قانون ممنوع التدخين!!!ا

طبعاً احتمال 90% ان أي مدخن هيجي يقرأ العنوان مايكملش الكلام ومايفكرش يقرأ حاجه بعد العنوان بس رجاء تكملوا الكلام للأخر لحد أخر كلمه
أولاً: ده موضوع من مدونة كلام لوجيك عن نفس الموضوع بعنوان: معاك علبة نيكوتين؟؟ يارييييت تقروه
ثانياً: في مناقشه لقانون ممنوع التدخين في مصر.. طبعاً في الأماكن المغلقه ... اللي هيدخن في الأماكن المغلقه غرامه على طول والقانون ده موجود في لندن وفرنسا على فكره (مش عارفه التفاصيل بالظبط ومش مشكلتي أعرفها)... المهم أنا مش هقول ايوه كده أصلنا مش بنيجي الا بالغرامه وياريت تبطلوا تدخنوا والكلام ده كله ... أنا مش بتاعة شعارات وخاف على صحتك وتسعدني الزياره فلا تفسد الزياره بالسيجاره والتدخين ضار جداً بالصحه والكلام ده كله.. بس عايزه أقولكم ان بابا مدخن ومدخن درجه أولى وعايزاكوا تقروا الكلام اللي جاي ده للأخر
بابا دخل المستشفى 3 مرات في 3 حالات مختلفه في أقل من سنه والسبب الرئيسي في ال3 حالات دوول (التدخين)
الحاله الأولي: جلته في القلب ودخل فيها 3 عنايه مركزه ( العنايه المركزه الحرجه- عناية حالات القلب- العنايه المركزه العاديه ومنها تاني الى العنايه المركزه للحالات الحرجه) --مع الاعتذار للأسماء يعني مش عارفاهم بالظبط يعني :):) ماعلينا-- والمره دي كانت أصعب مره وأخــــــر بهدله ومن غير مبالغه شاف الموت كذا مره وعمل عمليتين برضه .. وحصله حاجه في الشريان التاجي مش فاكره بالظبط ومش عايزه أفتكر والكلام ده كله كان قبل رمضان بكام يوم ودخل علينا رمضان طبعاً
الحاله التانيه: برضه مش عارفه الاسم بالظبط بس حاجه في الرئتين والكلام ده كان قبل عيد الأضحى بيومين بالظبط السنه دي
الحاله التالته: بغض النظر عن الاسم العلمي بس هي حاله مياه على الرئه ... ودخل فيها العنايه المركزه الحرجه برضه.. وبجد مهما أوصف الحاله اللي بابا كان فيها مستحيل أعرف أوصفها وبجد قلت خلاص يعني خصوصاً انه كان بيتشاهد على نفسه وهو من غير وعي أنا وماما اتشنجنا أصلاً من المنظر ... وهو لسه خارج من المستشفى الحمد لله النهارده
على فكره بابا اللي مساعده ان الناس كلها الحمد لله بتحبه وكل الناس بتدعيله الحمد لله .. يعني مش علشان الحالات سهله ولا حاجه

طيب أنا المفروض ماقولش الكلام ده بس بقوله على اساس انه تجربه لحد مدخن علشان مافضلش أقول يا جماعه التدخين بيعمل كذا وكذا وكذا من غير دليل أهي تجربه حيه قدامكم
يعني لما حضرتك توصل سن الخمسين مثلاً في احتمال كبير وفظيع ان ده كله يحصلك طيب وعلى ايه يعني !!!ا
نمسك حاجه حاجه ... هنتكلم كلام مجانين وعاقلين ورجال الدين والاخلاق وكل حاجه

دي أولاً صوره لرئتين مدخن... الاشاعه بتاعة بابا كانت سوده على فكره والله

1- من ناحية الدين: التدخين حرام شرعاً لعدة أسباب... مش هقول الفلوس اللي بتتصرف وتتحرق ولا الصحه اللي بتدمر.. الكلام ده حفظناه... لكن هقول انها كترها بيسكر أو بيذهب العقل واللي كتيره يسكر يبقى قليله حراام .. كمان هي طعام أهل النار ... يانهار مالوش لازمه!!! يعني انت بتدعي ربنا انك ماتدخلش النار في الآخره وبتاكل طعام أهل النار في الدنيا :(
قال رسول الله صلى الله عليه وسلم { ما أسكر كثيره فقليله حرام }ا

