان عليا ... كنت فاكره نفسي ناصحه وبعرف أدراي كسوفي لكن في ناس لفتت نظري للموضوع ده

5-سر بقى سلطه ف بعضه... الناس ماتعرفش اني دبلوماسيه وف نفس ذات الوقت بخبط الكلمه ساعات كتييير لدرجة ان ممكن من أول مره الناس تضايق من كلمه قلتها مش قصداها وف نفس الوقت صريحه بدرجه كبيره وصراحتي مودياني ف داهيه ولما بكرهه حد بيبان على طوووول ف وشي ومعاملتي معاه ودي حاجه بيني وبينكم بايخه أوي
حساسه جـــــــــــداً لكن مش بزعل بسرعه لكن ممك أضايق وأعيط من كلمه لكن مش بزعل

6- أكتر حاجتين بكرههم ... السر التالت وكمان لو بتكلم وحد قطع كلامي وهو عارف اني بتكلم ومرجعش يقولي مثلاُ كملي كلامك ... خصوصاً لو أنا كنت بفضفض أو بقول كلام مهم... وخسرت ناس كتير بسبب الحكايه دي ... مابقتش أحب أتكلم معاهم ... والناش مش بتعرف الموضوع ده الا لما تحصل بيني وبينهم مشكله ويكون سببها الحاجتين دول

مرر التاج ل6 مدونيين

1- اللي عايز يجاوب

2-اللي عايز يجاوب

3- اللي عايز يجاوب
4- اللي عايز يجاوب
5- اللي عايز يجاوب
6- اللي عايز يجاوب

مانا كل مره بمرره وماحدش بيعبرني ياريت بقى اللي يحب يجاوب يتفضل ياخده
سلام:)ا

wrote on 11/08/2008

2المترو

2009-02-25T00:45:00.006+02:00

بعد 7 سنيين مترو في ثانوي وجامعه ومعاناااااااااااااه فيهم يومياً (وقت الذروه طبعاً) اترحمت بعد الكلية وركبت مواصلات عاديه ألا وهي الميكروباصات اللذيذه اللطشيفه اللي ماكنش فيها أيييييييي مشاكل إطلاقاً مطلقاً ولا زحمة ولا ناس متعبه ... المهم سنه تقريباً اترحمت من نزولي يومياً ف معركة المترو اللي عمل معايا أحلى واجب ... كنت بقضي فيه وقت رهيب يومياً اربع ساعات تقريباً ساعتين (انتظار وحرب وركوب) رايح وزيهم جاي .. يعني مره الأقي نفسي واقفه ف آمان الله على رصيف المترو وورايا جماهير من الناس المترو يجي أقول لأ ده زحمه مش هركب بس واضح ان الناس ضد رغبتي ومجرد اني فكرت أقول مش هركب ماكملتش الكلمه في سري والباب فتح ولاقيتني جوه المترو مخبوطه في الباب المقابل وده ضد رغبتي يا جدعان مش عايزه أركب بس هما كانوا عايزين يخدموني وفاكرين اني متأخره فعملوا فيا الخدمه دي ....
ومره والله حقيقي ومش تهريج يعني أنا فعلاً ماكنتش عايزه أركب المترو علشان الزحمه برضه عادي مش بحب الزحمه بتخنق منها بس بدون مبالغه لاقيت رجلي فوق رجل كام واحده كده وماشيين بيا يعني رجلي مش لامسه الأرض أساساً ولاقتني على غير ارادتي داخل علبة التونه محموله على الأقدام وبما اني وزني تقيييييييل ده كان سهل أوي انه يحصل يعني مش لازم أحكي حوادث ال7 سنيين خلينا كويسين أحسن بس بعد العشره دي كلها ماهنش على المترو انه يسبني ورجعني ليه تاني ... وتاني تاني تاني رجعت للمترو تاني مافيش اختلاف ... الناس هما الناس بس على أسوء شويه ... زمان أنا وصحابي كنا بنركب لحد رمسيس سيدات وننزل رمسيس أو عرابي نستنى صاحبتنا الرابعه ونركب عربية عاديه لسبب ... ان السيدات من المرج لحلوان مش بتفضى بتتملي بس ورمسيس الرجاله بتبتدي تنزل منها يعني في فرصه كبيره اننا نقعد لحد الجامعه ... اليومين دول علشان بركبه لوحدي بركب سيدات وأمري لله مره كنت متأخره بجد مالحقتش السيدات وركبت عادي أبص حواليا مالقيش ولا واحده واقفه ولا قاعده ف العربيه طيب ياربي أنزل ولا أعمل ايه قلت مش مشكله عملت الطقوس اللي بعملها لما بركب المترو أو أي مواصله وخلاص كنت واقفه أنا مش بيفرق معايا خالص ان حد يقوم ويقعدني بس كان في واحد قدامي قاعد (كان مترو جنازات) نده على راجل علشان يقعده وأنا واقفه قدامه قولت عادي يمكن وجهة نظر ولا حاجه ولما لاقيته راجل كبير يعني نقول 50 مش كبير أوي قولت عادي الراجل لما قعد مش يسكت بقى لأ بيقول للي جنبه هما قارفينا ليه ماعندهم عربيه قالوا انا عارف ايه القرف ده الواحد لو دخل العربيه بتاعتهم بالغلط كأنه فتح عليهم باب الحمام ومش بنخلص منهم ....قولت ياواد طنش خااااالص وقعدت بعد ما قام ف سعد زغلول باين ووصلت بالسلامه الحمد لله بصراحه الراجل عنده حق ... لو اتكلمت عن عربية السيدات مش هبطل كلام... بجد يعني أعوذ بالله... أولاً رغي رغي رغي وبصوت عالي يتعب الاعصاب والله ساعات ببقى عايزه أصرخ وأقولهم كفاااااااايه حرام عليكم وممكن أنزل بسببهم يمكن اللي بعديهم يبقى أقل رغياً ولا حاجه ... بس على مييييين ... المشكله ان اللي بيرغوا مايعرفوش بعض والله وبيتكلموا في مواضيع خاصه جداً ... يعني واحده بتكلم اتنين ماتعرفهمش بتقولهم

أ :.... ده أنا ابراهيم أخويا أهو عايش ف الشقه اللي ابويا بانيهاله في البيت ومابيشتغلش ومش متجوز
ب: ليه ياختي ماتجوزش هو عنده كام سنه
أ: 35 سنه بس مش لاقي شغل هيتجوز بقى وابويا بيصرف عليه
ج: مايشتغل ياختي ده فيه ناس معاها كذا وبتشتغل
أ: لأ ياختي مش لاقي وثريا أختي مش عارفه عامله ايه وايه
أنا بصراحه لاقيت الموضوع داخل في ثريا قولت أه ده وجع دماغ بقى .... الموضوع كان ليه أول بس مش فاكراه طبعاً
وفي واحد كانت بتتكلم مع صاحبتها عن عريس متقدملها وموقف أهلها وأهله من غير الدخول ف تفاصيل ... واحد كانت قاعده جنبي قالتلها انتي كلية ايه وسنه كام وعايزه رأيي ماتقبليش .... طيب وانتي مااااااااالك انتي ايه عرفك بظروفها

في ستات أو بنات بيكونوا عايزين يفتحوا معايا حوار بس أنا ياما أبصلهم وأسكت ياما أرد وأسكت برضه... وبعدين كده كده مش هيسمعوني يبقى أوفر طاقة أحبالي الصوتيه أحسن موقف تاني من آلاف المواقف : راجل زنجي دخل العربيه بالغلط وشايل ابنه وباصص للباب ومش واخد باله ان دي سيئات وفضل كذا محطه وراجل تاني دخل وهو مش واخد باله برضه ... سيئه بقى من اللي واقفين (مع مراعاة انها واقفه على الباب التاني مش المقابل كمان يعني بعيده عنهم بكذا متر) قالت بعلو صوتها دي سيدات وكلمتين مالهمش لازمه الراجل المصري فهم وبكل ذوق سئل البنت اللي جنبه دي سيدات يابنتي قالتله أيوه قال أنا آسف يا جماعه ونزل المحطه اللي بعدها....التاني مش فاهم حاجه فامنزلش مع الراجل الست قالت زؤي ال.... خليه ينزل شتمت وقالت كام حاجه كده مالهمش أييييييييي لازمه .... طيب ليه قلة الذوق والاحترام ده يا انسانه ؟؟؟؟؟ بجد اتغاظت منها موووووووووت
غير بقى اللي بيبيعوا في المترو والشحاته في المترو ايه ده بجد منظرنا بقى مقرف أوي قدام الأجانب وقبل أي حاجه قدام نفسنا .... أجدد حاجه بقى واحده طالعه بتقول ايه:: حد عايز كشري جاهز .. حد عايز بتنجان مقور ... حد عايز أكل متنضف (ممكن يكون سمك بقى) حد عايز محشي جاهز ..... وماسكه كام شنطه سوداء كبيره أنا بصيتلها وتنحت وقولت كلمتي المعتاده:: ايه الهبل ده .... هي وصلت لكده !!!!!!! كشري ومحشي؟؟؟
وبمناسبة الكشري واحده قاعده في زحمة المترو وجايبه كام علبة كشري وبرتقال ويوسفي ومعاها عيالها الاربعه الصغيرين ... أنا بصراحه من ريحة الخليط ده غير اني أصلاً مش بحب ريحة كشري العلب ولا المطاعم لأ ومعاه برتقال كمان كنت هجيب اللي ف بطني بعدت قدر المستطاع في المساحه المحدده ليا ف الزحمة دي والواد يعييييييييط أنا عايز الكشري يا ماما وهي تقوله هتبهدلنا بيه وهو يعيط المهم علبة الكشري اتفتحت : والطفل اللي عنده بلا مبالغه سنتين ونص تقريباً (طفل شايلاه وبيتكلم كلام مش واضح لسه) ضرب علبة الكشري ماشاء الله يعني أنا مش بقول حاجه بس طفل وكشري وريحه ومترو وكده ليه يعني ... ازاي طفل ياكل كشري كده ومن الشارع كمان !!!!!!
بالنسبة لزحمة المترو الحمد لله اننا ماوصلناش لدرجة الهند والصين وكوريا وعقبال ماربنا يكرمنا ونوصل لليابان
مش هكلمكم بقى عن البنت اللي ضربت أخوها كانت هتعميه ولا دور سيدات المترو ف الموقف ده ولا باقي الواقف علشان كفايه كده طولت عليكم ... بوست للشهر كله بقى... في تعليق جالي زمان عن موضوع المترو برضه وعربة السيدات... ان البوست الطويل ده أكبر دليل على رغي السيدات في المترو... وأكييييييييد لينا كلام تاني عن المترو

آمين يارب العالمين

2009-01-29T23:08:00.004+02:00

لا إله إلا الله الحليم الكريم
لا اله إلا الله العلى العظيم
لا اله إلا الله رب السماوات السبع و رب العرش العظيم
اللهم إنا نسألك زيادة في الدين
وبركة في العمر
وصحة في الجسد
وسعة في الرزق
وتوبة قبل الموت
وشهادة عند الموت
ومغفرة بعد الموت
وعفوا عند الحساب
وأمانا من العذاب
ونصيبا من الجنة
وارزقنا النظر إلى وجهك الكريم
اللهم ارحم موتانا وموتى المسلمين واشفي مرضانا ومرضى المسلمين
اللهم اغفر للمسلمين والمسلمات والمؤمنين والمؤمنات الأحياء منهم والأموات
اللهم ارزقني قبل الموت توبة وعند الموت شهادة وبعد الموت جنة
اللهم ارزقني حسن الخاتمة
اللهم ارزقني الموت وأنا ساجد لك يا ارحم الراحمين
اللهم ثبتني عند سؤال الملكين
اللهم اجعل قبري روضة من رياض الجنة ولا تجعله حفرة من حفر النار
اللهم إني أعوذ بك من فتن الدنيا
اللهم أني أعوذ بك من فتن الدنيا
اللهم أني أعوذ بك من فتن الدنيا
اللهم قوي إيماننا ووحد كلمتنا وانصرنا على أعدائك أعداء الدين
اللهم شتت شملهم واجعل الدائرة عليهم
اللهم انصر إخواننا المسلمين في كل مكان
اللهم ارحم آبائنا وأمهاتنا واغفر لهما وتجاوز عن سيئاتهما وأدخلهم فسيح جناتك
وبارك اللهم على سيدنا محمد صلى الله عليه وسلم
بسم الله الرحمن الرحيم لا إله إلا الله الملك الحق
المبين،لا إله إلا الله العدل اليقين،لا إله إلا الله ربنا ورب
آبائنا الأولين،سبحانك إني كنت من الظالمين،لا إله إلا الله
وحده لا شريك له،له الملك وله الحمد يُحيي ويُميت وهو حي لا يموت،
بيده الخير وإليه المصير، وهو على كل شيء قدير.لا إله إلا الله
إقراراً بربوبيته،سبحان الله خضوعاً لعظمته،اللهمَّ يا نور
السماوات والأرض، يا عماد السماوات الأرض، يا جبار السماوات والأرض، يا
ديان السماوات والأرض، يا وارث السماوات والأرض،
يا مالك السماوات والأرض، يا عظيم السماوات والأرض، يا عالم السماوات والأرض، يا
قيوم السماوات والأرض، يا رحمن الدنيا ورحيم الآخرة اللهمَّ إني أسألك، أن
لك الحمد، لا إله إلا أنت الحنان المنان،
بديع السماوات والأرض، ذو الجلال والإكرام، برحمتك يا أرحم
الراحمين بسم الله أصبحنا وأمسينا، أشهد أن لا إله إلا الله وأن
محمد رسول الله، وأن الجنة حق، والنار حق، وأن الساعة آتية لا ريب
فيها، وأن الله يبعث من في القبور.الحمد لله الذي لا يُرجى إلا
فضله، ولا رازق غيره الله أكبر ليس كمثله شيء في الأرض ولا في
السماء وهو السميع البصير اللهمَّ إني أسألك في صلاتي ودعائي بركة
تُطهر بها قلبي، وتكشف بها كربي، وتغفر بها ذنبي، وتُصلح بها أمري،
وتُغني بها فقري، وتُذهب بها شري، وتكشف بها همي وغمي، وتشفي بها
سقمي، وتقضي بها ديني، وتجلو بها حزني، وتجمع بها شملي، وتُبيّض
بها وجهي يا أرحم الراحمين اللهمَّ إليك مددتُ يدي، وفيما عندك
عظمت رغبتي، فأقبل توبتي، وأرحم ضعف قوتي، وأغفر خطيئتي، وأقبل
معذرتي، وأجعل لي من كل خير نصيباً، وإلى كل خير سبيلاً برحمتك يا
أرحم الراحمين اللهمَّ لا هاديَ لمن أضللت، ولا معطيَ لما منعت،
ولا مانع لما أعطيت، ولا باسط لما قبضت، ولا مقدم لما أخرت، ولا
مؤخر لما قدمت.اللهمّ َ أنت الحليم فلا تعجل، وأنت الجواد فلا تبخل،
وأنت العزيز فلا تذل، وأنت المنيع فلا تُرام، وأنت المجير فلا
تُضام ، وأنت على كل شيء قدير اللهمَّ لا تحرم سعة رحمتك، وسبوغ
نعمتك، وشمول عافيتك، وجزيل عطائك، ولا تمنع
عني مواهبك لسوء ما
عندي، ولا تُجازني بقبيح عملي، ولا تصرف وجهك الكريم عني برحمتك يا
أرحم الراحمين اللهمَّ لا تحرمني وأنا أدعوك... ولا تخيبني وأنا
أرجوك اللهمَّ إني أسألك يا فارج الهم، ويا كاشف الغم، يا مجيب
دعوة المضطرين، يا رحمن الدنيا، يا رحيم الآخرة، أرحمني برحمتك اللهمَّ لكَ
أسلمتُ، وبكَ آمنتُ، وعليكَ توكلتُ، وبكَ خاصمتُ وإليكَ
حاكمتُ، فاغفر لي ما قدمتُ وما أخرتُ، وما أسررتُ وما أعلنتُ،
وأنتَ المقدم وأنتَ المؤخر. لا إله إلا أنت الأول والأخر والظاهر
والباطن، عليكَ توكلتُ، وأنتَ رب العرش العظيم اللهمَّ آتِ نفسي
تقواها، وزكها يا خير من زكاها، أنت وليها ومولاها يا رب
العالمين اللهمَّ إني أسألك مسألة البائس الفقير ـ وأدعوك دعاء
المفتقر الذليل، لا تجعلني بدعائك ربي شقياً، وكن بي رؤفاً رحيماً
يا خير المئولين، يا أكرم المعطين، يا رب العالمين اللهمَّ رب
جبريل وميكائيل واسرافيل وعزرائيل، اعصمني من فتن الدنيا ووفقني
لما تُحب وترضى، وثبتني بالقول الثابت في الحياة الدنيا وفي الآخرة
ـ ولا تضلني بعد أن هديتني وكن لي عوناً ومعيناً، وحافظاً و
ناصراً. آمين يا رب العالمين اللهمَّ أستر عورتي وأقبل عثرتي،
وأحفظني من بين يديَّ ومن خلفي، وعن يميني وعن شمالي، ومن فوقي ومن
تحتي، ولا تجعلني من الغافلين اللهمَّ إني أسألكَ الصبر عند
القضاء، ومنازل الشهداء، وعيش السعداء، والنصر على الأعداء،
ومرافقة الأنبياء، يا رب العالمين.
آمين يا أرحم الراحمين

