السلام عليكم ورحمة الله وبركاته
بعد طول غياب لدرجة اني مش عارفه أوشي ودي فنكم مين ولا حتى أودي وشي منكم فين
قررت ان أكسر الحاجز النفسي بيني وبين المدونه واني أكتب تاني خصوصاً بعد الاشاعات اللي قالت اني اعتزلت التدوين والقاهره اليوم والبيت بيتك أذاعوا الخبر لأهميته القصوى
وعمرو أديب ومحمود سعد اعترضوا بشده
طبعاً يا جماعه انتوا مش مقدرين يعني ايه خبر يقول ان Rehab M.K. (:P برضه) تسيب المدونه
فقولت لازم أرد بقى
المهم اني جيت يعني
كنت عايزه أتكلم عن برامج المسابقات الفذيعه الشنيعه اللي بتتعرض على التليفزيون
على سبيل المثال : قناه زي Melody Trix , Strike (غالباً دي أسمائهم) وحاجات كده كتير مش فاكراها
في قنوات مخصوصه للمسابقات دي
بس نصيحه اللي عنده الضغط أو لو حتى عصبي شويه يبعد عن المسابقات دي لما تحمله من غباء وحرقة دم وهبل بالعبط
أعتقد ان اختبار المذيعين والمذيعات بيتم على قياس درجة الهبل
والله يا جماعه أنا مش بحب أشتم حد كده خصوصاً على الملأ بس كده كتير بجد
هقولكم حاجات من اللي سمعتها بغض النظر عن الاغاني اللي شغاله والمذيعين اللي بيتنططوا طول البرنامج ولا ماعرفش ده عادي ولا ايه المهم مثلاً جايبين أرقام من 1 لحد 12 ورقم 8 ناقص ويقولك فين الرقم الناقص وتعد تعد وتيجي لحد 7 تقول ها يا جماعه 7 ايوه 8 9 وتكمل ل 12 والمصيبه مش ف البرنامج أكتر من اللي بيتصلوا ويجاوبوا دول اللي بجد يجيبوا شلل
وحاجات تانيه زي أمثال كلامها بعيد عن بعضه ويقولك جمع المثل وهو بيقولوا والناس سبحااااااان الله ع اللي بيتصلوا دول
اللي جامده بقى بجد يعني فزوره بتقول أخت خالك ومش خالتك تبقى ميين ... واحد اتصل بيها وقالها عمتي :( يانهار أبيض دي ماجابتش سيرة عيلة الأب خالص ده أنا لو قلتها لعيل صغير هيفهمها
واللي تجبلك صورة فيلم جعلتني مجرماً وتقولك ها يا جماعه اسم الفيلم جعلتني ايه قصدي..ايه مجرماً
وصورة فيلم مرجان أحمد مرجان... ها يا جماعه الفيلم كان اسمه مرجان حاجه مرجان ها اسمه مرجان أحمد ايه
يعني حتى لو ماحدش بيعرف الافلام دي هيجمع اسمه على طول مش محتاجه حتى تشغيل مخ
يانهاري على الشلل
وغيرهــــــــــــــــــــــــــــــــــــــــــــــا من الحاجات اللي بتقعد اسبوع من غير ما حد يحلها صح :(
الناس دي ايه .... منيين وليه وازاي .... لو الكلام ده بجد والناس اللي بترد دول بجد يبقوا بجد بقى مش عارفه أقول ايه ... تحس انه غباء واضح وصريح غباء بخيره كده مافيهوش لؤم ولا خبث ربنا اداهم الغباء يوزعوا على خلق الله طمعوا فيه كله .... والله أنا مش متخيله ان في ناس هبله كده ولا غبيه كده .... أكيــــــــــــــــــــــــــــــــــــد ده تمثيل
ومن جمهورية الغباء المتحده نحييكم وندعوكم لزيارة قنواتنا المتخصصه لزيادة نسبة الغباء والهبل
بس اوعى ..... مايتحرقش دمك
بس الأكيد انها مؤامره على عقولنا
ملحوظه ::: أنا مش بتفرج عليها بس لما حد بيحول ويعدي عليها كده صدفه وهو بيحول بشوف الحاجات دي لأني أصلاً بكرهه التليفزيون... يعني ماحدش يقولي غيري القناه وماتتفرجيش كده كده مش بتفرج:)
10 comment(s):
اولا: حمد للة على السلامة ونورتى بلوج اسبوت كلة
ثانيا: موضوع الاتصالات الهاتفية دة لازم يكون سؤال هايف علشان يجذبوا اكتر عدد من المشاهدين للاتصال ثانيا تبداء الاتصالات ببعض العاملين في القناة بهدف الاجابة الغلط بعض المشاهدين يسافذهم خطا الاجابات يقوموا يتصلوا علشان يجابوا صح طمعا في المكسب المالي وكل ما الاتصالات كترت ارباح القناة كترت
بس دى مش مسئولية القناة لا مسئولية اللى بيتفرج على القناة وبينساق للاتصالات اصلا
موضوع اللبس وتنعيم الصوت والرقة الشديدة برضة عامل جذب من قبل المذيعة للمشاهدين
ربنا يرحمنا ان شاء اللة
عودا احمد
وحشتنا كتابتك يا رحاب
----------------------
زى ما رئيس جمهوريه نفسى قال كده
واضيف
اعتقد كمان مش الارباح بس من الاتصالات وكده لا كمان من الاعلانات
بقو يتسبقو مين اكتر برنامج هايف لانه بيجذب اكتر نسبة من المشاهدين
------------------------
المصيبه بقى ان فعلا ناس كتير اصبحت كده , حتى مش اغبيه ولا بتاع لا ده حبا انهم يطلعو فى التلفزيون وحبا فى التفاهة يعنى
وفى مبدأ كمان طلع يعنى يقولك انا بابقى عايز اخرج بره المود بتاع الشغل فا لازم البرنامج الى اتفرج عليه يكون تافه علشان ماجهدش عقلى وكده..
