شوية كلام مع الشكر والاعتذار

حسيت إني عايزه أتكلم مع نفسي شويه فقلت أجي هنا
في ناس كتيير جات على بالي الناس دي اتعلمت منهم حاجات كتيير وغيروا فيه حاجات كتيير سواء بالإيجاب أو بالسلب
أنا هتكلم على الناس دي بأول حروف من اسمها بس (يعني هتبع طريقتك تقريباً يا عماد) المهم بجد الناس دي عايزه أشكرها أو ألومها وأعاتبها وعلشان كده هكتب بس أول حرف من الاسم هو أكيد كل واحد هيعرف نفسه وفي ناس ماتتخيلش أصلاً اني اتعلمت منهم حاجه بس هما موجودين هنا برضه
بغض النظر عن الترتيب
ملحوظه::1- أنا بجد مش عارفه مفهوم الحاجات اللي هتكلم عنها دي (الآنانيه والغدر والصداقه ... إلخ) عندي زي عند الناس ولا الناس بتعرف الحاجات دي بمفاهيم تانيه الله أعلم أنا هتكلم من وجهة نظري والكلام ده كله صرييح وفي وشهم أحسن ماتكلم من وراهم :)
2- المؤنث في كلامي معناه الكلام على شخصيه بغض النظر ولد أو بنت
3- البوست ده هيتعدل كتيير أوي إن شاء الله :)
4- أنا مش بحب أدي حد أكتر من حجمه بس المره دي أنا مش عارفه أشكر الناس اللي بشكرها دي ازاي علشان فعلاً يستاهلوا أكتر من كلامي بكتيير
5- إحتمال كبير أكون مش فاهمه الشخصيات دي بس أنا بتكلم من وجهة نظري الشخصيه
وكما يقال: من ساءت أخلاقه طاب فراقه
المهم

1-ِA.M.
غير متوقع

(updated in 05-11-07)

ماكنتش عارفه الشخصيه دي خالص بس عرفتها بالصدفه ورب صدفه خير ان شاء الله :) ... بصراحه ماكنش عندي أي انطباع خالص عن الشخصيه دي كل انطباعي عنها انها شخصيه مع نفسها يعني مثلاً مش ظاهره بين الناس شخصيه عاديه جداً يعني .... بس لما كلمت الشخصيه دي لقيت انها مش كده خالص ..... المهم الحاجه اللي خلتني اكتب عن الشخصيه دي اني اتناقشت معها في حاجات كتير في الدنيا ورأيها غير وجهة نظري في حاجات كتير رغم اني اتناقشت في بعض الحاجات دي مع ناس كتير بس كان كله كلام ومأثرش فيه كان عادي يعني .... لكن الشخصيه دي أقنعتني بحاجات كتيره ماكنتش عايزه أقتنع بيها ... علشان كده حبيت اني أشكر الشخصيه دي بجد كتيييير لأن الكلام اللي اقنعتني بيه فعلاً أغلبه صح... ربنا يخلي الشخصيه دي للغلابه :)ا

5-N.M.

بصراحه أنا كنت متأكده ان الاسم ده هيجي هنا بس كنت مستنيه حاجه جامده تحصل مش حاجه جامده من وجهة نظر الناس بالعكس وكالعاده من وجهة نظري أنا يرضه أنا مش هوصف شخصيه لأنها لاتوصف في سطور ;)
أنا بس هقول شكراً كتيييييييييييييييير علشان بجد ماكنتش متخيله الجدعنه دي كلها من غير مانا أطلب أي مساعده حتى .... والشخصيه دي بتساعدني هي كمان متخيله انها مش بتعمل حاجه بجد أنا أصلاً بحب الشخصيه دي وبجد شكراً على موقف الايميدج اللي عملته معايا ممكن يكون من وجهة نظر الناس الكلام ده كله مالوش لازمه ماحدش ليه دعوه بقى :D
أنا حبيت بس أشكر حد ماكنتش متوقعه منه حاجه زي كده ...... صحيح أنا آسفه علشان زي ماقلت كنت بتخنق من الشخصيه دي في سنه أولى بس العيب كان فيه اني مافهمتهاش صح

6-H.M.