تغيير

2009-01-11T21:29:00.004+02:00

بعد رحيل 2007 كلمتكم ان في حاجات كتير حصلت فيها زي اني كسبت ناس وخسرت ناس والكلام ده وبعد رحيل 2008 كلمت نفسي برضو عن اللي حصل فيها
بس المشكله ان الواحد المفروض انه مايقولش ايه اللي (حصل) السنه اللي فاتت أد ماهو المهم يقول لنفسه ايه اللي ((هيحصل)) السنه اللي جايه أو الحاليه
مع بداية 2009 حصلت حاجات كويسه جوايا يعني... والحاجات دي خلتني أغير فيا أنا حاجات جوايا برضو
جميل جداً انك تتغير وخصوصاً لو كان التغيير ده للأحسن... وجميل أوي انك تحدد بالظبط ايه اللي ممكن تغيره فيك علشان تقدر تتغير للأحسن
موضوع المميزات والعيوب ده كله نسبي واللي ممكن تشوفه ميزه فيك أو عيب غيرك ممكن يشوفه عيب فيك أو ميزه:)
والأحسن ان الواحد يتغير علشان نفسه مش علشان حد لأنه لو اتغير علشان حد معين التغير ده مش هيبقى سليم 100% وممكن ببساطه يرجع تاني للي كان عليه أو أسوأ
في مقال قريته لإيهاب ماجد --مدرب ومساعد دكتور ابراهيم الفقي اللي طبعاً غني عن التعريف-- (هما الحقيقه مقالين مش واحد) المهم انه كان بيتكلم عن أسباب التغيير وأنواعه وأسراره كان بيقول باختصار يعني
ان التغيير لازم يبدأ من الداخل للخارج( يعني ماتفضلش تنتقد في الناس وتقول انهم لازم يتغيروا وابدأ بنفسك الأول وتغيريك ده هيأثر عليهم) في ناس بتتغير اجباري بعد حادثه معينه زي اللي بيبطل السجاير علشان حصلت له حادثه شنيعه يعني وفي اللي بيتغير بمزاجه يعني اتغيير اختياري بس علشان الواحد يتغير باختياره لازم يدرك كويس أوي ان فيه حاجه غلط لازم تتغير حاجه بتأثر عليه بأي صوره من الصور
كل شيء بيخضع للتغيير الا التغيير نفسه أو بمعنى أخر كل شيء متغير والشيء الواحد الثابت هو التغيير... حتى خلايا الجسم بتتغير كل 11 شهر
التغيير متعه وشيء ضروري لاستمرارية الانسان يعني لو الواحد فضل ياكل نفس الأكل كل يوم ويلبس نفس اللبس ويقابل نفس الناس!!!!!!! تبقى حياته عامله ازاي
ده كان ملخص المقال :)
التغيير لازم يبقى موجود على الأقل علشان توصل لهدفك... لو فضلت طول حياتك ماشي على نفس الخط ونفس العادات وكل حاجه بتعملها مش بتفرق ف أي حاجه عن اليوم اللي قبله يبقى طعم حياتك ايه؟؟؟؟ ممله أكيد
وأكيد علشان تحب نفسك لازم تغيرها... غيرها حسب احتياجاتك بس للأحسن واللي الدين والأخلاق يتفقوا عليه ان ده هو الأحسن يعني مش تغير نفسك من انسان صادق لانسان كداب وتقول علشان أعرف أعيش ومصالحي تمشي أكيد ده غلط وممكن تهد كل اللي بتعمله بغلطه زي دي
أعرف واحد من الناس اللي بحترمهم جداً بيكتب ورق فيها عيوبه وبيبدأ يغير في العيوب دي مش هقدر أقول بيوصل لدرجة الكمال .. الكمال لله وحده طبعاً
لكن بيحاول يتغير وبينجح ف ده وبيعمل لنفسه خطه للتغيير ولما بيغير حاجه فيه بيشطب عليها ف الورق ده
مش لازم يكون عيب خطير زي الكدب والكلام الجامد ده ..لأ ممكن يكون العيوب دي مثلاً العصبيه، الصوت العالي، مش مركز... وبعد كده شوف انت ممكن تعمل ايه وغيره
لو كتبت العيوب دي وفضلت كل يوم تقرأها وتكره نفسك يبقى انت كده بتضر نفسك مش بتنفعها وبتديها اشارات سلبيه توقفك عن أي حاجه ممكن تعملها
على فكره الكلام ده لو كنت كتبته قبل 1 يناير كنت هقول على نفسي كدابه كبيره أوي لكن دلوقتي بكتبه وأنا متأكده من اللي بقوله
لو كل واحد وقف قدام نفسه وقفه بجد وبدأ يعرف ايه اللي عايز يغيره ف نفسه أكيد هينجح ف التغيير
ممكن تسمح لحد انت واثق فيه جداً يساعدك على التغيير بس مايكونش التغيير ده علشانه بس المهم دور كويس عن اللي ممكن يساعدك ويكون الانسان الصح مش الغلط
على فكره البوست ده كان نفسي أكتبه من يوم 1/1/2009 لكن كنت بأجله واللي خلاني أكتبه النهارده لما قريت الكلام ده واستفزني أكتر اني أكتب البوست ده
كلام اللي كتبه الباشمهندس رامي
ومن أول يناير هكون انسان جديد اللي كتبته سلوى على كلام البنات أو همسات :)

عام جديد

2008-12-31T23:33:00.004+02:00

عام ميلادي وهجري جديد كل سنه وانتم طيبيبن
عندي أمل ان السنه دي تكون أحسن من اللي قبلها
على فكره سنة 2008 و 1429 كانت سنه كويسه جداً بالنسبه ليا وحصلت فيها حاجات كويسه وحلوه كتير الحمد لله
وان شاء الله السنه دي تبقى أحسن من كل السنين يارب
علينا كلنا قولوا آميييين

لا تعليق

2008-12-15T23:07:00.001+02:00

حتى الآن وصل سعر الحذاء إلى 75 مليون دولار... ده بجد مش هزار
ولكن جاري البحث عنه
أصله مقاس 44 فلازم يكون غالي يعني

عيد مبارك

2008-12-08T02:34:00.002+02:00

كل سنه وانتم طيبين
الحقيقه الواحد زعلان على الخروف بتاع المعلم حمبله
بس ده كده ماينفعش تاني مره يتسرق من عيلة سيشوار يعني مره سيد ومره ابن أخته أشرف دوت كوم أنا لو منه أخد حقي بصراحه

كلمات

2008-12-03T01:54:00.005+02:00

الميل ده جالي من فتره وأنا بقلب كده في الميل قولت اجيبه هنا بس ما جبتوش كله

المتفائل

رجل يسقط من أعلى برج ويقول في منتصف الطريق أنا لم أصب بعد ..

*****************

المتشائم

شخص يرى أن التاء حرف في كلمة الموت دون أن يربطها لتكون آخر حرف من كلمه حياة ..

*****************

الخ ..

علامة توحي للآخرين بأنك تعرف ما قلت ..

*****************

الخبرة

هي عدد من الأخطاء التي ارتكبتها في حياتك السابقة ..

*****************

الدبلوماسي

شخص يطلب منك الذهاب إلى الجحيم بطريقة تجعلك تستعجل تلك الرحلة ..

*****************

المدير

رجل يأتي متأخراً عندما تكون باكراً ويأتي باكراً عندما تكون متأخراً ..

*****************

التاريخ

مجموعه من الأكاذيب ما كان يمكن أن يكون لها وجود لو كان الموتى يتكلمون ..

*****************

الإنسـان

كائن ترابي .. من التراب خرج .. وعلى التراب عاش .. ومع التراب تعامل .. والى التراب يعود ..

*****************

الناس

معادن تصدأ بالملل .. وتتمدد بالأمل .. وتنكمش بالألم ..

*****************

طيب أنا عايزه أعلق بقى على كذا حاجه من دول .. الدبلوماسي ممكن يكون كده فعلاً بس لما هو كده هل أنا فعلاً دبلوماسيه ولا لأ ؟؟؟؟ ماهو لو كده يبقى أنا مش دبلوماسيه خالص على فكره يا ناس ياللي بتقولولي كده
التاريخ بقى أنا مع المقوله دي 10000000% بصراحه طول عمري بكرهه التاريخ وبما ان التاريخ جغرافيا متحركه والجغرافيا تاريخ ثابت فأنا بكره الاتنين جداً بس كرهي للجغرافيا لأسباب تانيه مش كده بس ...المهم اني بكرهه التاريخ ليه بقـــــــــــــى؟؟ علشان فعلاً هو أكذوبه أغلب المعلومات بتكون وجهات نظر من أشخاص ممكن يكونوا عاصروا الأشخاص التاريخيه دي... ووجهات نظر لأن كل واحد بيحكي الموقف من وجهة نظره وبيتناول الشخصيه من وجهة نظره حتى ولو كان حيادي ... اللي أعرفه ان الكلام لما بينتقل من شخص لشخص بيقفقد نسبه من المصداقيه اومال بقى التاريخ :)
لأ لأ حقيقي مادام الشخصيه التاريخيه مالهاش مذكرات كتبتها بايديها يبقى شكراً مهما كان اللي بيتكلم عن الشخصيه مش هصدقه بصراحه ... على فكره يمكن الكلام يؤخذ عليا وكل حاجه بس حقيقي ماقريتش كلمه ف التاريخ وصدقتها 100% ايه اللي يثبت ؟؟؟؟ هاتلي اثبات وانا أصدق
ممكن كلامي يكون بدافع برضه اني عقلي مش بيستوعب الحاجه اللي مش ليها اثبات و الأكيد اني مابحبش التاريخ ولا الجغرافيا مش بحبهم يعني بجد بكرههم ولما حتى بتفرج على حاجه تاريخيه بشوفها من ناحية اني بشوف شخصيه وخلاص غير اللي بتتجسد يعني
ومن الأخر

التاريخ

مجموعه من الأكاذيب ما كان يمكن أن يكون لها وجود لو كان الموتى يتكلمون

وصبرنا يارب

2008-11-09T21:40:00.007+02:00

صابرين وعبير صبري وربنا يصبرني
الناس دي بتستعبط ولا عبيطه ولا بتستعبطنا
أنا مش هتكلم عن عبير صبري وقلعها للحجاب مرتين وياريتها لما تقلعه تلبس عدل لأ بالعكس ماعلينا دي زي مابيقولوا كده مافيش منها فايده وكده ولا كده هي قلعت الحجاب وخلاص حددت موقفها ... مش هقول على أيام ما كانت بتيجي في قناة اقرأ
ولا هقول على وقفة عمرو أديب جنبها وشكرها ليه لما قلعت الحجاب ووقف ف صفها من الهجوم عليها
نيجي بقى لحرقة الدم الكبرى صابرين
صابرين اللي كانت بتيجي في برنامج عم يتسألون وكان ناقص يركبولها جناحين من كتر برأة الملايكه
صابرين اللي كانت زي غيرها من الممثلات اللي لما تتحجب يعتبروها شيخه ولا حتى مصلحه اجتماعيه
صابرين اللي كانت الدكتوره عبله الكحلاوي بتشكر فيها جداً جداً جداً
نرجع كده من الأول خاااااالص من قبل رمضان ده .... كنت بقلب في التليفزيون قبل ما أنام ولاقيت وأنا بقلب المستفذه بوسي شلبي في كواليس مسلسل عرفت بعد كده ان اسمه "الفنار" ولاقيت صابرين من غير حجاب .... أنا مش هعرف أوصفلكم شكلي بصراحه أنا تنحــــــــت وسبت القناه علشان أشوف ده بجد ولا بطارية عيني خلصت أخر الليل وبتجيب أي كلام ... وبعدين حسيت انها باروكه وكنت مستنيه المستفذه تسألها ايه ده ماسألتهاش قلت أستني يمكن دي حلقه قديمه ولا حاجه... في رمضان برضه بالصدفه لاقيتها طالعه بنفس المنظر في مسلسل واضح انه جديد شفت لقطه بتتخانق مع راجل ويضربها ويخنقها ... استغربت
بعد كده لاقيت كاركاتير عليها على النت بنفس المنظر واتأكدت انها باروكه
امبارح بقى جابها الممل معتز الدمرداش اللتيييييف الزرييييف وسألها وردها حرق دمي بصراحه
قالها ازاي موضوع الباروكه ده:: قالتله انا مش هقدر أخدع المشاهد أنا انسانه أهو محجبه وأي محجبه بتقعد ف بيتها مع زوجها من غير حجاب !!!!!! ازاي أخدع المشاهد وفي المسلسل اقعد في بيتي بالحجاب !!!!!!!!!!!!!!!
ياســـــــــــــــــــــــــــلام ايه الجمال والأخلاق دي مش عايزه تخدعنا
قالها فيما معناه ليه تمثيلي أصلاً : قالتله فيما معناه برضه بعمل حاجه ارضي بيها نفسي
يا ماشاء الله
بعد كده بقى كل واحده تلبس باروكه وتقول ان ده مش شعرها ياسلام ياسلام
فضل يسألها في أسئله من نوع ايه رأيك في المحجبات اللي بيعملوا شعرهم عند كوافير راجل والأسئله دي لحد ما قالتله أنا مش شيخه أنا صابرين الممثله
ولما هو كده بتعملوا فيها شيوخ ف الأول ليــــــــــه
وكانت لابسه بادي كارينا بيلمع ولونه دهبي وفوقه بتاع عبيط كده ...والحجاب ...الاسبانيش أحسن منه شويه ...وبنطلون ومكياج كامل... ودلوقتي وأنا بدور اكتشفت ان لبسها بقى كارينا وحجاب سبانيش
أيوااااااان صابرين
نفسي بس أفهم الناس دي ايه بقى يعني .... مش هيبطلوا يضحكوا علينا ولا ايه مش هقول يحترمونا شويه بس يحترموا نفسهم ويحترموا ربنا قبل أي حاجه
بس خلاص .... أنا خلصت كلامي ... وربنا يهدي الجميع

اوعى تغير دمك

2008-11-03T20:07:00.004+02:00

السلام عليكم ورحمة الله وبركاته

بعد طول غياب لدرجة اني مش عارفه أوشي ودي فنكم مين ولا حتى أودي وشي منكم فين

قررت ان أكسر الحاجز النفسي بيني وبين المدونه واني أكتب تاني خصوصاً بعد الاشاعات اللي قالت اني اعتزلت التدوين والقاهره اليوم والبيت بيتك أذاعوا الخبر لأهميته القصوى

وعمرو أديب ومحمود سعد اعترضوا بشده

طبعاً يا جماعه انتوا مش مقدرين يعني ايه خبر يقول ان Rehab M.K. (:P برضه) تسيب المدونه

فقولت لازم أرد بقى

المهم اني جيت يعني

كنت عايزه أتكلم عن برامج المسابقات الفذيعه الشنيعه اللي بتتعرض على التليفزيون

على سبيل المثال : قناه زي Melody Trix , Strike (غالباً دي أسمائهم) وحاجات كده كتير مش فاكراها

في قنوات مخصوصه للمسابقات دي

بس نصيحه اللي عنده الضغط أو لو حتى عصبي شويه يبعد عن المسابقات دي لما تحمله من غباء وحرقة دم وهبل بالعبط

أعتقد ان اختبار المذيعين والمذيعات بيتم على قياس درجة الهبل

والله يا جماعه أنا مش بحب أشتم حد كده خصوصاً على الملأ بس كده كتير بجد

هقولكم حاجات من اللي سمعتها بغض النظر عن الاغاني اللي شغاله والمذيعين اللي بيتنططوا طول البرنامج ولا ماعرفش ده عادي ولا ايه المهم مثلاً جايبين أرقام من 1 لحد 12 ورقم 8 ناقص ويقولك فين الرقم الناقص وتعد تعد وتيجي لحد 7 تقول ها يا جماعه 7 ايوه 8 9 وتكمل ل 12 والمصيبه مش ف البرنامج أكتر من اللي بيتصلوا ويجاوبوا دول اللي بجد يجيبوا شلل

وحاجات تانيه زي أمثال كلامها بعيد عن بعضه ويقولك جمع المثل وهو بيقولوا والناس سبحااااااان الله ع اللي بيتصلوا دول

اللي جامده بقى بجد يعني فزوره بتقول أخت خالك ومش خالتك تبقى ميين ... واحد اتصل بيها وقالها عمتي :( يانهار أبيض دي ماجابتش سيرة عيلة الأب خالص ده أنا لو قلتها لعيل صغير هيفهمها

واللي تجبلك صورة فيلم جعلتني مجرماً وتقولك ها يا جماعه اسم الفيلم جعلتني ايه قصدي..ايه مجرماً

وصورة فيلم مرجان أحمد مرجان... ها يا جماعه الفيلم كان اسمه مرجان حاجه مرجان ها اسمه مرجان أحمد ايه

يعني حتى لو ماحدش بيعرف الافلام دي هيجمع اسمه على طول مش محتاجه حتى تشغيل مخ

يانهاري على الشلل

وغيرهــــــــــــــــــــــــــــــــــــــــــــــا من الحاجات اللي بتقعد اسبوع من غير ما حد يحلها صح :(

الناس دي ايه .... منيين وليه وازاي .... لو الكلام ده بجد والناس اللي بترد دول بجد يبقوا بجد بقى مش عارفه أقول ايه ... تحس انه غباء واضح وصريح غباء بخيره كده مافيهوش لؤم ولا خبث ربنا اداهم الغباء يوزعوا على خلق الله طمعوا فيه كله .... والله أنا مش متخيله ان في ناس هبله كده ولا غبيه كده .... أكيــــــــــــــــــــــــــــــــــــد ده تمثيل

ومن جمهورية الغباء المتحده نحييكم وندعوكم لزيارة قنواتنا المتخصصه لزيادة نسبة الغباء والهبل

بس اوعى ..... مايتحرقش دمك

بس الأكيد انها مؤامره على عقولنا

ملحوظه ::: أنا مش بتفرج عليها بس لما حد بيحول ويعدي عليها كده صدفه وهو بيحول بشوف الحاجات دي لأني أصلاً بكرهه التليفزيون... يعني ماحدش يقولي غيري القناه وماتتفرجيش كده كده مش بتفرج:)