----------------------------
مقوله مشهورة باردو على الموضوع الجميل ده
من فيلم الكيف:
شفت اغنية مش عارف مين ..دى لمت مليون اهيف
رد البطل وقال: علشان ماكنش في اهيف منها
-------------------------------
اخر حاجه فعلا الحاجات دى بتلغى العقول
انا مش قادر اتصور لو المستوى فضل كده وناس كتير اتأثرت بكده هايبقى ايه الموقف يعنى
تخيلى كده سنه مش عارف كام , بعد بتاع 25 سنه ولا حاجه مستوى التفاهه ممكن يكون ازاى
تلاقى ابنك بيقولك : فين ايام زمان كانت البرامج بتشجع الفكر زى برنامج الرقم الواقع وبرنامج اسم الفيلم الى هانقولك عليه كده وكده برنامج مين هى مامتك و ... و....و....
السلام عليكم كل دة غياب حمدلله على سلامتك نيجى بقى لموضوع الاسئلة دة موضوع فلوس يعنى صاحب القناه يهمه يجيب اسئلة تافهة وبالتالى الاتصالات تزيد والربح يزيد اما بقى لو جاب اسئلة صعبة كله هيتعقد ومفيش حد هيتصل وبالتالى هتكون خسارة كبيرة للقناه وحسبنا الله ونعم الوكيل فى اصحاب القنوات التافهة دى
انتي بردو كنت منقطعة
ايه الموضوع هي شوطة في المدونات ولا ايه
اما بالنوسبة للقنوات البشعة دي فحدث ولا حرج
انا ببقى عايز اكثر التليفزيون
وبعدين بيبقى نفسي اعرف البنات دي ليها اهل ولا ايه
ناس فزيعة فزيعة
حمد الله ع السلامة
تحياتي
محمد سمير
->@ رئيس جمهوريه نفسى
أولاً الله يسلمك ...أشكرك بجد
ثانياً: مانا أعتقد برضه ان أغلبها من العاملين وفعلاً بيستفذوني لكن مش بفكر أتصل
ربنا يرحمنا
شكراً يا رئيس:)
->@ Emad Melad
وكتاباتي كمان وحشها البلوج ... مين أحمد ده :P
ده لو واحد المود بتاعه مش كويس لو اتفرج على الحاجات دي ضغطه هيرتفع
:)) فيلم الكيف على رأيه اديني ف الهايف
بجد احنا مش ناقصين عقولنا تتبهدل أكتر من كده
شكراً يا باشمهندزززز عماد :)
->@ Geo Amr
وعليكم السلام ورحمة الله وبركاته
الله يسلمك
أنا متهيألي لو احترموا عقولنا شويه هيكسبوا أكتر على الأقل احترمهم لنفسهم
حسبنا الله ونعم الوكيل
أشكرك على التعليق :)
->@ غمض عينيك
شويه كده :)
باين فعلاً ان مالهمش أهل اواي يتفرجوا عليهم بالتفاهه دي ولحد الفجر
ناس بشيعه بشيعه :)
الله يسلمك يافندم
أشكرك على التعليق بجد
هو من المؤكد ان الاتصالات دي من ورا التاره اللي في الخلفيه في كام واحد قاعدين بيغيروا صوتهم
تفاهه و هبل
->@ koukawy
فعلاً قمة التفاهه والهبل منهم
أشكرك على الزياره والتعليق:)
Post a Comment
قول رأيك