بين الأخلاق والزمان

لما غبت عن أصحابي في ظروف غامضه ورجعت أكلمهم تاني لاقيت في اختلاف ملحوظ ... كل لما أكلم واحده أقولها ايه يابنتي طولة اللسان دي تقولي أه مانا اتعلمتها والحمد لله ماهو الواحد لازم يبقى كده علشان يعرف يتعامل مع الناس
هو يعني الواحد مايعرفش يتعامل مع الناس الا بطولة اللسان والشتيمه... بجد كتير منهم ألاقيهم بيشتمو بابن كذا كمان (طبعاً إلا بعضهم) وبصراحه اللي بلاقيها لسانها انحرف كده ببعد عنها علشان مش هعرف أتعامل معاها
يعني المفروض اني أتعامل مع الناس بالطريقه اللي أحب يعاملوني بيها أنا ماقبلش على نفسي ان حد يشتمني بالأهل --هما أهلي كبروني علشان يتشتموا في الأخر؟!-- وبالتالي مش هشتم حد

الحاجه الأغرب اللي لاقيتها اليومين دول بقى... المفروض برضه ان معاملة الزوج وزوجته والخطيب وخطيبته تكون فيها احترام من الطرفين لبعضهم وبما اني بتكلم في نقطه واحده اللي هي طولة اللسان يبقى ماينفعش حتى أهزر مع زوجي أو خطيبي (لما ربنا يكرمني يعني ان شاء الله) وأشتمه ولا بيني وبينه ولا قدام الناس ولا حتى بيني وبين نفسي والا هكون مش محترماه وانسان مش بحترمه مش هقدر أعيش معاه ... دي وجهة نظري ومازالت وستظل ... لكن اللي بلاقيه من اللي حواليا --ودي حصلت قدامي كذا مره-- ان الشتيمه دي حاجه عاديه يعني واحد يشتم خطيبته وهي تشتمه عااااااااادي جداً على انهم بيهزروا وكل اللي بعمله اني ببص للاتنين بقرف وبسكت أصلي لو اتكلمت هبقى ايه العقد اللي انتي فيها دي احنا بنهزر (وحصلت فعلاً واتقالي كده) ...واحده كانت بتتكلم عن زوجها المتوفي وبتقول كان بيقولي كذا وكذا شتايم يعني وكأنها بتقول انه كان بيدلعها ياماما ده كان بيشتمك بأهلك أنا مش عارفه الناس اللي بتقول واللي بتسمع مش مستوعبه ولا ايه
يعني انت ترضاها على نفسك ان خطيبتك أو زوجتك تشتمك وتبقى عادي انت زعلت ولا ايه احنا بنهزر؟؟؟؟؟؟

أنا يا جماعه مش معقده بس كل حاجه في الدنيا لو حدودها اتكسرت هتبوظ أو تتتهز... الزمان أه اتغير بس احنا اللي بنغيره ومهما اتغير الأخلاق مش بتتجزء... أنا كنت قولت قبل كده اني عايزه أخد كورس في الشتايم علشان أنا بليده أوي فيها وساعات مش بعرف ان اللي اتقال ده شتيمه ولا بعرف معناها لكن دلوقتي مش عايزه بصراحه أخد كورسات الحمد لله ان لساني مش واخد على الشتايم ويارب مايتأثرش بالالسنه التانيه

موضوع تاني له علاقه بالأخلاق برضه التعامل مع الناس بس في المصالح ... رشوه وواسطه... مهما اختلفت المسميات الرشوه رشوه لعن الله الراشي والمرتشي والواسطه واسطه وبحس كده ان الواسطه بنت عم الرشوه أو أختها قريبه منها أوي لأن ليها نفس المعنى انك بتعمل حاجه ممكن تكون سبب في انك تاخد حاجه مش من حقك بس المشكله ان ده بيتطلب منك يعني الموظف يقولك فين السجاير بتاعتنا أو يقولك معاك واسطه؟ بجد ربنا يرحمنا من الرشوه والواسطه والناس الظالمه
السؤال المهم بقى هنعلم أولادنا ايه؟؟؟؟؟؟؟؟ هنعلمهم الأخلاق المعروفه ولا هنعلمهم اللي يتعاملوا بيه في الزمن اللي احنا فيه أو اللي هما هيبقوا فيه ... ولا هنعلمهم الأخلاق وهما يصتدموا بالواقع؟؟


4 comment(s):

محمد المصرى | July 1, 2009 at 11:58 PM

اولا ازيك يارحاب وعلى فكرة مدونتك جميلة والاجمل انك بتعبرى بيها عن نفسك
ثانيا :الاحترام هو الكلمة اللى باتت مفقودة فى الزمن ده وطبعا اللى بيضم معنى احترام الذات والغير ولهذا انت عبرت بتلقائية جميلة عن غياب الاحترام وانا يسعدنى ان اكون زائر لمدونتك ولكى منى سلامى
مصرى مسلم دائما

Rehab Mostafa | July 6, 2009 at 6:49 PM

أولاً أنا الحمد لله تمام :) وميرسي بجد على رأيك في المدونه
ثانياً يشرفني انك تكون زائر للمدونه وفعلاً كلامك صح لكن برضه لسه في ناس محترمه كتييييييييييييير الحمد لله :)
أشكرك على ردك ورأيك بجد

glgnhof | July 7, 2009 at 8:24 AM

e7na lazem n3alem awladna enohom awel ma ykbaro ysebo el balad w ymsho yro7o balad fiha bashar msh shoyet TEEEEEET

aw n3alemhom enohom awel ma ykbaro ydrabo konbela nawawya fi masr w ymaweto 80 % mn el skan 3shan el 10% y3rafo y3esho :D

w belnesba lmawdo3 el course ana 3andy nas gamda gedan w momken ybtedo m3aky fi ay wa2t t7beeh :P

Rehab Mostafa | September 9, 2009 at 11:44 PM

->@ glgnhof
wel 10% el b2ya homa ely rmo el konbla?
wade7 enk fe mood hayeeeeeeel
wana msh 3yza a5od courses ana kda el 7md LELLAH :D 3'yrt r2yee

Post a Comment

قول رأيك