رمضان لسه كريم

2008-09-11T21:33:00.006+02:00

كل سنه وانتم طيبين
كل سنه بتيجي بتفرحنا وبتدخل في قلوبنا فرحه غريبه يا رمضان غير اي شهر تاني غيرك ... صيامك ده متعه يمكن أنا كمان علشان مش بحب الأكل متعتي بتكون كبيره شويه
بس افتقدنا جزء من بهجتك .. يمكن علشان الزمن اتغير ويمكن علشان كبرنا والدنيا اتغيرت من حوالينا
وفي حاجات كتير بتحصل فيك .... الناس كمان مش صادقه مع نفسها .... رمضان أه ليه هيبته وفرحته لكن مش معنى كده اننا نفتكر ان اللي حرام في رمضان مش حرام في باقي السنه
يعني ايه واحده تتحجب في رمضان بل قبل الفطار فقط وبعد الفطار ترجع مش محجبه... بكل المقاييس ده يعتبر نفاق بس نفاق مع ميين مع نفسها ولا مع ربنا ... لو شايفه انه حرام يبقى حرام على طول بقى
شيء جميل برضه ان الولحد يزيد من قرأة القرأن بس مايقطعهاش بعد الشهر ما يخلص
هو رب رمضان غير رب السنه كلها ولا ايه
رغم انك رمضان يا رمضان والدنيا بتكون حلوه والله ولذيذه وكله خير والناس بتمتنع عن حاجات كتيره وبتزودها في حجات كتيره برضه
يعني الخناقات بتزيد خصوصاً للناس اللي بتشرب سجاير طبعاً هما عارفين السيجاره بتتحكم فيهم ازاي وقت الصيام ... بيكونوا مستنيين كلمه علشان يتخانقوا وساعتها بقى الالفاظ الجميله تظهر والصيام يضيع... بجد الله يكون في عونكم مش بتقدروا تتحكموا في نفسكم علشان السيجاره هي اللي بتتحكم فيكم وبتعمل فيكم كده ... اللي خلاك تبطلها 12 ساعه استحمل كمان 12 ساعه منهم 8 ساعات نوم وهتتعود على كده
المواصلات وما ادراك ما المواصلات ... اكيد عارفينها خصوصاً قبل الفطار بساعتين لحد الفطار الله عليكي يا مواصلات مصر
كميات الأكل الرهيبه اللي الناس بتشتريها ... الناس بتاكل بعنيها ... بيشتروا الأكل وهما صايمين وطبعاً بيتخيلوا انهم هايكلوا خروف وبط وفراخ وحمام غير الحلويات ... وكلأن الناس بتكون في مجاعه طول الشهر
والأكل بقى غالي أوي ... في ناس مش عارفه تاكل طول السنه.. بس الحمد لله ربنا بيكرمهم في رمضان
ومش عايزه كمان أقول المسلسلات ... الحمد لله اني مش بحب التليفزيون أوي يعني... في ناس بتعمل جدول للمسلسلات دي كلها علشان تعرف تتابع أيوه طبعاً أومال ايه
رغم الغلاء والعناء ورغم ان حديث الشعراوي اللي كان بيجي قبل الفطار على طول وبعديه القران وبعديه الاذان بطل يجيي ... رغم كل ده بس ... رمضان لسه كريم وكل سنه وانتم طيبين وبخير يارب... وعساكم من عواده :)
ومش عايزه أطول عليكم بصراحه
ملحوظه بس:: أنا برضه من بيت مصري وعايشه في مصر

كتب ولم يراجع

شهر 8

2008-08-21T22:29:00.004+03:00

كل سنه وانتم طيبين بمناسبة شهر رمضان

عفواً يا جماعه واضح فعلاً ان شهر 8 معايا مش كويس ودايماً بتحصل فيه حاجات بالسنه كلها
عذراً شهر 8 ... 3 موضوعات فقط
نلتقي ان شاء الله بعد ما الشهر ده يخلص
رغم تجهيز الموضوعات بس قدر الله وماشاء فعل :)

مأساة ال FW

2008-08-15T19:44:00.004+03:00

في ميل جالي كذا مره من كذا حد طبعاً عن طريق ال
Forward
بس بجد بجد بجد حاجه محزنه جداً ... الميل هو 3 لينكات على اليوتيوب اللينكات دي مسيئه جداً جداً جداً جداً للدين الاسلامي والقرآن الكريم والرسول عليه أفضل الصلاة والسلام والجنه وكل حاجه أصلاً والميل بيقول طريقه لمسح اللينكات والفيديوهات دي بخطوات معينه...
المشكله اني مش من أنصار اني ابعت الميل ده و أنشره فدخلت تأكدت من اللينكات وفعلاً لاقيتها مسيئه جداً وغيبت عقلي وقررت اني ابعتها لكن في ناس قالولي لأ بلاش علشان الكلام ده بيكون هدفه الأول والرئيسي انتشار الحاجات دي وده برضه كان رأيي لما اتكلمت معاكم في
موضوع
Message Offline
بصراحه ساعتها احترت خصوصاً لما لاقيت ان اللينك التالت اتشال من اليوتيوب حسيت ان فيه نتيجه بس المشكله الأكبر لو اللينكات دي انتشرت من غير نتيجه خصوصاً ان عدد الزيارات لباقي اللينكات التانيين وصلت ل 130 ألف من غير نتيجه يعني حوالي 130 ألف واحد بيشوفوا الفيديو غير كم التعليقات اللي منها سب ومنها حسبي الله ونعم الوكيل ودعاء على اللي رفع الفيديو وعملوا
بصراحه أنا كتبت البوست ده علشان أخد رأيكم أبعت ولا لأ
بس دلوقتي بقول ان عند موقفي ومش هبعت الميل لحد
بس في حاجه مهمه أخيره بقى .... اللي يلاقي فيديو مسيء للاسلام أو مش كويس يعمل الحاجات اللي جايه دي
اختر
Flag
- Select a Reason -
وعند الضغط عليها سوف تجد مجموعه من الخيارات اختر الخيار التالي:
Hateful or abusive
سوف يظهر لك خيارين اختر الخيار التالي:
Promotes hatred or violence
ثم عليك باختيار كلمة religion
ومن ثم تقوم بالضغط على المربع المكتوب فيه :
Flag this Video

أنا جييييت

2008-08-10T23:26:00.014+03:00

جيت منين ماحدش يسألني
أنا لسه ماجتش لنفسي بس قلت أزور نفسي كده يمكن تكون محتاجه حاجه
عارفه اني تقلت ورخمت وغبت عليكم بس معلش :$ سامحوني ... لحد دلوقتي نفسي مسدوده بطريقه مش ممكنه عن الكتابه هنا زي ماهي مسدوده عن الشغل والتفكير
مابين سدة النفس والسفر والانشغال --على اساس اني مهمه بقى:$-- ماكتبتش حاجه
بس كتبت لسبب يكاد يكون مش منطقي وهو ان ده شهر 8 اللي السنه اللي فاتت برضه ماكتبتش فيه ولا كلمه هنا وعيب أوي لما البلوج مايبقاش فيه كلمة
أو أغسطس August
خفت لا الشهر ده ياخد مني موقف ولا حاجه مش عارفه ماله الشهر ده معايا ... بس اكيد مالوش علاقه بانه عيد ميلاد سوووو ولا بانه شهر أغطسطس
أنا مانكرش ان عندي شوية كلام كتير عايزه أقوله بس كل الكلام بيتبخر لما بفكر اني أفتح البلوج وأكتب فيه
من كتر مانا مابقتش عارفه فيا ايه ... قربت أغني الأغنيه الشهيره للمطرب المشهور السوبر ستار :(:( أغنية أنا مش عارفني
أقولكم على حاجه ... علشان أصالح بيها شهر 8 وأصالحكم طبعاً :$... ان شاء الله هنزل بوست قريب جداً تاني وبكده يبقى نزلت 2 بوست ف شهر 8 وما أدراك رقم 2 بالنسبه لي يا شهر 8 ... واحتمال كمان يبقى فيه التاج بتاع هوندا أحسن أتضرب ولا حاجه وكده يبقوا 3 بساتيت أو بوستات 3 مواضيع يعني أو موضوعات وساعتها مش هرضي أزعل شهر 8 وأكتب فيه رقم فردي يووووووه يبقى الحكايه فيها بوست رابع بقى وتبقى حكايه ... يظهر الشهر ده جاي عليا بخساره
صدقوني بجد بجد أنا كنت ناويه أكتب البوست النهارده ... بس لاقيتني ماكتبتوش ورغيت كتير ....قولت اأجله علشان كده أنا رغيت كتيير وماينفعش أول لما أرجع كده أزهأكم برغيي ... نخلي البوست ده بس علشان تسامحوني بيه
سماح مش كده :) ... وماحدش يقولي سماح مين
وبجد بجد بجد شكراً أوي جداً خالص كتييييييير لكل اللي سألوا عليا وقلقوا عليا ... وشكر خاص جداً جداً للجميله جداً خالص فاتيما أم يوسف اللي بجد بحس انها أختي الكبيره رغم اني ماعرفهاش الا من قريب خالص
ولكل كل كل الناس اللي حسوا بغيابي وسألوا عليا

مش عارفه الصوره دي حاطاها ليه بس اقبلوها مني :)
أشوفكم بعد فتره قصيره ان شاء الله ان شاء الله ان شاء الله
استنوا هنا .....طيب لما انتوا بقى مستنين البوست كده ومسامحني على غيابي --أكيد يعني :$:$ ماأنا أختكم القصيره .. قصدي الصغيره ومايرضكمش تزعلوا مني -- فين بقى منك ليه ليها له اللاب توب ؟؟؟؟

HaPpY Birthday

2008-07-14T01:00:00.004+03:00

كل سنه وأنا طيبه

أنا ماكنتش ناويه أكتب حاجه دلوقتي بس ماحبتش أفوت مناسبه عظيمه زي دي
عيد ميلادي ... عارفين لو ماكنش ال 22 و يوم الاتنين ماكنتش جيت كتبت حاجه بجد خــــالص دلوقتي ...أصل أنا بعــــــــــــشــــــــــق رقم 2 ودول 22 وبحب أوييييييي ان عيد ميلادي يبقى يوم الاتنين علشان بعشق يوم الاتنين أوي جداً برضه
المهم للسنه التانيه على التوازي بقولكم كل سنه وأنا طيبه كل سنه وأنا طــيــبـــه مش معقول يعني عيب أوي كده كل مره أنا اللي أطلبها بنفسي قولنا لاب توب لاب تــــــــــــــــوب مش طالبه حاجه جامده ... ده لاب توب يعني ... خساره فيا كام ألف ولا ايه ؟؟؟ ده ايه الناس دي ياربي... ده أنا حتى جبت تورته شكلها والله يفتح النفس ياللا بالهنا والشفا

السنه اللي فاتت ماحدش عبرني وجابلي لاب توب بس بصرحه عملوا معايا أحلى واجب ... اصحابي من الكلية وكده .. من رسايل موبايل ومكالمات تليفونيه وفيس بوك وكروت اونلاين ... مانا قولتلكم ساعتها؛ حتى مستر عمرو والله .. لما نشوف السنه دي ايه اللي هيحصل... لما نشوف مين هيجيب اللاب توب والله مش عايزه حاجه خــــــالـــــــــص غيره ... ده أنا حتى طيبه أهو

باقي الهدايا بقى مش عايزاها يالا عفونا عنكم

تحديث بصراحه حصل اللي ماكنتش متوقعاه خالص ... هدايا وفيس بوك ورسايل موبايل من ناس بجد عزيزه عليا أويييييي .... بس برضه ماحدش جبلي لاب توب :( والصوره دي من ضمن الهدايا اللي جاتلي ... تصميم زمايلي ..بجد قاموا معايا بالواجب... باللون الليلاه زي مانتوا شايفين كده :))
وكمان مستر عمرو قاللي على الفيس بوك ... راجل ذوق والله ربنا يكرمه ( اللي مش عارف مستر عمرو يرجع للبوستات القديمه أنا مش لسه هشرح :P

المهم كنت عايزه أشكر الناس اللي كتبت تعليق في البوست اللي فات خصوصاً سوووو و شاهي وغمض عينيك وكل كل الناس اللي علقت ... أنا زي القرده أهو كويسه ماجراليش حاجه الحمد لله :) بس كنت ببعد شويه لظروف ما كده نفسيه شويه ولولا الحدث الفظيع ده ماكونتش جيت :) بجد شكراً كتييييييير

كلام

2008-06-29T19:36:00.009+03:00

when life gives you a hundred reasons to cry.... show life that you have a thousand reasons to SMILE :)

الكلمه دي قريتها وعجبتني قلت أجبهالكم:)ا

ياريتني ما عرفتك... كلمه ممكن تتقال لحد بتكرهه أويييي علشان كل ماتشوف وشه تضايق ودمك يتحرق ... أو ممكن تقولها لحد جرحك ....

وممكن كمان تقولها لحد بتحبه أوي علشان مش قادر تبعد عنه ومش متخيل حياتك من غيره وخايف لو بعد عنك يجرى لك حاجه.... مش متخيل أصلاً شكل حياتك ايه من غيره ... ورافض أصلاً فكرة البعد عنه

ما استحق أن يولد من عاش لنفسه فقط .... كلمه كنا بنسمعها كتييير وماحدش بيعمل بيها ...اللي شايفاه ان كل واحد عايش لنفسه بس .. مش مهم مين عايش معاه
في كلام مشابهه للمقوله دي زي مثلاً أنا ومن بعدي الطوفان و مثل سمعته قبل كده بيقول خراب يا دنيا عمار يا دماغي وياللا نفسي وعيش ندل تموت مستور
اكتشفت ان الأنانيه ف دمنا حتى على نفسنا ... احنا ليه بنبكي ونزعل لو حد بنحبه توفى .... مش علشان الحد ده لأ ده علشان نفسنا برضه علشان حياتنا من غيره هتبقى وحشه حياتنا احنا ونفسنا احنا مش هو

حاجه أخيره بقى :) سامحوني لو غبت عليكم شويه الأيااااااااااام اللي جايه
غيابي لأسباب كتيره من ضمن الأسباب دي عدم وجودي بصوره مستقره في البيت وعلى النت وسبب كمان مهم أوييي اني بقالي فتره مش بكتب حاجه مفيده ومش عارفه أكتب حاجه أصلاً لما ألاقي حاجه مفيده أو احس اني مش ممله على قلبكم هكتبها :)

تحياتي ليكم كلكم :)ومع السلامه دلوقتي

13-6

تاج الأحلام :)

2008-06-20T20:49:00.010+03:00

قلت أكتب التاج اللي عليا علشان مابقاش مديونه ولا حاجه :) .... التاج المره دي من سلوي (طوق الحرية)

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

1- حلمت اني أبقى دكتوره
الحلم ده فضل معايا لحد ثانيه ثانوي وكنت علمي علوم كمان لحد ماشوفت حادثه بسيطه في المترو من غير حتى ولا دم ولاحاجه انهارت ساعتها وفكرت بعدها قلت ايه الهبل اللي انا فيه ده اومال ازاي كلية الطب بقى والكلام ده ... وحولت علمي رياضه :$ -- بس مش ده السبب الرئيسي أوي يعني لتحويلي علمي رياضه وتغير حياتي --ا

2- حلمت اني اطلع القمر
ولسه بحلم... عارفه انه ممكن يكون مستحيل بنسبة 99% لكن الأمل في ال 1% ... عايزه أشوف ايه النظام فوق يمكن يعجبني ولا حاجه ... بس هاخد الكمبيوتر بتاعي معايا

3-حلمت اني أكون ولد مش بنت :))
علشان حسيت ان الولاد عندهم حرية أكبر ... يالا الحمد لله كنت فاهمه غلط :))

4-حلمت اني أكون صاحبة شركة
ولسه بحلم :) وعامله كمان اسم للشركه... بس أنا مش هحقق الحلم ده .. كده مش عايزه أحققه في حاجات تانيه أهم بس حقيقي لو حطيته ف دماغي ممكن يتحقق

5-نعم ... مش كفايه اربع أحلام ولا ايه

***************

أذكر خمس أحلام على الاقل ..تخص مستقبلك؟؟

1- حلمت اني أسافر ألـــمـــانـــيـــا

ألمانيا البلد مش المحطه --علشان في ناس هتسألني ألمانيا البلد ولا المحطه--... والحلم ده اتعدل وبقى نفسي أسافر اليابان أوييييييييي ... الناس هناك جميله خالص وطولي :$ لأ بجد :)) بلد حلوه أوي جداً بجد

2- عايزه أشتغل حاجه بحبها
زي مثلاً Web Developer
وان شاء الله الحلم ده يتحقق

3-بحلم اني اتجوز حد فاهمني وبيحترمني وياسلام لو كان مبرمج زيي كده
علشان يحس بيا ومايقولش عليا مجنونه :$

4-بحلم بحاجه
الحاجه دي اتمنى انها تحقق .. بس هي حاجه خاصه بيني وبين ربنا بس

5-نفسي ربنا مايحوجنيش لأي حد
***************

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
في أشخاص عارفه نفسها كويس :)

***************

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلاً ..
بجد بجد بجد انسان نفسي كان يبقى موجود لحد دلوقتي وكنت نفسي أروح أشوفه وأقعد معاه واتكلم معاه وأسأله واتعلم منه ... الشيخ الشعرواي الله يرحمه
غير كده الحمد لله :)

***************

تمرير التاج
وانت داخل على ايدك اليمين في لينكات لناس مدونين
FCI and Others
يالا بقى وروني هتحلوا التاج ده ازاي مع اني عارفه ان مافيش حد هيعبرني كالعاده :)ا

wrote on 19-05-2008

للأسف محجبه

2008-06-08T00:01:00.008+03:00

بصوا بقى يا بنات وياولاد صلوا على النبي كده... عليه الصلاة والسلام ... الأول أي كلمه هتتقال مش مقصود بيها أي تعميم

قولولي بقى .... ايه موضوع الحجاب ده ... وايه نظرية البنات في لبسها الغريب العجيب ده ... وايه الالوان الفاقعه والمستفزه دي ... راح فين الذوق يا جماعه
هقولكم عينات من نوعيات مختلفه من البنات
بنت بتبقى ماشيه محجبه --يعني ايه هنا كلمة محجبه يا ولاد؟؟ يعني مغطيه شعرها بــــــس و100 خط تحت شعرها بس دي --.... المهم ..في الشتاء لابسه بوت وعليه جيب وبين الجيب والبوت رجليها باينه .... ايه يا جماعه ماهي مغطيه شعرها مافيهاش حاجه واحتمال وأكيد ان اللي فوق الجيب بادي .... في الصيف بقى نفس البنت المحجبه دي أيوااااان هي هي لابسه بانطلون برمودا أو حاجه كده مالهاش لازمه وفوقها أي حاجه كده مالهاش لازمه برضه... ماهو شعرها متغطي والدنيا حر برضه لازم نراعي الظروف

بنت تانيه بقى... محجبه أيوا أيوا ... لابسه بادي قصير وتحتيه الجيب ذات الوسط الساقط وبين االبادي والجيب انتوا عارفين يا بنات ايه اللي بيتلبس ونسبه كمان من الشباب عارفين ...علشان ظهرها مايبانش ماقولناش حاجه ... مع اني بــكـــرهه المنظر ده أوييي ... وممكن تكون حاطه خليط من البرفانات على شوية جبنه لكن ايه تيجي تسلم عليها يابني تقولك لأ معلش أنا مش بسلم .... يعني هي جات على دي ... طيب ايه حكم اللي انتي لابساه والبرفان ده وحكم السلام معلش يعني... يعني أهلك قالولك ماتسلميش على حد علشان حرام وماقالوش حرام البرفان ولا ايه أفهمها دي .... شوفت نوعيات كتيير كده