عرفت منها اني أحاول اتحكم في الظروف وماسبهاش تتحكم فيه بس مش بنفذ الكلام ده أو بحاول وبفشل بصراحه

7-C.S.

اتعلمت من الشخصيه دي بجد حاجات كتير بحاول اتعامل بيها دلوقتي منها اني ماشتكيش كتيير وبجد تفكير الشخصيه دي بيعجبني جداً في حاجات كتيييرهي ممكن تكون شخصيه جامده شويه مش مرنه يمكن ده العيب الوحيد بس بجد أنا بحب الشخصيه دي أوي شكراً كتييييييييييييييير
على فكره ده مش قسم علوم الحاسب ده اسم لشخصيه :D

8-M.
كفايه أول حرف

ممكن برضه أتحامل شويه على الشخصيه دي بس بصراحه بحس ان مبدء الشخصيه دي أنا ومن بعدي الطوفان والمعنى واضح بس تفسيري ليه ممكن كالعاده يكون مختلف شويه أو كتيير أنا مفسراه بمواقف
من ضمن المواقف انك لما تشوف صاحبك مضايق من تصرف معين انت بتعمله المفروض انك تحاول تبطله وخصوصاً لو كان التصرف ده أصلاً مش كويس (بعتبرها من آداب الصداقه) خلاص احافظ على مشاعر اللي قدامي وماعملش كده مثلاً لكن الشخصيه دي مش بتعمل كده
ومن النوع اللي ممكن ينسب حاجات ماعملهاش لنفسه وأنا بحس ان ده منتهى الظلم والخيانه
غير كده هي شخصيه لذيذه بس هي دي نقطه الخلاف بيني وبين الشخصيه دي
أنا بس بعاتبها :)

11-E.I.A.
الاسم ثلاثي اهو :)

(updated in 01-03-10)

من اكتر الشخصيات اللي تقول خساره فيها الوقت اللي عرفته فيها... وبما ان خساره فيها حبر الكي بورد ... من أكتر الشخصيات اللي شوفتها في حياتي تكره الخير لحد ومش بس كده لأ تعشق أذية الآخرين يعني مجموعة صفات ماشوفتش زيها في بشر بصراحه ولا في أي كائن حتى... أكتر شخصيه منافقه وب100 وش شوفتها في حياتي بجد ماكنتش أتخيل ان في حد في الدنيا كده.... آسفه جداً لنفسي اني عرفت شخصيه زي دي

15-W.SH.
الشخصيه دي وأنا في قمة ضيقتي اللي هي طبعاً تالته الترم التاني قالتي ماتقلقيش وإن شاء الله ربنا هيحلها بس انتي ادعي وقولي "اللهم أجرني في مصيبتي واخلف لي خيراً منها تلات مرات" أنا بصراحه الدعاء ريحني جداً وربنا كرمني فعلاً وعديت بمعجزه بجد بمعجزه الحمد لله وحاجه كمان الشخصيه دي ليها فضل عليه اني أكمل البلوج ده إني أستمر فيه الحمد لله ووجودي في البلوج ده بيريحني كتيير أوي وبتكلم هنا براحتي وناس كتير بترد عليه بستفاد منها كتيييير... بجد شكراً كتيييير وربنا يقدر الشخصيه دي على الخير ويكرمها وبجد أنا بحب جـــــــداً الشخصيه دي ربنا يكرمها يارب

16-R.M.A

(updated in 01-03-10)

من أجدع الشخصيات اللي عرفتها في حياتي ... صريحه ... كفايه اني اقول صديقة عمري(14 سنه ماشوفتش منها اي حاجه وحشه) بس محبطه شويه :))ا