بنت تالته بقى... يووووه أيوه محجبه ... لابسه ألوان أعوووووذ بالله ... غالباً بيكون بنفسجي --مش مووف ها-- بــنــفــســجــي على أصفر وغالباً البادي أصفر والبادي اللي فوقيه بقى بنفسجي ... أو أخضر ... أخــــــضــــــر أخضر مش أي كلام يعني على أصفر برضه أو بـــرتـــقـــالي ... كله حاجات فاقعه كده وكلها حاجات من نوع بادي بـــــادي بادي يعني مش أي كلام برضه... والحجاب بيكون في فوق الشعر كده حاجات كده مكلكعه ومن نفس الألوان .... يا نهاري على التلوث البصري يا جدعان ايه ده ... الكارثه ان اللي بتعمل كده سوري يعني مليانه شويه ... برضه مع نوعيات البرفانات .... ولو كلمت واحده تقولك ماهو ماحدش بيشمه غيري مايعرفوش ان بعد فتره هي بتتعود على رائحة نفسها لكن اللي جنبها بيشمه وده حرام ولو أنا غلطانه حد يقولي

غير البنات المحجبات برضه ... اللي بتحب تسيب ظهرها باين عاااااادي وبتكون عارفه ان ظهرها باين

السؤال بقى لـيـــــــــه كل ده ؟؟؟ ....لو كان لفت نظر الشباب بس دي نسبه قليله ..... أنا أعتقد ان الكلام ده أه يلفت نظر الشباب بس بالسلب مش بالايجاب
ياعني مافتكرش ان الشباب بيبصوا للبنات دي نظره كويسه واللي متأكده منه بقى ان مافيش بنت بتبص للبنت دي نظره كويسه خااالص يبقى ليه بقى ؟؟؟؟ لو تفكير غلط مافيش مشكله ان الواحد يغير تفكيره للصح لو أنا اللي غلط أنا بعتذر على البوست كله
راعو ربنا بجد

ملحوظه:: اعتبروني مش أنا المره دي

يارب

2008-05-30T21:34:00.004+03:00

لا إله إلا الله الحليم الكريم، لا إله إلا الله العلي العظيم، لا إله إلا الله رب السموات السبع و رب العرش العظيم

حسبي الله لا إله إلا هو عليه توكلت وهو رب العرش العظيم

لا إله إلا انت سبحانك إني كنت من الظالمين

رضيت بالله رباً وبالإسلام ديناً وبمحمد (صلى الله عليه وسلم) نبياً ورسولاً

اللهم يا مؤنس كل غريب ويا صاحب كل وحيد ويا ملجأ كل خائف ويا كاشف كل كربة أسألك أن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير

هبني اللّهم الصبر والقدرة لأرضى بما ليس منه بد، وهبني اللّهم الشجاعة والقوة لأغير ما تقوى على تغييره يد، وهبني اللهم السداد والحكمة لأميز بين هذا وذاك

اللهم آت نفسي تقواها , وزكّها, أنت خير من زكّاها , أنت وليّهاومولاها ،اللهم إني أعوذ بك من علم لا ينفع, وقلب لا يخشع , ونفس لا تشبع ,وعين لا تدمع ,ودعوة لا يستجاب لها ،اللهم إني أعوذ بك من شر ما عملت , ومن شر ما لم أعمل , وأعوذ بك من شر ما علمت , ومن شر ما لم أعلم اللهم إني أعوذ بك من زوال نعمتك , وتحول عافيتك , وفجاءة نقمتك , وجميع سخطك

اللهم من اعتزّ بك فلن يُذل، ومن اهتدى بك فلن يضِلّ، ومن استكثر بك فلن يقلّ، ومن استقوى بك فلن يضعف، ومن استغنى بك فلن يفتقر، ومن استنصر بك فلن يُخذل، ومن استعان بك فلن يُغلب، ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هُدي إلى صراط مستقيم، اللهم فكن لنا وليّاً ونصيرا، وكن لنا معيناً ومجيرا، إنك كنت بنا بصيرا

!!!!!!!!!!!!!!!؟؟؟؟

2008-05-17T23:41:00.005+03:00

سألت نفسي كتير مارستش يوم على بر ...أنا اللي فيا الخير ولا اللي فيا الشر .. مليان عيوب ولا خالي م الذنوب ولا ايه
كل يوم بسأل نفسي -يمكن كل لحظه- أنا ميين؟؟؟؟ طيبه ولا شريره
اللي اكتشفته اني مش أنا بس اللي بفكر كده ... ومش ناس كتيير برضه بتفكر كده والناس اللي مش بتفكر كده دوول يحمدوا ربنا على كده
من ساعة ماقرأت أفلام وكواليس اللي كان كاتبها عماد --بس للأسف شال البلوج -- وأنا لاقيت ان مش أنا لوحدي اللي بفكر كده وكمان زود التفكير ده عندي
كان كاتب ان الانسان بيحاول يبين قدام نفسه وقدام الناس انه ملاك أو انسان كله خير وحب وطيبه ... لكن كواليس الحاجات دي كلها شر أو كتير منها شر... ممكن يكون تفكيرك من جواك انك تبين للناس انك طيب وتحاول تقنع نفسك انك فعلاً طيب لكن جواك بتقول أنا هبين اني طيب علشان بس يحبوني أو علشان أخد منهم اللي أنا عايزه أو علشان أكسب ثقتهم أو أو أو أو ........ا
لكن انت مين فعلاً ؟؟؟؟ انت الانسان العادي اللي جواه الخير والشر --زي ما طول عمري مقتنعه ان جوه كل واحد فينا نص خير ونص شر-- ولا الانسان اللي بتحاول تقنع نفسك بيه
اتناقشت كمان مع واحد في الموضوع ده وقالي انه بيحاول يبين لنفسه انه وحش وشريير
المشكله ان فعلاً ساعات تبين لنفسك انك انسان أسوأ ما يكون علشان انت بتفكر في الموضوع ده بالطريقه دي ... يجي حد يقولك يا عم انت طيب والله وكويس تقوله في سرك يا عم روووووووووح طيب ميين بس ده انا شخصيه سيئه جداً جداً جداً.... برمجه سلبيه لذاتك وتشتييت وجنان جنان يعني
ويبقى السؤال.............
انت ميين؟؟؟؟
عقلك بيفكر ازاي ... عايز تبان كويس وقلبك من جواه مش صافي ومش كويس ولا انت فعلاً كده وعايش على طبيعتك من غير أي زيف ولا كدب حتى على نفسك
المشكله انك لما تتخدع في حد كنت عايش معاه فتره طويله سنيييين وسنيييييين ... واثق فيه يمكن ثقتك بنفسك... وفجأه ومن غير سابق انذار ولا أي مقدمات تكتشف اذ فجأة انك كنت مخدوع فيه وكأنك اتخبطت على دماغك مره واحده وانت حاسس بالأمان التــــــــام
ده مش هبل منك ولا حاجه ... القضيه مش دي ... المشكله حاجه تانيه خاااااااااااااااالص
لما تكتشف ان ده كداب ودي كدابه وده منافق ودي بتخدعك ويبان ليك منهم كل الحب والطيبه والقلب الطيب الكبير الحنون وبعدين تتفاجيء ان ده كله كان كـــــــــــــــــــــــــدب ... هتحس ان الدنيا زي ماتكون كده اتهدت من حواليك
ساعتها ممكن تتصرف تصرفات كتيره -- على حسب انت طيب ولا شريير-- برضه مش دي القضيه
المشكله انك ممكن تحس انك انت كمان كده... بتخدع نفسك ... بمنطق اذا كان الانسان اللي وثقت فيه وعشت معاه كتيير وكنت شايفه صافي وقلبه أبيض طلع كده.... ايه اللي يمنع ان انا كمان أكون بخدع نفسي
تفكير غريب شويه ... غريب أوي ... بس ده اللي بيحصل فعلاً
ترجع تقول لنفسك -- ده لو انت لسه بعقلك-- هو أنا اتجننت ولا ايه ... أنا ميييين ؟؟ هو أنا طيب ولا مش طيب
تفضل تسأل الناس اللي حواليك .... أنا ميين قولولي ايه عيوبي .. انتوا شايفني ازاي
بس ياترى هتثق في كلامهم ؟؟؟؟؟؟؟؟؟؟؟ ممكن يكونوا بينافقوك أو انت نفسك بتنافقهم وعلشان كده يقولوليك كلام كويس عليك أو ممكن تكون انت بتسألهم علشان تبين لهم انك كويس أو تبين لنفسك كده
صحييح ......... هو أنا اتجننت ولا ايه؟؟؟؟؟؟؟؟؟؟؟؟
بس نرجع نقول.... سيبكوا من الكلام اللي أنا بقولوا ده ... اللي ممكن يعتبر تهييس أو جنان رسمي أو أي حاجه
مافيش أحسن من كلام ربنا
وَنَفْسٍ وَمَا سَوَّاهَا فَأَلْهَمَهَا فُجُورَهَا وَتَقْوَاهَا قَدْ أَفْلَحَ مَنْ زَكَّاهَا وَقَدْ خَابَ مَنْ دَسَّاهَا
صدق الله العظيم

ملحوظه: الكلام ده برضه ممكن يكون أفلام مش كواليس

published on May 26, 2008

تاج

2008-05-01T01:15:00.008+03:00

ياااااااااااه الواحد ليه فتره ما جالوش تاج ويوم ما يجي يبقى واحد صعب أوي كده
لأ حقيقي صعب ... أصعب تاج هحله بصراحه بس تكليف من الباشمهندس أحمد مبارك أعمل ايه بقى
التاج عايز ايه بقى...!!! أقول عشر حاجات عني .... نقول بسم الله الرحمن الرحيم ونبدأ الاجابات بس خدوا نفس عمييييق وسموا انتوا كمان

أولاً: لو حد قالي قولي عشر حاجات عن نفسك مش بعرف:$ ..... لأ بجد مش بعرف أتكلم عن نفسي
ممكن أقول اني مش فاهمه نفسي كويس خالص .. يعني ماتثقوش في اللي هتقروه ده :))

ثانيأً: كتير يعرفوا عني اني رومانسيه ... ممكن زياده عن اللازم ويعرفوا برضه اني متهوره وعصبيه ومندفعه ومجنونه وجريئه وذكيه .... بس الكلام ده فيه منه غلط وأنا مش هقول ايه الصح فيه اعرفوه انتوا بقى وقولولي عليه :)) اللي ماحدش يعرفوا بقى اني دايماً مستعجله أنا نفسي مش عارفه ليه ... بس تقريباً الكمبيوتر علمني كده

ثالثاً: هي دي ثالثاً ولا تاسعاً :$:$:$ أنا مش بعرف أعد ... خلاص من غير ضرب هقول أهو
بحب الهواء وبحب الشوارع الفاضيه الواسعه وبحب البحر وبحب السماء وبحب أجري وبحب الشعر وبحب الكتابه وبحب صوتي الواطي رغم انه عاملي مشاكل :)) وبحب الكمبيوتر والنت والبرمجه والتكنولوجيا ...وكفايه حب بقى

رابعاً: بكره حاجات كتير أوي في البنات ومش بطيق الستااااااااات .... اسمعوني الاول بس :$ .... أكيد مش كلهم ده طبيعي يعني -- التعميم جهل-- اللي مكرهني فيهم طريقتهم وتصرفاتهم وطريقة تفكيرهم .... --أكرر مش كلهم-- بحس فيهم بتاتش هبل على شيء من التفاهه وعدم التضحيه وعدم تقدير قيمة الصداقه ....... وكفايه كده علشان مااتضربش :$ .. وبكرر تاني أنا ليا اصحاب بنات كتييير ومن زمان معايا وبحبهم وبحترمهم وبحترم طريقة تفكيرهم
وبكره فيا أنا حاجات لمجرد كونها متعلقه بالبنات

خامساً: هو مش المفروض برضه ان بعد الاربعه سبعه ولا ايـــــه
مش بزعل بسرعه... يمكن مش بزعل خالص...ولو.. لو.. لو يعني حصل في يوم وزعلت ممكن ارجع تاني في ثواني وكأن لم يكن شيء... والموضوع ده عاملي مشكله مع نفسي .. لأني بدي للي قدامي أعذار كتيييييير وماحدش بيعذرني ... وفي فرق كبير جداً جداً جداً عندي بين الزعل واني أكون مضايقه
لو في حاجه صغيره اضايقت فيها من حد معين لازم أقوله ... قولتولي ليه؟؟ أقولوكوا ليه بقى... او ماعملتش كده وطلعت كل اللي في قلبي الحاجات الصغيره بتتراكم فوق بعض وبتعمل معايا سد منيع بيني وبين اللي مضايقني.... ولما بضايق من حد بيبان على وشي ومعاملتي معاه على طووووول وهو بيعرف اني مضايقه منه

سادساً: :| لسه سادساً .. ياربــيييي
بيقولوا عليه دبلوماسيه ..... مش عارفه ده عيب ولا ميزه بصراحه
بس في نفس الوقت صريحه جداً لدرجه ممكن تضرني
أيوه عادي يعني صريحه بس دبلوماسيه

سابعاً: بحب أقعد مع نفسي .. مش علشان انطوائيه.. بالعكس أنا علاقتي بالناس الحمد لله كويسه والاتصال بيني وبينهم كويس يعني :) لكن بحب أفكر كده مع نفسي و أسرح معاها أويي .. يمكن حتى وأنا مع الناس ممكن أتوه منهم شويه بتفكيري

ثامناً: بفكر كتييييييييييييييييير في كل حاجه وأي حاجه ... مخي شغال على طول يمكن حتى وأنا نايمه ... ودي حاجه متعبه جداً جداً جداً جــــــــــــــــــــــــــداً

تاسعاً: تلقائيه شويه كتير أوي جداً يعني

عاشراً وأخيراً الحمد لله: فيا عيوب كتييييييره أوييييييييييييييييي ... حتى مميزاتي عيوب ... من الأخر كل العشر حاجات دول عيوووووب فيا
في حاجات كتييير في نفسي مش حباها ... ماحدش يسألني ايه الحاجات دي لأني مش قادره أحددها بالظبط

مطلوب مني أتاج خمسه: مممممم مع اني مش بحب أتاج حد علشان ماحدش بيعبرني بس ياللا أمري لله ...
1- أي حد عايز التاج
2-هوندا
3-رئيس جمهورية نفسه
4- رجل المطر
5-خالو أحمد الصباغ

وطبعاً مش هيرجع تاني لأحمد ... طبيعي يعني .. ولا ايه !!!!
ملحوظه:: التعميم جهل ....حقوق الملكيه الفكريه محفوظه لأحمد مبارك:))ا

ليه بقى!!!!ا

2008-04-19T01:24:00.006+02:00

بجد بجد بجد كده كتير بقى
أنا عايزه أفهم هي الناس بقيت عامله كده ليه!! ليه دايماً قرفانين من بعض ومش طايقين نفسهم
ليه مابقاش حد بيراعي ربنا في الناس
ليه كل واحد مايلتزمش بحد حريته من غير مايتعدى على حق الأخرين .... مثال على كده ... الميكروباصات اللي بتشغل أغاني مستفذه بصوت مستفذ ... وكمان في بنت ركبت جنبي ومعاها موبايل شكلها كده فرحانه بيه ولا حاجه وشغلت عليه أغاني بصوت عالي --وأغاني من اللي هي برضه بتتشغل في ميكروباصات يعني ياريت أغاني كويسه-- وفي ناس بتقرأ قرأن !!!!! هو ليه الناس مش بتقول حرية يدك تنتهي عند بداية حرية أنفي

الحاجه بجد اللي بتحرق دمي أويييييي اني لما أخبط في حد وأبص ليه وأبتسم وأقوله سوري .... الحد ده يبصلي كده شظراً وقرفاً ويبقى عايز ياكلني ... طيب يعني أنا لو حتى كنت قاصده على الاقل ابتسم يا عم لما تسمع سوري ولا هي سوري دي بقيت شتيمه وانا مش واخده بالي ولا ايه ... والمصيبه ان لما حد يخبط فيا وأبص له بابتسامه منتظره كلمة سوري علشان أقول ولا يهمك بابتسامه برضه ... ألاقي وش خشب قدامي ده انت اللي خبطتني يعني مش أنا اللي غلطانه .... على فكره الموضوع ده بالذااااااااات مع الستات
هو فيه ايه !!!! بجد هو فيه ايه بالظبط يعني
اللي كنت أعرفه ان الابتسامه عدوى ... لكن لاقيت غير كده خالص

أنا هقول مثالين على الكلام ده لسه قريبيين جداً
1- كنت ماشيه مع ماما وغصب عني خبطت واحده بايدي والله مش بشاكوش ولا حاجه ... وابتسمتلها وقولتها سوري وانا بشاور بايدي بمعني سوري برضه ... واستنيت شويه كده علشان استقبل رد الفعل ... للأسف كل اللي استقبلتا تكشيره رهيبه كأني ضربتها بالنار ... قلت لماما ليه كده قالتلي ماهي شنطتك برضه تقيله قولتها لأ دي ايدي مش الشنطه .... ده أنا بقولها سوري قالتلي يمكن ما سمعتش .. قولتلها طيب ماشفتش ايدي !! طيب تبتسم زي مانا مبتسمه!!! ماما بصراحه مالقيتلهاش حل ... سكتت

2- واحد أعرفه حب يجرب موضوع الابتسامه عدوى ده ... ركب المترو لقى الطبيعي ان الناس مكشره... راح لواحد كده كان واقف جنب الباب ... اتجه ناحيته وهو مبتسم ... مستني يشوف الابتسامه عدوى فعلاً ولا ايه وبكل برأه منتظر ابتسامه كرد فعل من الراجل لكن كل اللي الراجل عمله انه قال : استغفر الله العظيم يارب!!!!!!!! على اساس ان الابتسامه دي ايه طيب !!! مش فاهمه ..... ده كان ناقص يقوله انت عبيط يابني ولا ايه
ايه الناس دي بـــــــــــــــجـــــــــــــد

ليه البنت تكون محجبه وهي مش محجبه.... ليه محسوبه علينا انها مغطيه شعرها -- ده لو كان متغطي يعني -- ولابسه هدوم ضيقه أو ...... أو .....أو ........ بجد بتكون مستفذه جداً بكون عايزه أقولها احترمينا بقى شويه واحترمي الحجاب واحترمي انك تكوني محجبه ... يعني احترمي نفسك من الأخر... مش عاجبك شيليه بدل ماتبوظي الدنيا كده

ليه السواق بيشرب سجاير من غير ما يراعي ان في ناس صدرها تعبان أو مش بتقدر تشم السجاير

ليه كل واحد فاكر نفسه انه اشترى الدنيا باللي فيها والمفروض انه ياخد كل الحقوق ومش عليه أي واجبات
ليه مش بنراعي ربنا ف بعض

على فكره أنا طول عمري كنت فاكره اني عايشه مع الناس واني عايشه في مصر لكن تقريباً كده أنا كنت ف مكان تاني مع ناس تانيه وانا مش واخده بالي

بجد أنا مش فافي ولابتاع .... بس بجد المفروض نهون شويه على بعض ونحترم بعض وقبل كل ده نراعي ربنا في نفسنا وفي الناس

Iam Sorry

2008-04-08T22:13:00.004+02:00

أسفه على الـتأخير ده... ممكن أكون اتأخرت لدرجة ان الناس نسيتني وبطلت تقرأ :$:$:$:

بجد مش عارفه أكتب حاجه ... يمكن ماليش نفس ... بس ليه ماليش نفس مش عارفه!!!!!ا
يمكن الوضع مش عاجبني
يمكن كل ماأكتب حاجه أمسحها
يمكن عندي حاجات كتيره نفسي أكتبها من كترها ماكتبتش أي حاجه
يمكن مش عندي أفكار علشان أكتبها
مش عارفه فيه حاجه مش مريحاني
شايفه كل الدنيا ملخبطه حولي ....
مش عارفه ليه

انتوا مالكوش ذنب تقروا الكلام ده بس انتوا سألتوا عليه وانا حبيت أرد عليكم
بس بيني وبينكم يعني أنا فرحت ان في ناس بتسأل عليا ... وان في ناس مستنياني أكتب حاجه مع اني مش شايفه اني بكتب حاجات جامده يعني
شكراً بجد على سؤالكم وادعولي بقى اني أكتب بوست جديد في موضوع محدد بدل الأفكار اللي في الخلاط مع بعضها دي

Published on 17-04-08 11:47PM

أمي

2008-03-21T23:45:00.001+02:00

بعد الحب ده ايه اللي تعمل كل ده تستاهل ايه... بعد الحب ده ايه اللي تدي حنان كده من غير حساب نبوس التراب اللي ماشيه عليه

بعد الأم فيه ايه دعوه حلوه فاتحه سكه مقفله... بعد الأم فيه ايه يهدي باله اللي في عياله الدنيا كلها مفتوحه له وراضيه عليه

أعملها تمثال اللي طيبة قلبها فوق الخيال... أعملها تمثال اللي سهرت واللي تعبت واللي ربت واللي شالت حمل جبال

لو هعملك ايه تستاهلي مية ألف عيد ع اللي عملتيه... لو هعملك ايه مين ف تعبي سهر مانمشي مين ف أول مره بمشي سندت عليه

بعد اللي عملتيه أعمل ايه يوم ف اللي وصلتيني ليه... بعد اللي عملتيه من حنانك من سماحتك الجنه تحتك ده اللي ربنا قال عليه

والله لو عملت ايه مش هقدر ادي لأمي حقها ... إلا الأم... الأم دي بجد أكبر كنز في الدنيا ربنا خلقه لينا ... حضنها يخفف أي ألم ... نفسها (بفتح الفاء) يدفي لو في عز البرد... حنانها يهون أي هم.... بصراحه مافيش أييييييييي كلام هيقدر يوصف احساسي بأمي
ماما دي كل حياتي ربنا يخليها لي يااااااااااااااااارب ويخليلكم أمهاتكم
وربنا يعوض الناس اللي ربنا أراد ان أمهاتهم تسيبهم

كل سنه وانتي طيبه يا ماماتي يا حبيبتي يا عمري كله يا حياتي كلها
على فكره مش بس عيد الأم اللي ليه فرحه والكلام ده لأ خاااالص .. كل يوم بيمر عليك وانت في حضن أمك احمد ربنا ان ربنا رزقك بيها وبالحضن الدافي ده وبوس ايدها ورجليها كمان أيوه بجد
ولو مزعلها يبقى انت اللي خسراااااااان
يالا بجد روح صالحها لو مزعلها وقولها كل لحظه وانتي طيبه يا ماما

المولد النبوي الشريف

2008-03-19T20:45:00.000+02:00

كل سنه وانتم طيبين بمناسبة المولد النبوي الشريف

HaPpY BDay My Voice

2008-03-09T00:00:00.003+02:00

لأ لأ اعمل Refresh وهي هتيجي ... هو ده اللي انت عايزه؟؟

والله لو عملت كام Refresh على Reload هي نفس الصفحه اللي هتطلعلك
أصل ايه بقى .....
النهادره عيد ميلاد My Voice واللي مايعرفش My Voice يبقى مش عايش في الدنيا :$:$ مش أوي يعني... معلش كل ما أجي أبطل تناكه الاقيني لسه تنكه:$

المدونه دي عاشت معايا سنه... شافت معايا أياااااااااااام !!! على الحلوه والمره ... شافت معايا أصدقاء وزمايل ومناقشات وأراء واختلافات .. ومنعت عنها الخناقات والكلام في السياسه --علشان مش بحبه وهي كمان مش بتحبه-- واتكلمت معاها بصراحه شديده وبلغه ماحدش فاهمها الا أنا وهي بس ... كتيييير كنت بكتب كلام ليه معني غير اللي الناس شايفاه.. مش معني بعيد لكن معني مختلف بعض الشيء .. كل كلامي كان من قلبي ... اتكلمت عن اصحابي وقلت رأيي فيهم كلهم على أد ماقدرت ... قلت رأيي بصراحه في اللي أنا شايفاه ... ناس اتأثرت وناس اتعلمت وناس فهمت حاجه ماكنش فيه فرصه أقولها ليهم وجهاً لوجه... المدونه عاشت معايا مأساة مشروع التخرج والمشرف على المشروع ...عاشت معايا يوم التخرج واحساسي وانا خارجه من الكليه وكأني بنسلخ من جلدي -- بلا مبالغه--عانت معايا كتيير ... كانت أكتر حد بيسمعني وأنا تعبانه ... حتى لو ماكنتش بنشر اللي بكتبه أو أنشره وأحد أصدقائي يقولي: شيلي اللي انتي كاتباه ده أومال أنا روحت فين؟! وبالفعل أشيل البوست وأحتفظ بيه لنفسي... ومره اتُهمت اني دبلوماسيه –اذا كان ده اتهام—واحتمال أكون دبلوماسيه بس برضه صريحه يمكن بقول كل اللي عايزه أقوله بدبلوماسيه ...ومره اتقاللي يارايقه ويافاضيه... وناس تقولي الله حلو أوي اللي انتي كاتباه ده.... شافت معايا فرحتي وزعلي واختلافي واتفاقي مع ناس معينه وتعليقات معينه... شافت معايا كتير كتير يعني ...

علشان كده قررت في عيد ميلادها أعملها حاجه جديده ... ألبسها هدوم جديده وكده أظبطها يعني ;) ... بس يارب ال Design الجديد ده يعجبها .... أنا تعبت أوي علشان أجيبه وعذبتني معايا... واكتشفت اني عشريه أوي وصعب أغير حاجه كنت بتعامل معاها دايماً.... والحقيقه أكتر حد تعب لحد ماوصل لل Design ده هو الأخ العزيز أحمد مبارك قام معاها بأحلى واجب بجد... ده أنا لو منه كنت كرهتني من التعديلات اللي عدلها دي كلها... علشان كده أول واحد هياكل من التورته ... اللي هو برضه هيجيبها :P

اللي مش كتير يعرفوه عني: اني كنت بكتب --وحطوا خـــط تحت كلمة كنت-- لما عملت المدونه كنت فاكراني هكتب هنا اللي كنت بكتبه زمان.... لكن ماحصلش وبصراحه أحسن اني معملتش كده وكتبت حاجات تانيه خالص... الغريب بقى ان اسلوبي ده غير اسلوب كتاباتي تمــــامــــاً.

شكر واجب بقى وحاجات كده

في ناس كان ليهم فضل في المدونه دي وليهم يد في نجاحها – وان كانت مش ناجحه من وجهة نظركم لكن ناجحه عندي أنا— وليهم يد في اني اكمل فيها

1- أحمد مبارك طبعاً كفايه الشكل الجديد اللي انتوا شايفينه ده واللي من غيره كنت هتعب أوي لحد ماعمل حاجه

2- أحمد عيسوي و رامي محروس: الفكره كنت واخداها منهم ...أول ماعرفتها عرفتها من رامي وأول حد دخلت عنده .... ولما لقيت أحمد بيكتب حاجات شخصيه مش Programming بس، الفكره عجبتني جداً وقررت اني اعمل المدونه دي وأكتب اللي في نفسي.

3- أحمد مبارك تاني وخالد عادل: أثروا كتيير على طريقة كتابتي بصراحه واسلوبي في الكتابه.

4-وفاء اللي بجد أكتر واحده خلتني أصلاً اكمل البلوج ده بأول تعليق ليها

حاجه مهمه عندي بقى... أنا في موضوعات حباها أوي وفي موضوعات الناس مش حباها وفي ناس ليها اعتراضات على أي حاجه وفي ناس عجباها حاجه

المهم في الحاجات دي كلها أنا عايزاكم تقولوا لي رأيكم .... ردوا على الاسئله اللي جايه دي لو حابين:

1- ايه أكتر موضوع عجبكم ؟

2- ايه أكتر موضوع اضايقتم منه أو مش عاجبكم؟

3- ايه اللي مش عاجبكم في اسلوبي؟

4- أكيد هيكون السؤال ده ايه اللي عاجبكم في اسلوبي ؟

5- ايه رأيكم في الشكل الجديد؟؟؟؟؟؟؟

والاجابات دي تعتبر هدية عيد الميلاد..... أما الهدايا التانيه من فلوس وكده تحول على حساب رقم ...... ولا بلاش أحسن تفتكروني طمعانه فيكم ولا حاجه :$

بس كده خلاص .... شكراً انكم وصلتوا لحد هنا

يوم جميييييل !!!ا

2008-02-29T01:06:00.009+02:00

النهارده صحيت من النوم بدري علشان بنام بدري وبرتاح في النوم وباخد وقت النوم بتاعي راحه تامه يعني
وطبعاً خدت الفطار بتاعي كالعاده ونزلت الشارع .... ياااه الشارع فاضي ومافيش ريحة دخان المواصلات
الميكروباصات واقفه بنظام وهدوء ومن غير صداع ووجع دماغ روحت للعربيه اللي حسيت انها مريحه بالنسبه لي .. ... سألت السواق: هو حضرتك رايح فين؟ قالي .... قولتله شكراً وركبت ....سواق محترم مش بيشرب سجاير كمان علشان الركاب مايتعبوش
الولد طلع لم الاجره من سكات وهدوء... والقرأن شغال وصوته هادي السماعت يعني سليمه ومشغل قرأن ومش معليه على الاخر علشان كمان يسمع لو حد قاله نزلني هنا لو سمحت
الهواء نظيييييييف مافيهوش ريحة الدخان ولا مخنوق وعارفه اتنفس كويس...نزلت من الميكروباص لقيت الميكروباص التاني واقف سألته رايح فين وركبت
وصلت في معادي وقلت السلام عليكم قبل سوري ودخلت وأنا الموود كويس أوييي وفايقه ومركزه وقعدت في مكاني الحر اللي بحبه وبتحرك بالكرسي بتاعي بحريه
وبعدين
.
.
.
.
.

أكيد صحيت من النووووووووووووووووووووم :(:(:(:(:(:( حــــــــــــــلم نفسي يتحقق :(((((( كل كلمه اتقالت نفسي تتحقق.... نفسي ألاقيني كده ... نفسي أنام كويس ... نفسي أروح في معادي ... نفسي أشم هواء نظيف... نفسي مالاقيشناس بتترمي من جوه لبره وبتندفع من بره لجوه ... نفسي الشخصين اللي بيركبوا معايا دول يتغيروا بقى :@ ونفسي العربيه اللي بتعدي من جنبي وأنا على الباب دي ماتعديش مش ممكن نفس الشخصين ونفس العربيه في مواعيد مختلفه بدري متأخر هما هما
:@

الحمد لله بجد ... هي مشكلتي الأولي والجذريه المواصلااااااااااااااااااااات والناس

كنت فاهمه غلط خالص!!!

2008-02-20T20:59:00.007+02:00

مش عارفه أقول إيه ولا أبدأ بإيه بجد
المواصلات العامه والميكروباصات دول حكااااااااااايه بجد
ايه الناس دي وايه الشوارع دي ... أنا ماكنتش عايشه في الدنيا على كده
الكلام ده كله واضح طبعاً انه مش مدح في الميكروباصات... اطلاقا مطلقاً
أنا كنت أعرف ان الواحد بيوقف الميكروباص ويعرف هو رايح فين ولو يناسبه يركبه ... يا نهار أبيض ده أنا كنت هبله بقى على كده :(
اللي اكتشفته ان أي حد بيركب أي حاجه ماشيه على اربع عجلات مش مهم كام مين فين ليه ... بصوا الحوار اللي جاي بين شخص من الحشد الرهيب اللي واقف مستني الميكروباص والساعه دلوقتي حوالي 8.45 صباحاً
الشخص: رايح فين يا استى؟
السواق: --صمت رهييييييب --
الشخص: السابع؟
السواق: توء
الشخص: رابعه؟
السواق: توء
الشخص: أول عباس؟
السواق: توء
الشخص: كلية البنات؟
السواق: توء
الشخص:مكرم؟
السواق: توء
الشخص: أومال رايح فين ؟؟؟
السواق: --صمت رهيب ومشي من قدام الراجل--ا
ايه ده بقى:|:| أنا فضلت بجد متنحه وبضحك والله وأنا في الشارع... هي الناس عندها استعداد تركب أي حاجه كده وخلاص ... وايه تناكة السواقين دي!!! والمصيبه انك لما تركب مش بينزلك في المكان اللي انت عايزه ... يعني ينزلك قبلها بكتيييييير مسافه كده محتاج لها تاكسي ... طيب ليييييييييييييه
وكلمة ان الميكروباصات واقفه والولد ينده والحياه حلوه وكده دي مافييييييش دي اشاعات :(
وياسلام بقى على اتحاد الشعب في كل مكان تنزل تلاقي حشد رهيييييييييب ... الشارع بيقف علشان كم الناس اللي بتعدي .... رغم ان الطريق اللي بعدي منه سريع بس الناس كلها بتعدي مره واحده يعني اللي مش بيعرف يعدي الشارع بيعديه مع الناس عادي ...

والتجمع بقى قدام الموقف أو المحطات ... اييييييه ده!!!!!!! ده احنا لو مافيش حريه ممكن يتقبض علينا بتهمة التجمهر -- لو كانت تهمه يعني مش عارفه-- ولما يجي بقى ميكروباص يجروا وراه والله من غير مايعرفوا رايح فين ويشوتوا اللي قدامهم مش مهم ميين اللي قدامهم.. والله ولد اتخبط من واحد حتة خبطه وبنت كانت هتقع .. علشان الكل بيجري وخلاص ... أنا بقى :))) مش عايزه أقولكم ... هو مافيش خبط ولا الكلام ده الحمد لله بس فيه اصابات والله في جسمي من أمن ونتانة الميكروباصات وقوة الناس التي لا تستغل الا في ركوب المواصلات

وأنا رايحه بقى الصبح... ست كبيره ركبت الميكروباص .. الولد الي بياخد الفلوس من الناس بيقول يا جماعه حد يقوم للست دي ... الناس ماردتش ولا عملت رد فعل حتي... الولد قال تاني: يا شباب يا جدعان حد يقوم للست الكبيره التعبانه دي ... واحد تكرم ورد وياريته مارد قاله: مافيش يا عم شباب جدعه هنا ... مش عارفه بصراحه انا الكلامه دي ودني اتسدت بعدها ماعرفش هي قعدت ولا لأ!!!!!!!!!!!ا

عارفين بقى طريق الترام ... اللي هي القضبان دي الله ينور عليكم.... الميكروباص علشان ينجز بيمشي عليها ... مش مهم بقى الترام جاي ولا لأ :( المهم مصالح الناس طبعاً ... متشكرين يا انكل سواق بصراااااحه
وقال أنا ايه كان شغلي الشاغل اني ازاي هقل السواق كلمة يا استى دي اللي مش بحبها خالص:( ولسه مش بقولها برضه... بس المشكله الأكبر اني اتعامل أصلاً مع الميكروباصات والمواصلات دي وابرمي يا أم خلف والكلام ده ... واضح اني محتاجه كورسات كتيييره.... أنا مش فافي على فكره بجد ولا حاجه بس فعلاً ماليش في الحاجات دي خالص

نكتفي بهذا القدر الحقيقه كفايه أوي كده ... ربنا يصبرني بقى
المره الجايه أقولكم على مكالمه هاتفيه حصلت لراكبتين في الميكروباص برضه ... والمواقف اللي بتحصل فيه.....والأغاني الحلوه اللي بسمعها كمان
سلام دلوقتي :)

HaPpY ..........

2008-02-14T23:43:00.005+02:00

HaPpY Champions Day
HaPpY Valentine Day

أه وانا كمان أول مره أسمع الكلمه دي ... أصل أنا اللي مخترعاها :$ ... البلد كان شكلها حلو أوي يوم الماتش واللعب كان حلو أويي أويييييييي... على فكره أنا كنت زماااااان ليه في الكوره بس دلوقتي ماليش فيها ومش بتفرج الا على الماتش النهائي ولما بتفرج عليه ببقى في قمة حرقة الدم وشدة الأعصاب لدرجة اني بقول الله يكون في عون المتابعين الجادين ....... مبرووووووووك لمصر بجد من كل قلبي فعلاً حقيقي أكتر مناسبه تحس فيها ان الشعب ايد واحده.... والناس كلها فرحانه وبتضحك

بلا عيد حب بقى بلا كلام فاضي
أنا عن نفسي مش بعترف بيه من غير ضرب يعني.. أه بجد حاجه كده مالهاش لازمه ولا معنى ... تمشي في الشارع تلاقي كل المحلات جايبه دباديب وقلوووب بقى حمراء وورد أحمر وداهنيين المحل باللون ده غير الناس اللي ماشيه في الشارع وكله لابس أحمر في أحمر ... أنا أساساً مش بحب اللون ده لما بيكتر كده ... ايه بقى مين عيد الحب ده على أساس ايه والنبي يعني حد يقلي
حتى وجهة نظري مش هتتغير لما ألاقي حد أقوله هابي فالنتين داي لأني مش هقولها ليه أصلاً... الحب موجود في كل مكان وفي كل وقت والحاجه الوحيييييده اللي مش ليها ميعاد يبقى ليه بقى !!! .... أنا ماتعرضتش للموضوع من الناحيه الدينيه .....ا
النهارده شوفت أحد المحلات دي مشغل أغاني والمحل كله تحس انه لابس بدلة اعدام وايه بقى كمية بنات رهييبه جوه ... أعتقد ان البنات هي اللي بتعترف بللي بيسموه عيد الحب ده أكتر من الولاد ... ا

شوية كلام

2008-01-23T22:30:00.001+02:00

Published on Feb. 6 2008

تعديل بتاريخ 12-02-2008

يا جماعه أي نقطه بتكلم فيها مش بتكلم عن الكل يعني التعميم جهل --الكلمه لها حق الملكيه الفكريه للباشمهندس أحمد مبارك-- يعني أنا مش معنى اني بقول حاجه في البنات يبقى أقصدهم كلهم
أه بس مش مع الشكر والاعتذار المره دي يعني ده تقدروا تقولوا عليه تهيييس
البوست ده من فتره وبما اني غايبه عنكم ومش عندي بجد أيييي حاجه أكتبها والموود كمان مش مساعد والبوست ده كان في الخطه يعني جاهز ... قلت أكمل عليه يمكن كلمه كده ولا كده تبقى مفيده بعد الشر ولا حاجه ولا يمكن يخرجني من الموود
النهارده وأنا راكبه الميكروباص -- أصلي عقبال عندكم بقيت أركب مواصلات غير المترو-- لقيت الراجل مشغل أغنيه أو البوم أو شريط حزين لأ مش حزين كئيب ... الراجل بيغني يقول فيما معناه انه كان مع حبيبة واحد صاحبه واتكلموا عليه وجابو في سيرته يعني وعمال يقوله معلش يا صاحبي ماتزعلش مني احنا برضه اصحاب... الأغنيه غريبه أوي ولفتت نظري ... وبعدها أغنية اعتبره قلب ورااااح :) وحاجه كده كمان ... الناس دي بتجيب الكلام ده منين بجد ده كلام جامد بس عايز صوت يغني ولحن نضيف ...مع احترامي :$

على فكره يا جماعه عن تجربه في مقوله بتقول ضاقت ولما استحكمت حلقاتها فرجت وكنت أظنها لا تفرج... بجد طول الواحد مابيقرب لربنا ويدعي له ربنا بيفرج همه ... أصلاً ربنا بيحطنا في اختبار علشان يشوف احنا هنصبر ولا لأ وهندعي ولا لأ ولما الهم يزول هنشكره ولا ايه ... طبعاً الواحد بيعجز عن شكر الله بجد ربنا ده كرييييييييييييييييييييم --الكلام ده بتاريخ قديم بس مازلت برضه متمسكه بيه--

عارفه عارفه الكلام مالوش دعوه خالص ببعضه مانا قلت في الأول انه تهييس بس ممكن نطلع منه بحاجه مابحبش أهيس بصراحه الا لو هستفيد

أعتقد ان احنا البلد الوحيده اللي بتنطق الضاد وأحسن ناس نقول السين بدل الثاء والزاي أو الزال بدل الذال حتى لما بنيجي نقرأ قرآن بنعمل كده للأسف ولما بنيجي نقرأ انجليزي برضه بنعمل كده ... اشمعنى لسانا طالع في كل حاجه ماعدا الثاء والذال
بمناسبة اللسان اللي طالع بقى ... أنا عايزه كورسات في الموضوع ده :$ أنا ماليش فيه خالص:( وعايزه جلسات أحبال صوتيه :( علشان لما بزعأ صوتي بيعطل في النص ولما بتكلم عادي ماحدش بيسمعني :(:(:( بجد دي مأسااااه يا جماعه

لما النت اتقطع سمعت كلمه كده ماعجبتنيش:: بيقولوا انه هيفضل اسبوع أو اسبوعين على كده!! هما ميين دول اللي بيقولوا يا نااااس ... أي حد بيقول وخلاص ... على أساس ايه يسيبوا النت مفصول يعني وهما أكتر ناس بيخسروا من الموضوع ده... هما ميين دوول؟؟... اللي بيقولوا!!! .... للمره المليون اتأكدوا الأول يا شعب الاشاعات والشائعات وبعدين انشروا الكلام براحتكم...--ملحوظه أنا فيا برضه عيوب كتيييييير أنا لست واعظه--

انتوا طبعاً عارفين اني متحيزه --بس غير متعصبه-- للرجال دوناً عن النساء ليه بقى؟؟؟ حد يقولي ليه... هقولوكم ليه: النساء فيهم كذا عيب لو اتغير --وطبعاً مستحيييييييييييييل التغيير لأنه طبيعه ربنا خلقنا على كده-- هيبقوا 100% أنا برضه فيا بعض العيوب دي وكارهه جداً كونها فيا بصراحه....اللي أنا شايفاه يتمثل في ::
1-التفكير بالقلب وبسسسسس ليس بالعقل... بجد النساء دوول ممكن مايراعوش ظروف اللي قدامهم ويهاجموه من غير مايعرفوا كل الحقيقه
2-تحويل المشاكل الشخصيه الى أزمه فظيعه... والكلام ده حصل قدامي.. مشكله شخصيه حولت وجهة النظر من موافق الي معترض اعتراض تااااااااااام دون النظر للمصلحه العامه ولا أي حاجه
3-أي واحده ست في منصب بتكون يا ساااااااتر يارب على قلبة الخلقه شراب مقلوب فعلاً (مع مراعاة الاستثناءات)ا
4-طبعاً اذا ذكرت السيدات ذكر الرغي الفظيييييع
5-صعب تثق في أنثى صعب تلاقي أنثى تحفظ سرك (كصديقه) صعب تلاقي أنثى مش بتغير من أنثى زيها لأي سبب( صعب وليس مستحيلاً)ا
بما ان التعميم جهل على رأي الباشمهندس أحمد مبارك وبما اني بحترم النسب أوي وبما اني من هذا الجنس اللطيف... برغم اللي قلته ده كله ده لا يمنع ان فيه سيدات قويه وتعرف تاخد قرارات كويسه أوي وعقلها كبير وبجد أنا بحترم السيدات القويه بعقلها أويي وبحترم اللي تكون في منصب وتكون حبوبه ومتواضعه ... أنا أنثى وأمي أنثى وليه أصدقاء بنات لكن دي تحفظاتي على جنسنا هذا

أقولكم على حاجه حلوه..... كفايه كده ... كويس اني كتبت حاجه ... بس بجد الكتابه وحشتني واديني اتكلمت شويه وهلاقي حد يتخانق معايا علشان أخر نقطه :))) وشكراً انكم استحملتوا تقروا ده كله
يالا تصبحوا على خير أو صباح الخير أو السلام عليكم أو سلام على حسب انتوا فين

untitled

2008-01-21T23:32:00.002+02:00

لا إله إلا الله الحليم الكريم، لا إله إلا الله العلي العظيم، لا إله إلا الله رب السموات السبع و رب العرش العطيم

اللهم يا مؤنس كل غريب ويا صاحب كل وحيد ويا ملجأ كل خائف ويا كاشف كل كربة أسألك أن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير

هبني اللّهم الصبر والقدرة لأرضى بما ليس منه بد، وهبني اللّهم الشجاعة والقوة لأغير ما تقوى على تغييره يد، وهبني اللهم السداد والحكمة لأميز بين هذا وذاك

اللهم آت نفسي تقواها , وزكّها, أنت خير من زكّاها , أنت وليّهاومولاها ،اللهم إني أعوذ بك من علم لا ينفع, وقلب لا يخشع , ونفس لا تشبع ,وعين لا تدمع ,ودعوة لا يستجاب لها ،اللهم إني أعوذ بك من شر ما عملت , ومن شر ما لم أعمل , وأعوذ بك من شر ما علمت , ومن شر ما لم أعلم اللهم إني أعوذ بك من زوال نعمتك , وتحول عافيتك , وفجاءة نقمتك , وجميع سخطك

اللهم من اعتزّ بك فلن يُذل، ومن اهتدى بك فلن يضِلّ، ومن استكثر بك فلن يقلّ، ومن استقوى بك فلن يضعف، ومن استغنى بك فلن يفتقر، ومن استنصر بك فلن يُخذل، ومن استعان بك فلن يُغلب، ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هُدي إلى صراط مستقيم، اللهم فكن لنا وليّاً ونصيرا، وكن لنا معيناً ومجيرا، إنك كنت بنا بصيرا

تاج أو تاج إلا نصف

2008-01-15T02:48:00.001+02:00

تحت شعار وعد الحر دين عليه .... دينا مررتلي تاج - حلوه مررتلي دي جايه من المراره ويا مراري لأ بس ده مش تاج مر ولا حاجه- المهم أنا كنت جاوبت منه أسئله قبل كده ونصفه ماكنتش جاوبته ووعدتها اني هجاوب على باقي الأسئله وأنا عند وعدي أهو وكده يبقى ليكم عندي وعد كمان لسه ماوفتش بيه

نبدأ بقى

كنت طالب شاطر في المدرسة؟
الحمد لله مرحلة ابتدائي كلها كانت تفوق .. إعدادي خيبه شويه لأسباب ... ثانوي تانيه وتلاته بصراحه أكتر سنوات تفوقت فيها بجد وأعلى درجات جبتها ومش عايزه أتكلم عن الجامعه ان الله حليم ستار بس الاعتراف بالحق فضيحه وأنا هنا في البلوج اعترفت كتيير بتفوقي في الجامعه:$ أه على فكره معايا شهادة تقدير كمان من أولى إعدادي مش أي كلام يعني tenek :D

***************

إيه كانت أحب ماده ليك في المدرسه والكليه؟
كل المواد العلميه في المدرسه والنحو حبيته بسسسسسسسس في تالته ثانوي أخر مره خدت فيها لغة عربية :(
في الكليه
Physics (r3'm kol ely graly mnha), Electronics, Artificial Intelligence, Networks, Graphics (aweeee)

***************

أكره ماده ليك في المدرسه و الكليه؟
زي دينا بالظبط :)
في المدرسه التاريخ والجغرافيا كنت بكرهم أويييييييي يا ساتر يارب
في الكليه ال Calculus
ونفس الكلام يا دينا لما أقول تفاضل وتكامل يعني شيلها سنتين يعني دكتور يسقطني علشان أي حاجه بقى مش علشان كام درجه ياللا ماعلينا

***************

كنت عايز تطلع ايه وانت صغير ؟
كان نفسي أطلع مَدرسه زماااااااان أوي يعني وبعد كده لحد تانيه ثانوي كنت عايزه أبقى دكتوره بس حصلي حادث معين اكتشفت ان قلبي مش جامد ولا انفع دكتوره وحولت علمي رياضه أصلاً بس علشان كان مجموعي 92% يعني لو كنت عملت قرد ماكنتش جبت حاجه تدخلني طب بس الحمد لله من غير قرد جبت 96% في تالته دخلوني حاسبات كلهم على بعض عملوا 94% وليه درجات عند الكليه
أه سوري الاجابه أهي :$.... دلوقتي برضه عايزه أطلع مصممة مواقع وفي طريقي ان شاء الله

***************

أغرب حاجه اتمنيتها هي اني أبقى؟
لأ بصراحه مافيش حاجه اتمنيتها كانت غريبه برغم كل الهبل اللي انا فيه ده لكن لأ مافيش

***************

باقي الاجابات جاوبتها قبل كده ودي حاجات عايزه أغيرها وأسئله كمان ماكنتش موجود... بس كمان هجاوب باقي الأسئله تاني علشان لما أتاج حد يبقى كل الأسئله أهي ومالوش حجه ومش هغش الا في كام سؤال كده :$

***************

اسم مدونتك؟
My Voice

ولماذا اخترته؟
علشان صوتي واطي :$ لما بكتب بتسمع أكتر من ما بتكلم وحاسه ان البلوج ده صوتي

***************

هل فكرت في اغلاق مدونتك؟ السبب؟
لأ طبعاً ... لأن ده أكتر مكان برتاح فيه

***************

صورتك في المدونه ترمز لايه؟
أنا لحد دلوقتي لسه ماحطتش صوره لأن مزاجي متغير على طول وصعب عليه جداً اني أختار صوره تتناسب مع مزاجي على طول لكن عايزه أحط صوره لسبب واحد ان الصوره بتدل على صاحبها ولو دخلت أي بلوج وعملت سكرول للتعليقات هتعرف من غير ماتقرأ الاسامي مين ده بس لسه بدور على صوره مناسبه أحطها

***************

أحلى جمله قيلت لك في وصف مدونتك؟
في ناس شكروا في البلوج بصراحه ومؤخراً لاقيت ناس بيقولولي انه مريح :D:D
واني مابطلش كتابه يعني ... هما اللي جنوا على نفسهم بقى
بس الكلمه اللي عجبتني بجد ان اسلوبي مش مفهوم في مواضيع كتيره وأنا بحب كده ... مش علشان أتوه الناس والله بس علشان أنا فعلاً مش مفهومه

***************

التعليقات بالنسبه لك .. أهميتها؟
بحب أشوف الناس بتفكر ازاي واختلاف الرأي بيخليني أعيد النظر والتفكير في حاجات مثلاً كنت شايفاها غلط أو اضيف حاجه لافكاري وفي موضوعات كتير لما بكتبها بحب الناس تعلق عليها

***************

ما أحلى بوست كتبته ضع اللينك واذكر لماذا؟
بجانب اللي قلتهم قبل كده هزود عليهم
قانون ممنوع التدخين
لأني بجد نفسي الناس كلها تبطل تدخين
Message Offline
علشان نفسي الناس تأخد بالها من الموضوع ده ويقل شويه ويبقى في شيء من الوعي

***************

أحلى مدونه قرأتها؟
بجانب اللي قلته قبل كده
رئيس جمهورية نفسي احساسه عالي أوي في اللي بيكتبه وشكل المدونه كده فيها شجن وأنا بصراحه كئيبه :$ بحب الحاجات دي
زهرة الكاميليا و محاولات رحيل الاتنين دول احساسهم رائع بالكلام بجد وفي حاجات كتير بكون حاولت أقولها قبل كده وماعرفتش لما بقرأ كلامهم بحس انهم عارفين يجيبوا اللي انا مش عارفه أقوله
عجوز وعندي 30 سنه اسلوبه حلو أويييي ومهما كان البوست طويل بقرأه من غير ملل
ثم غابت فاطمه عاجبني أوي الشجن اللي فيها
غمض عنيك عاجباني أوي اسلوبه فيها جميل وعاجبني
وطبعاً خالو أحمد الصباغ
عاجبني أوي انه مؤمن بالتدوين
No Chance
علشان غريبه شويه عليه وفيها كام موضوع عاجبني رغم ان المدونه لسه تقريباً في البدايه
من الأخر كده كل مدونه بدخل فيها وأكتب فيها تعليق بتكون عجباني لأي سبب ومنهم اللي على ايدك اليمين وانت داخل

***************

حد قل أدبه في التعليق؟ وعملت ايه؟
الحمد لله لحد دلوقتي لأ ... حتى لو حصل ده اما اني هرد عليه رد مستفذ بس بمنتهى الذوق وههزقه برضه بالذوق أو اني همسح التعليق لو وحش أوي بس ده أبعد احتمال

***************

ايه اللي هيحصل لايميلك لما تموت؟
بجد السؤال ده واحد سألهولي وقلتله تقريباً اني هكتب وصيتي في البلوج بس الله أعلم بقى هلحق ولا لأ

***************

اديت الباسورد بتعاك قبل كده لحد؟
بتاع البلوج لأ... بس في صديق معاه باسورد الميل لظروف قطع النت يعني قبل كده ومش عارف انه بتاع البلوج :):):) ياللا أهو عرف أهو بس هو بيمسحه مش معاه على طول يعني

***************

اسمك؟
برضهRehab MK :P

***************

اسم الدلع المشهور بيه وسط اصحابك؟
والله دائرة الاصحاب كل مابتكبر كل ما بلاقي لي اسم جديد المشكله اني مجبره على الاسماء دي :$ ماحدش بيقولي رحاب الا اذا كان عايز مني حاجه :(
أنا قلت قبل كده
Rory, Ra7oba, RwRw, Rorty, Rere,m7desh tb3an be2oly tenek, Roby,Nefesa:$, Re3o, Re3ab (w moshtkateha zay Ra3Ra3 w Ra3aRe3o w Ro3Ro3 w Ro3) تحس انها أسماء ضفادع المهم الاسم الجديد بقى لينا علشان بس بحب الفران ومش بعرف أطبخ وماسكهالي ذله:$اللي لقبني بيه أحمد مبارك
Rorra by my cosine ( kont msmya nafsy kda zaman)
Re7ab w moshtkato brdo 3la wzn moshtkat Re3ab:@

***************

مجال دراستي؟
اوعى وشك برضه يادينا :) هندسة كمبيوتر يعني كلية حاسبات ومعلومات جامعة حلوان (واللي هسمع منه كلمة ده معهد هقطعله لسانه :@:@ ) يعني قسم علوم حاسب وفخوره جداً طبعاً

***************

شخصيتك نوعها ايه؟
والله يا جماعه مانا عارفه!!!! حاجه كده غريبه ماتتفهمش

***************

مودك ايه؟
متغير جــــــــداً .... يعني أي حاجتين ضد بعض موجودين
عصبيه جداً ورايقه بس مش جداً
متفائله ومتشائمه

***************

بتعمل ايه في وقت فراغك؟
على حسب أنا عايزه أعمل ايه

***************

الأكله المفضله؟
نلخص ونقول المشويات ....ا

***************

السفر بالنسبه لك؟
متعه بس بتعب جداً وانا راجعه (نفسياً وبدنياً)ا

***************

صفات أخدتها من بابا؟
العصبيه،القلق -بس مش كل القلق اللي عند بابا-، اني أفضل الناس على نفسي ساعات -علشان أتصدم في الأخر :) :)-، الحنيه والطيبه

صفات أخدتها من ماما؟
الذكاء، الطيبه، التضحيه، التعبير عن الحب مش بالكلام، العدل ، الضمير في الشغل، لما أبدأ حاجه لازم أنهيها، النظافه، التفكيييييير المستمر، اني اسمع أكتر ما بتكلم، أني بحب أتعب نفسي جداً وارهقها وابهدلها - نفسي يعني- ، الحظ القليل مع الناس، كل حاجه كويسه في شخصيتي من ماما

***************

أكتر ست حاجات بكرهها؟
الكدب بكرهه جداً- النفاق- الحقد- الخيانه والغدر- الغباء- الظلم- القهر- التعصب -مش العصبيه يعني-... هما أكتر من 6 عارفه:$ا

أكتر ست حاجات بحبها؟
الصرحه- الصدق-الصداقه اللي بجد ... وكل حاجه عكس اللي بكرهها

***************

الشغل بالنسبه لك؟
متعه لو حباه

***************

الكمبيوتر والنت بالنسبه لك؟
عالم تاني منفصل عن الواقع بتاعي فيه كل حاجه عايزاها وكل حاجه بحبها وكل الناس اللي بحبها

***************

تمرر التاج لمين؟
وانت داخل على يمينك كده هتلاقي اسماء مدونات كتيره
وكمان الناس ال FCI- Bloggers
اللي لسه بيكتبوا في مدوناتهم .............أنا بقى عايزه أدخل كل مدونه من دوول الاقي الاجابات بتاعة التاج ده

وانتوا أحرار بقى ... ياللا سلام

قانون ممنوع التدخين!!!ا

2008-01-12T23:59:00.002+02:00

طبعاً احتمال 90% ان أي مدخن هيجي يقرأ العنوان مايكملش الكلام ومايفكرش يقرأ حاجه بعد العنوان بس رجاء تكملوا الكلام للأخر لحد أخر كلمه
أولاً: ده موضوع من مدونة كلام لوجيك عن نفس الموضوع بعنوان: معاك علبة نيكوتين؟؟ يارييييت تقروه
ثانياً: في مناقشه لقانون ممنوع التدخين في مصر.. طبعاً في الأماكن المغلقه ... اللي هيدخن في الأماكن المغلقه غرامه على طول والقانون ده موجود في لندن وفرنسا على فكره (مش عارفه التفاصيل بالظبط ومش مشكلتي أعرفها)... المهم أنا مش هقول ايوه كده أصلنا مش بنيجي الا بالغرامه وياريت تبطلوا تدخنوا والكلام ده كله ... أنا مش بتاعة شعارات وخاف على صحتك وتسعدني الزياره فلا تفسد الزياره بالسيجاره والتدخين ضار جداً بالصحه والكلام ده كله.. بس عايزه أقولكم ان بابا مدخن ومدخن درجه أولى وعايزاكوا تقروا الكلام اللي جاي ده للأخر
بابا دخل المستشفى 3 مرات في 3 حالات مختلفه في أقل من سنه والسبب الرئيسي في ال3 حالات دوول (التدخين)
الحاله الأولي: جلته في القلب ودخل فيها 3 عنايه مركزه ( العنايه المركزه الحرجه- عناية حالات القلب- العنايه المركزه العاديه ومنها تاني الى العنايه المركزه للحالات الحرجه) --مع الاعتذار للأسماء يعني مش عارفاهم بالظبط يعني :):) ماعلينا-- والمره دي كانت أصعب مره وأخــــــر بهدله ومن غير مبالغه شاف الموت كذا مره وعمل عمليتين برضه .. وحصله حاجه في الشريان التاجي مش فاكره بالظبط ومش عايزه أفتكر والكلام ده كله كان قبل رمضان بكام يوم ودخل علينا رمضان طبعاً
الحاله التانيه: برضه مش عارفه الاسم بالظبط بس حاجه في الرئتين والكلام ده كان قبل عيد الأضحى بيومين بالظبط السنه دي
الحاله التالته: بغض النظر عن الاسم العلمي بس هي حاله مياه على الرئه ... ودخل فيها العنايه المركزه الحرجه برضه.. وبجد مهما أوصف الحاله اللي بابا كان فيها مستحيل أعرف أوصفها وبجد قلت خلاص يعني خصوصاً انه كان بيتشاهد على نفسه وهو من غير وعي أنا وماما اتشنجنا أصلاً من المنظر ... وهو لسه خارج من المستشفى الحمد لله النهارده
على فكره بابا اللي مساعده ان الناس كلها الحمد لله بتحبه وكل الناس بتدعيله الحمد لله .. يعني مش علشان الحالات سهله ولا حاجه

طيب أنا المفروض ماقولش الكلام ده بس بقوله على اساس انه تجربه لحد مدخن علشان مافضلش أقول يا جماعه التدخين بيعمل كذا وكذا وكذا من غير دليل أهي تجربه حيه قدامكم
يعني لما حضرتك توصل سن الخمسين مثلاً في احتمال كبير وفظيع ان ده كله يحصلك طيب وعلى ايه يعني !!!ا
نمسك حاجه حاجه ... هنتكلم كلام مجانين وعاقلين ورجال الدين والاخلاق وكل حاجه

دي أولاً صوره لرئتين مدخن... الاشاعه بتاعة بابا كانت سوده على فكره والله

1- من ناحية الدين: التدخين حرام شرعاً لعدة أسباب... مش هقول الفلوس اللي بتتصرف وتتحرق ولا الصحه اللي بتدمر.. الكلام ده حفظناه... لكن هقول انها كترها بيسكر أو بيذهب العقل واللي كتيره يسكر يبقى قليله حراام .. كمان هي طعام أهل النار ... يانهار مالوش لازمه!!! يعني انت بتدعي ربنا انك ماتدخلش النار في الآخره وبتاكل طعام أهل النار في الدنيا :(
قال رسول الله صلى الله عليه وسلم { ما أسكر كثيره فقليله حرام }ا

قال الله تعالى عن طعام أهل النار:﴿لَيْسَ لَهُمْ طَعَامٌ إِلَّا مِنْ ضَرِيعٍ * لَا يُسْمِنُ وَلَا يُغْنِي مِنْ جُوعٍ﴾. «الغاشية: 6-7»ا

[والدخان لا يُسمن ولا يغني من جوع كطعام أهل النار]

كلام كتيير أويي اتقال في تحريم التدخين يعني لو عايزين تعرفوا بحث بسيييط على الحاج جوجل هيقولكم على طول

2-من ناحية الصحه: مش هقول أكتر من اللي قلته فوق عن حالة بابا الواقعيه واللي عايز يزوره ويتأكد العنوان أهو
..... انتوا صدقتوا ولا ايه مش هكتب العنوان طبعاً.. زياره بقى ونجيب بيبسي ونعمل شاي والحاجات دي لألألأ شكراً على السؤال من بعيد لبعيد :P

3- من ناحية الأخلاق والرجوله: انت يعني فاكر نفسك راجل بمسكة السيجاره ولا ايه!!! على فكره أنا عن نفسي يعني أول حاجه هسئل عليها وأرفض بيها العرسان (يعني لو جم يعني بلاش احراج :$) هو انه بيدخن ولا لأ .. لو أه يبقى سوري مايلزمنيش ... دي مش تناكه بجد بس السبب الأساسي اني بتخنق جداً جداً جداً من رائحة الدخان.... وبعدين مافيش راجل بيتذل والسيجاره بتذل جامد بجد والله ... وكمان الحاجه اللي ماتقدرش تعملها قدام أهلك يبقى ماتعملهاش خالص ... أكيد مش بتشرب قدام والدك كده عادي يعني

كفايه نواحي بقى مع ان في والله حاجات كتييييييييير بس مش عايزه أرغي كتير... نقول بقى حاجه مهمه... انت ليه ماتبطلهاش من دلوقتي أحسن ما سنك يوصل الخمسين وبعد كده مش هتقدر بجد ... فكر مثلاً انك يكون عندك زوجه و أولاد وانت بتأذيهم وبتتعبهم بالتعب بتاعك ده ... بطلها من دلوقتي أحسن والله ...وبعدين ماحدش ضامن عمره... والله حرام عليك نفسك وعمرك واللي حوليك ومالك وصحتك ماتستناش قانون علشان تبطلها يعني ....... يانهار أبيض بجد حرام

بابا يمكن كده 30 سنه بيشربها وبقت خلاص في دمه صعب يبطلها بسهوله وخصوصاً انه بينزل لأصحابه كتير على القهوه وكفايه أصلاً قعدة القهوه :( وماعلينا من التفاصيل والكلام الكتير

يارب واحد بس يتأثر بالكلام ده علشان أنا ماكتبتش بضمير مش عارفه أكمل بصراحه

شكر خاص لرجال الاسعاف اللي جم بعد ما بابا كان وصل المستشفى وهما كانوا لسه طالعين يعني جم بعد ساعه الا ربع مثلاً من المكالمه كان بابا راح بعربيه مع نفسنا يعني.... وشكر خاص جداً جداً جداً للأستاذ أحمد عبد الحميد ( والد دعاء صاحبتي الانتيم :) ) على الوقفه الجميله اللي وقفها معانا دي ...وشكراً لأحمد مبارك على صورة الرئتين... ده بس كان شكر واجب

أه على فكره الهلال شكله حلو أوي النهارده... أول مره أشوف شكل الهلال حلو أوي كده :)

ياااه شكراً انك قريت لحد هنا والله ... ونأسف للازعاج والكلام الكتير ... وعيشوا شويه في اللينكات دي

http://www.factofarabs.com/healthy12.html

http://www.saaid.net/Minute/108.htm

http://www.amrkhaled.net/articles/articles49.html

عام هجري جديد

2008-01-08T04:25:00.001+02:00

كل عام وانتم بخير وعساكم من عواده :):)... عام هجري يعني فيلم الشيماء وهجرة الرسول وهجرة الاسلام والأفلام اللي بتيجي بصراحه مش فاكره اسمها.. وسلام خاااص للانتاج اللي مش هاين عليه يعمل فيلم ديني جديد
طبعاً أصلاً انتوا مش فاكرين ولا عارفين احنا في سنة كام دلوقتي !! يااااااااااه من زمان أوي الواحد ماكتبش التاريخ الهجري .. طيب احنا كنا في سنة 1428 ودلوقتي 1429 وعلى فكره العام الميلادي 2008 فيه ثلاث سنوات هجريه !!! علشان طبعاً السنه الميلاديه أطول من الهجريه و 2008 بدأت و 1428 لسه موجوده ودخلت 1429 في بداية 2008 وان شاء الله 1430 هتدخل في نهاية 2008 ... يانهار أبيض إيه الأرقام دي كلها :| .. مشاكل سنين مع بعضها مالناش احنا دعوه
المهم احنا بقينا دلوقتي في عام 2008 ميلادي و 1429 هجري ... بالمناسبه بقى .. حد فكر يحسب عمره قبل كده بالهجري؟ هتلاقي نفسك كبرت على فكره بس مش أوي :)... طيب نحسبها كده .. زود 11 يوم على كل يسنه من عمرك ... يعني اضرب 11يوم في عمرك واجمعهم على عمرك وشوف عمرك هيطلع كام :)))... حد فاهم حاجه ؟؟
في برامج بتعمل الموضوع ده :) ماعلينا

يعني أنا مثلاً اتولدت يوم الاتنين 14-07-1986 يعني بالهجري يوم الاتنين طبعاً برضه 07-11-1406
بس مش فاكره حقيقي كانت الساعه كام .. أصلي لما اتولدت ماكنتش لابسه ساعه
:| من 1406 ل 1429... لا لا لا حلو أوي عمري بالميلادي يعني بالهجري كده 22 سنه وكام شهر
مش عارفه ليه البرامج بتقول ان يوم 07-11-1406 ده كان يوم الأحد ... طيب ازاي وانا أصلاً مولوده يوم الأتنيين :@ ايه اللغبطه دي ... مش لاعبه

السنه اللي فاتت نقول 2007 :$ بصراحه كانت سنه حصلت فيها حاجات كتيييييير وغريبه أوي

بس اللي بجد فرحانه انه حصل اني كسبت ناس كويسه أوي وخسرت ناس مش كويسه - من ساءت أخلاقه طاب فراقه- عموماً أنا كتبت كل حاجه في بوست قبل كده.... غير التخرج ومواقف مشروع التخرج والمشرف العبقري والكلام اللي مش عايزه أفتكره
المهم المهم
امممممممم ... تصدقوا بجد أنا مش عندي حاجه مهمه أقولها أنا بس كنت عايزه أقول كل سنه وانتم طيبيين بمناسبة عام هجري جديد

سيدات فقط !!!ا

2008-01-03T23:59:00.002+02:00

ايه رأيكم في المترو الفاضي ده ؟؟ طبعاً حلم بعيد المنال
كلنا عارفين طبعاً ان العربه الأولى من مترو الأنفاق سيدات فقط طول اليوم والتانيه سيدات فقط لحد الساعه 6 مساءً
6.01 الرجاله ما بتصدق تأخد حقها في المترو و تركب العربه التانيه ومعاهم حق بصراحه
من ساعة بقى الحادث بتاع السيدات الفضليات اللي صدعوا السواق لأنهم طبعاً وراه على طوول ومش بيبطلوا رغي لحد ما السواق ساب المترو مع نفسه وفقد أعصابه والمترو خبط في المصدات بتاعة محطة حلوان وهما غيروا النظام ده
عربة السيئات - عفواً السيدات- بقت الرابعه والخامسه علشان وجع الدماغ وعملوا علامات على الرصيف ان المكان ده سيدات فقط بس تقول لمييييييييييييين .... يالا شويه ويتعودوا ... وعلى رأي واحد قال ان كده أحسن علشان ضغط المترو هيقل والزحمه هتتوزع على المترو كله علشان كانت الرابعه والخامسه دول فيهم زحمه أكتر
موضوع صداع السواق ده مش أول مره على فكره أنا شوفت بعيني مرتين السواق طلع من مكانه بس كان واقف في محطه يعني وزعق للسيدات :@ وقالهم كفايه رغي بقى .... الغريب ان 99.9% في اللي بيرغوا مع بعض مايعرفوش بعض وتلاقيهم عمالين يتكلمو في تفاصيل البيت وابني واخويه وجوزي :@:@:@ عالم مستفذه
على فكره بجد في قدرة رغي عجيبه للسيدات مش عارفه ربنا بيقدرهم على رغيييي يا ساتر أعوذ بالله
انسى الستات اللي بتشوفها في الشارع وانسى الابتسامات وانسى اللي بتشوفهم في المترو حتى في العربات المختلطه لا لا لا الست من دول مجرد ما تركب عربة السيدات بتتحول تماماً بجد ربنا لا يوريكم
أنا بكرهه العربه دي بجد أوييييييييييي ومش بركبها أصلاً طول ما مافيش زحمه في المترو .. دي كرهتني في الستات
كده شالو الازعاج من عند السواق الحمد لله واتوزع على المترو كله وربنا يستر على الركاب بقى
فعلاً فعلاً
no women no cry no 7wades no soda3 no 7ar2et dam no problems no moseba no ay 7aga w7sha
صدقت يا باشمهندس أحمد مبارك لما كتبت إن كيدهن عظيم

From The Beginning To End

2007-12-29T05:03:00.002+02:00

كل سنه وانتم طيبين بمناسبة عام ميلادي جديد
يارب يكون عام سعيد علينا كلنا

بعد الكام بوست اللى كلهم كلام جد و أنا ماتعودتش على كده ... علشان كده وفيت بوعدي ووعد الحر دين عليه :( ربنا مايوقع حد في وعد.. وجبت ترجمة البوست ده
أو بمعنى آخر 처음부터 지금까지
처음부터 끝까지
فاكرينه ؟؟؟ أيوه اللي كتبته قبل تسليم مشروع التخرج تمام تمام .. أيوه الاغنيه اللي كتبت كلماتها وأعجبتوا بيها جداً أنا عارفه ... اللي قلتولي ذوقي رائع في اختيار الكلمات واللحن ... طيب ما تدوسوا على اللينك وتفتكروها أسهل
ده بقى النطق والترجمه اللي وعدتكم بيه .. يالا خلينا نبدأ السنه بالعقل كده ( الوفاء بالوعد قصدي)
أنا مش عارفه ايه الهبل اللي هعمله دلوقتي بس حبيت اني أكتب الترجمه بايدي واتعب نفسي يعني
يالا مش مهم الكلمات أهي النطق والترجمه
Please Excuse the Mistakes :D
طبعاً واضح النطق فوق باللون الأزرق والترجمه تحته باللون النبيتي و الأغنيه فوق :)... على فكره لو سمعتوا الاغنيه وقريتوا الكلام اللي في البوست اللي فات بالنطق ده والترجمه هتتعلموا كلمتين كوري ينفعوكوا لما تسافرو اليابان :) بجد دي لغه حلوه أوي ولذيذه أوي والأغنيه تحفه والدراما دي أصلاً كلها تحفه بس للأسف اللينكات اللي كانت على جوجل فيديو اتشالت ومش موجوده حلقاتها علي youtube:(:(
هما استنوا لما أنا شفتها وجالي اكتئاب من المسلسل وشالوا الحلقات تقريباً كانوا عيزين ينكدوا عليه أنا بس
ما علينا النطق والترجمه أهم

Nae ge ol su obs-e'l go la go ,
You will never come back to me
---------------------------
I Jen ge`lol su ob da go
And you can't do it
---------------------------
Je bal ge`man ha la go na le'l dal lae Ji
Please stop doing so, you comfort me like this..
---------------------------
Jong mal iJ-o bo li go sip-o
If I can't see you again,
---------------------------
Da sin bol su ob da mion
Really wanna forget..
---------------------------
Ne le'l Jab go it ne`n, no e mo de`n gol
All about you that hold me
---------------------------
Na ga ut go sip-e'l dea ma da non
Whenever I wanna laugh, you make me cry..
---------------------------
Na Le'l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
When I miss you, I break down like this
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I lot ge ma no Jio bo ligo ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
When I miss you I break down like this
---------------------------
lj-e`l su ob ge ha ni ga
Even though I try to forget, I can't do it

****************************

Jong mal iJ-o bo li go sip-o
If I can't see you again
---------------------------
Da sin bol su ob da mion
Really wanna forget..
---------------------------
Ne le`l Jab go it ne`n, no emo de`n gol
All about you that hold me
---------------------------
Nae ga ut go sip-e`l dea ma da non
Whenever I wanna laugh, you make me cry..
---------------------------
Na Le`l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
When I miss you I break down like this
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I lot ge mu no Jio bo ll go ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
When I miss you I break down like this.
---------------------------
lj-e`l su ob ge ha ni ga
Even though I try to forget, I can't do it
---------------------------
Dan han sa lam-e`l
Even though I try to forget
---------------------------
Sa lang ha ne`n ge I to lok
I can't do it
---------------------------
Him de`n-il-in jul, nan Jong mal mol las-o~
I didn't realize loving one is so hard like this

***************************

Na Le'l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
Whenever I miss you, I break down like this.
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I ro gem u no jio bo li go ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
Whenever I miss you I break down like this
---------------------------
lj-e`l su ob ge ha ni ga
Even though I try to forget, I can't do it

يارب الأغنيه المره دي تكون عجبتكم بعد النطق والترجمه
كده فاضل بوستين وعد مني برضه :(:(:( يدينا ويديكوا طولة العمر

ثقه أم غرور !!!!ا

2007-12-25T03:27:00.003+02:00

كثيراً ما أفكر وأتسأل.... هل ما أشعر به هو ثقة بنفسي أم غرور؟.... والغريب أنني لا أجد اجابة مقنعه بالنسبة لي
عندما أشعر بإحساس الثقه وأنني قادره على اجتياز اختبارٍ ما أتراجع خشية أن يكون شعوري هذا غرور
عفواً... من الممكن أن يكتمل المقال لغة عربيه ولكن لا استطيع ذلك نظرا ً لغيابي الطويل عن الكتابه باللغه العربيه و

علشان برضه مش واثقه ان اللغه العربيه اللي كتبتها والل هكمل بيها هي لغه عربيه صحيحه.. ولذلك هكمل الموضوع لغه عاميه دارجه كالعاده
نرجع لموضوعنا.. آسفه على المقاطعه

حقيقي ايه الفرق بين الثقه بالنفس والغرور؟؟؟ أنا أعرف ان الفرق بينهم حاجه بسيطه أوي .. علشان كده كل ما أحس اني واثقه في نفسي أتراجع وأقول لأ بلاش غرور!! وأنا مش عارفه اذا كان اللي حسيت بيه ده غرور ولا ثقه
علشان كده قلبت معايا بتهور منعاً للتردد!!!! مش مهم مش مهم .. يمكن تفهموا الجمله دي في الآخر

يمكن أنا متعقده من موقفين كده زمان والاتنيين كانوا في رابعه ابتدائي !!! هقولهم ولا بلاش لأ هقول وخلاص
الموقف الأول كنا في حصة عربي والاستاذ -المحترم الله يكرمه بجد- أستاذ حاتم سأل سؤال ومش فاكره قال اللي هيجاوب عليه هيعمله ايه (أنا فاكره السؤال بس مش هقوله علشان بعتبر الحاجات الصغيره دي ذكريات سريه) المهم مافيش حد خالص كان عارف الاجابه الا أنا كنت عارفاها بالتخمين وقدرتي المنيله اللي بتوقعني في حوارات قدرتي على التجميع والربط الحمد لله.. بس لعدم ثقتي في الاجابه ماردتش أقوم أقول الاجابه ولما قالها ماقدرش اوصف مدى الحسره والندم اللي كنت فيهم ساعتها ولحد دلوقتي .. بعدها بكام سنه سمعت جملة كده بتقول الندم عى مافعلت أفضل من الندم على ما لم تفعل ومن هنا جيه التهور!! بقيت أعمل حاجات بسرعه علشان ماترددش وأفكر أعمل ولا لأ واندم اني ماقلتش أو ماعملتش... بس ده مش ثقه بالنفس ده تهور يعني الموقف ده له علاقه بتهوري وردودي اللي كنتوا بتشوفوها على الميل جروب ياخوانا يا FCI-HU 2003-2007
بس تهور مقبول الحمد لله
الموقف التاني برضه في امتحان العربي جبت 30 من 30 في امتحان الشهر أعلى درجه وجيت قلت لماما وأنا فرحانه أوييييي شوفتي يا ماما جبت أعلى من إيمان ونهى( ايمان ونهى دول بنات مدرستين في المدرسه وكانوا شاطرين ماشاء الله واصحابي والله ماكنش حقد يعني بس فرحت اني جبت أعلى من أشطر 2 انجاز يعني) قالتلي طيب بس ماتتغريش ... الكلمه دي ماتتخيلوش كان تأثيرها ايه عليه فضلت أبكي باقي اليوم ومن ساعتها خايفه أتغر
أه كان فيه برضه في حصة العربي دي موضوع الغرور والتواضع دردشه يعني مش حصه وكنت نفسييي أسأل أستاذ حاتم وأستاذ أشرف -أحسن مدرس في الدنيا كلها- كان نفسي أقوله هو ممكن الواحد يكون مغرور بانه متواضع!!!ا وندمت ولحد دلوقتي بندم اني ماسألتوش
يالا معلش طول عمري عاقله :$ واضح ان ذكرياتي كلها في سنه رابعه بس :)ا
وواضح اني بعدت عن الموضوع بعض الشيء

***************

بجد بجد بقى.. لما مثلاً الواحد يدخل امتحان ويقول لأ هنجح ان شاء الله ولما يخلص يبقى واثق انه ناجح ده غرور ولا ثقه بنفسه؟
يعني أنا مثلاً فرحانه بذكائي غرور مني ولا ثقه في ذكائي؟
الغريب اني جربت الاختبارات بتاعة الثقه بالنفس دي -من الفيس بوك برضه- لقيت اني واثقه في نفسي يعني ده مش ضعف في ثقتي بنفسي .. كمان لما قريت وسمعت كذا حاجه للدكتور ابراهيم الفقي لقيت اني كويسه واثقه في نفسي يعني .... يمكن ده خوف من موضوع الغرور

في صديق قالي قبل كدده ان المفروض مدام الواحد مش واثق في نفسه يبقى من حقه انه يكون مغرور علشان يقدر يوصل لدرجة الثقه بالنفس المطلوبه الكلام ده عجبني أوي بس برضه لسه خايفه من شعور الغرور
أنا عايزه أبقى واثقه في نفسي :( مش عايزه أتغر في نفسي
اللي أنا متأكده منه اني واثقه في نفسي الحمد لله لكن مش عايزه أوصل للغرور... وبداية البوست تؤكد كلامي
ومن ضمن كلام دكتور ابراهيم الفقي أو من موقف قريته في كتابه يعني يؤكد ان انا لو مش عندي ثقة في نفسي ماكنتش عملت مدونه
ايه اللي يفرق بين الاحساس ده وده؟؟؟؟
أه على فكره الصوره اللي فوق دي أنا بشبه عليها مش فاكره شوفتها في بلوج حد ولا ايه لو أه قلولي علشان اشيلها لو اللي كان حاطيتها مضايق يعني بس انا عموماً جايباها من جوجل
أخيراً وليس آخراً ان شاء الله أتمنى ان كلامي يكون كالـــــــــعــــــاده مفهوم وواضح وصريح :)ا

تاج بقرار رئاسي

2007-12-18T22:03:00.002+02:00

أولاً : كل سنه وانتم طيبيين لكل الناس وعيد أضحى سعيد علينا كلنا

وأنا في انتظار العيديات :$ كاش أو شيكات أو حتى يعني هاجي على نفسي وأقبل عيديه بسيطه ماحدش عمره بيقبل عيديه لاب توب بس أنا من تواضعي الشدييد وحرصي على فلوسكم هقبل لاب توب عيديه وأمري لله بقى ... وماحدش يديني خروف ويقولي دي العيديه دي تبقى مشكله كبيره أنا مش بحب اللحمه بتاعته أصلاً ... انتوا حريين بقى دي طلباتي في العيديه ...وممكن برضه أقبل تعليق بسيط في العيديه بتاعتي منكم يااااه ده أنا طيبه أوي... صحيح أنا كل ما بسأل حد يقولي مش باكل لحمة الخروف طيب ليه بقى الخروف بيهرب في العيد مدام أغلب الناس مش بتكله ده عبيط أوي !!ا

---------------------------

ثانياً
أنا اتوجهلي تاج من رئيس جمهورية نفسي يعني تكليف رسمي رغم ان التاج صعب أوي أوي أوي بصراحه بس تكليف بقى أعمل ايه ... وخصوصاً ان بقالي كتير بسرق التاج مش بيتوجهلي :$
المهم ندخل على الأسئله

لو ماكنتش مصري بس عربي كانت هتبقى ايه نظرتك للمصريين واللي بيحصل في مصر دلوقتي؟

للأمانه يعني أنا ماتخيلش نفسي ولا أحب أتخيل اني مش مصريه .... بس علشان أرد على السؤال ... كانوا المصريين هيستفذوني أوي وهقول هما ليه عاملين في نفسهم كده وليه بيعملوا كده بس عموماً أنا مش بحب أفرض حاجه وأجاوب على أساس الفرض ده يعني من الآخر ممكن تكون الاجابه دي أي كلام ولما أكون عربيه مش مصريه كنت هضحك على المصريين بقى ولا يصعبوا عليه.. الله أعلم

***************

لو كنت أوروبي أو غير مسلم هتبقى نظرتك ايه للعرب والمسلمين؟
نفس موضوع الفرض اللي مش بحبه... لو كنت أوروبي وعندي عقل شويه كانوا العرب هيصعبوا عليه أوي.. لكن لو كنت أوروبي وماشي مع أفكارهم من غير تفكير كنت هقول على العرب دوول مش بيفهموا حاجه وهيفضلوا طول عمرهم أغبيه
لو كنت غير مسلم وعندي عقل برضه كنت هعرف ان في كل دين في تطرف وكنت مش هفكر في موضوع المسلمين وغير المسلمين ... و لو كنت غير مسلم ومن الناس اللي اتولدت لقت نفسها كده وبسمع الكلام من غير ماأفكر فيه كنت هشوف المسلمين على انهم ارهاب وغاويين مشاكل ومش عاجبهم حاجه
بس طبعاً الحمد لله على اللسان العربي وعلى نعمة الإسلام

***************

لو قالوا لك انت بقيت رئيس جمهوريه هتعمل ايه؟
أنا أساساً مش بحب المسؤليه الكبيره أوي دي ... رئيس جمهوريه يعني هتحاسب على ان حد يقول آه ومايلاقيش مكان في مستشفى كويسه ولو حد جاع ومالاقش ياكل ولو حد ماشي واتكعبل في الطريق في حاجه وقعته ......... بس لو بعد الشر حصل وقالولي كده مع اني مش عارفه مين اللي قالولي......ا
أنا هقتبس من رئيس جمهورية نفسه بعض النقاط بس فعلاً كنت هعمل كده

ثانياً: هجيب ناس أهل للثقه يمسكوا الوزارات ويمشوا البلد على العجين مايلخبطهوش
ثالثاً: همنع حاجه اسمها واسطه وهلغى أكلة الكوسه والبتنجان من البلد-

رابعاً: هرجع العلماء من بره واحافظ على سلامتهم وحراسه بقى وكده واعملهم كل اللي هما عايزيه علشان أبحاثهم
خامساً: هلغي المواكب وانا كمان لو الناس بتحبني همشي من غير حراسه أصلاً

***************

لو سمح ليك برؤية الرسول عليه الصلاة والسلام وإنك تقوله كلمه واحده ؟

والله أنا نفسي ومنى عيني أشوفه بس في المنام
هقوله ايه دي بقى مش عارفه بس غالباً برضه مدام حاجه واحده تبقى حاجه بالدنيا كلها اللي هي الشفاعه طبعاً

***************

لو كنا في عصر اذهار الأندلس كنت تتخيل نفسك إزاي؟
على فكره مش بحب لو دي خالص:)....بس لو في عصر الأندلس يعني هكون بنت برضه ماحبش اني اتخيل نفسي خالص بقى :):):)ا

***************

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
مش عارفه ... هو أنا فكرت في الموضوع ده بصراحه قبل كده ومالقتلوش حل ... بس أنا مش ندله الحمد لله وممكن أتنازل عن الموضوع ده هي الحكايه دي صعبه بس المعروف عني اني مش ندله أو يعني اني هبله زي ماتحسبوها بقى ورومانسيه حبتين تلاته كده.... بس لو كان الشخص ده أنا مخطوبه ليه كده وخلاص يعني مش بحبه يعني :) هتفرق طبعاً وهطلع ندله

***************

لو طلعت القمر هتكتب عليه ايه؟
السؤال ده جامد جداً بصراحه ... بس ماعنديش اجابه :)ا
مش عايزه أطلع أكتب حاجه دلوقتي بس لما يبقى فيه حاجه تتكتب هبقى أقول على طول :D

***************

لو مررت التاج لحد وماجاوبش هتعمل إيه؟

هو أنا بضايق شويه يعني -- في فرق بين اني اضايق و اني ازعل-- لكن مش بزعل والله ... يعني لو مش عايز يجاوب يعتزر عنه ويبقى خلاص .... علشان كده مابقتش أتاج حد خالص :)ا

***************

تمرر التاج لمين؟

ما أنا لسه قايله اني مابقتش أمرره لحد :) ا
بس أي حد عايز يجاوب عليه يبقى ياريت يعني... عايزه كل اللي بيعلقوا عندي يجاوبوا :P

Message Offline

2007-12-10T22:43:00.001+02:00

أنا عملت تعديل بسيط ياريت يا جماعه تقروا اللي مكتوب باللون الأحمر

السلام عليكم ورحمة الله وبركاته

كل يوم طبعاً لما تفتح الياهو ماسنجر بتاعك تلاقي رسائل كتيييييييير أوفلاين
بصراحه أنا شخصياً بضايق جداً من الرسائل دي إلا إذا كانت رساله فيها دعاء معين بس ماتفرضش عليه اني ابعت الرساله دي لكل اللي عندي
يعني في مثلاً رساله بدايتها يقولك أقسمت عليك بالعزيز الجبار انك تبعت الرساله لكل اللي تعرفه طيب انت مالك انت ابعت ولا مابعتش وتحلف عليه ليه أصلاً ... أنا بصراحه الرسائل اللي بدايتها كده مش بقرأها أساساً طب علشان تكسب الثواب شيل الجزء الأول من الرساله واكتب بقيتها خليني حتى أقرأها
وبعدين أنا أجزم ان مش كل اللي بيبعت الرسائل بيقرأها الأول قبل ما يبعتها مثلاً في رساله كانت منتشره أوي من فتره وأعتقد انها لحد دلوقتي بتنتشر وهي غلط أصلاً ... الرساله دي كانت بتقول ان المسلمين مضطهدين في هولندا أو حاجه كده مش فاكره للأسف المهم ان الرساله دي كان فيها لينك Voting
واللي فهمته من الرساله انك تدخل تعمل فووت على نصرة الاسلام حاجه زي كده يعني
بعد شويه هتبعت طبعاً الرساله دي لكل الناس مع العلم انك مش هتفتح اللينك
بعد شويه تلاقي نفس اللي بعتلك الرساله اللي هو برضه مافتحش اللينك ولا عمل فووت ولا حاجه بيبعتلك رساله تكذيب يقولك فيها معلش أصل اللينك ده بيتغير كل شويه لأنه بطبيعته لينك تصويت المهم أنا دخلت على اللينك ده مره من المرات لقته طبعاً مش مكتوب انجليزي مكتوب بلغه زي الالماني خدت السؤال وترجمته على جوجل
From Dutch to English
طلعلي حاجه مالهاش أي علاقه بالدين خالص وده اللي أكدلي ان ماحدش بيدخل على اللينك وماحدش بيتأكد من أي حاجه قبل ماينشرها
مافيش مانع اننا ننشر الرسائل اللي فيها دعاء معين بس مانقسمش على حد انه يبعتها لحد كده احنا اللي هناخد الذنب.... عامله زي انك تحلف على حد بالطلاق انه يعمل حاجه ومايعملهاش يبقى كده انت اللي خسران
في رساله اتبعتت وانتشرت أوي على الفيس بوك واتبعتتلي أنا كمان ...الرساله دي عن حادثه حصلت لبنت - حادث يمس السمعه- وفي صوره مع الرساله دي لبنت أنا بصراحه أول ماشوفت الرساله قلت طيب ليه صورة البنت يحطوها طيب وأكييد طبعاً مابعتش الرساله لأي حد الحمد لله... بعد يومين أو أكتر نفس الشخص اللي بعت الرساله بعت رساله تانيه مكتوب فيها يا جماعه لو سمحتم تشيلوا الصوره دي علشان دي مش البنت اللي حصلها الحادث وحرام تسؤا سمعتها .... طيب بعد ايه يعني ما كان اللي بعت من الأول شال الصوره حتى لو كانت البنت برضه حرام ... يا جماعه بجد شيء من التفكييييير يا جماعه مش هينفع كده
أخيراً :: ياريييييييييييييت نتأكد من الحاجه الأول بدل ما ننشرها كده واحنا مش متأكدين وتطلع في الأخر غلط

شوية كلام مع الشكر والاعتذار 3

2007-12-09T02:50:00.000+02:00

أيوه هو البوست بعينه :$ ا
زودت فيه رقم 16 و 17
أنا طبعاً لحد ما بعرف الشخص اللي بكتب عنه بتبقى حاجه صعبه شويه علشان كده صعب اني اعمل تعديل و أكتب كذا شخص في نفس الوقت وخصوصاً اني عارفه ناس كتير سواء من بعيد أو قريب لأن كمان مش كل ال18 دوول اصحابي أويييييييييي فيهم ناس عارفهم من موقف أو كلام بسيط بس
عموماً البوست ده عزيز عليه أوييي علشان الكلام اللي كتبته على الناس بصراحه مااقدرش أقوله ليهم وجهاً لوجه مع العلم ان الكلام ده لا يعتبر غيبه لأن الاشخاص مش واضحين الا لنفسهم ولو فيهم حد واضح يبقى الناس اللي اتكلمت عليهم كويس لكن اللي وصفتهم انهم مش كويسين (من وجهة نظري وبعض المواقف) هما عارفين اني كتبت عليهم الكلام ده برضه وكل واحد الحمد لله استنتج نفسه حتى لو فيه تشابه حروف
أكرر الملحوظه: كلمة شخصية لا تعني انها مؤنث لكنها مجرد مفرد لكلمة شخصيات
البوست:: شوية كلام مع الشكر والاعتذار