قال الله تعالى عن طعام أهل النار:﴿لَيْسَ لَهُمْ طَعَامٌ إِلَّا مِنْ ضَرِيعٍ * لَا يُسْمِنُ وَلَا يُغْنِي مِنْ جُوعٍ﴾. «الغاشية: 6-7»ا

[والدخان لا يُسمن ولا يغني من جوع كطعام أهل النار]

كلام كتيير أويي اتقال في تحريم التدخين يعني لو عايزين تعرفوا بحث بسيييط على الحاج جوجل هيقولكم على طول

2-من ناحية الصحه: مش هقول أكتر من اللي قلته فوق عن حالة بابا الواقعيه واللي عايز يزوره ويتأكد العنوان أهو
..... انتوا صدقتوا ولا ايه مش هكتب العنوان طبعاً.. زياره بقى ونجيب بيبسي ونعمل شاي والحاجات دي لألألأ شكراً على السؤال من بعيد لبعيد :P

3- من ناحية الأخلاق والرجوله: انت يعني فاكر نفسك راجل بمسكة السيجاره ولا ايه!!! على فكره أنا عن نفسي يعني أول حاجه هسئل عليها وأرفض بيها العرسان (يعني لو جم يعني بلاش احراج :$) هو انه بيدخن ولا لأ .. لو أه يبقى سوري مايلزمنيش ... دي مش تناكه بجد بس السبب الأساسي اني بتخنق جداً جداً جداً من رائحة الدخان.... وبعدين مافيش راجل بيتذل والسيجاره بتذل جامد بجد والله ... وكمان الحاجه اللي ماتقدرش تعملها قدام أهلك يبقى ماتعملهاش خالص ... أكيد مش بتشرب قدام والدك كده عادي يعني

كفايه نواحي بقى مع ان في والله حاجات كتييييييييير بس مش عايزه أرغي كتير... نقول بقى حاجه مهمه... انت ليه ماتبطلهاش من دلوقتي أحسن ما سنك يوصل الخمسين وبعد كده مش هتقدر بجد ... فكر مثلاً انك يكون عندك زوجه و أولاد وانت بتأذيهم وبتتعبهم بالتعب بتاعك ده ... بطلها من دلوقتي أحسن والله ...وبعدين ماحدش ضامن عمره... والله حرام عليك نفسك وعمرك واللي حوليك ومالك وصحتك ماتستناش قانون علشان تبطلها يعني ....... يانهار أبيض بجد حرام

بابا يمكن كده 30 سنه بيشربها وبقت خلاص في دمه صعب يبطلها بسهوله وخصوصاً انه بينزل لأصحابه كتير على القهوه وكفايه أصلاً قعدة القهوه :( وماعلينا من التفاصيل والكلام الكتير

يارب واحد بس يتأثر بالكلام ده علشان أنا ماكتبتش بضمير مش عارفه أكمل بصراحه

شكر خاص لرجال الاسعاف اللي جم بعد ما بابا كان وصل المستشفى وهما كانوا لسه طالعين يعني جم بعد ساعه الا ربع مثلاً من المكالمه كان بابا راح بعربيه مع نفسنا يعني.... وشكر خاص جداً جداً جداً للأستاذ أحمد عبد الحميد ( والد دعاء صاحبتي الانتيم :) ) على الوقفه الجميله اللي وقفها معانا دي ...وشكراً لأحمد مبارك على صورة الرئتين... ده بس كان شكر واجب

أه على فكره الهلال شكله حلو أوي النهارده... أول مره أشوف شكل الهلال حلو أوي كده :)

ياااه شكراً انك قريت لحد هنا والله ... ونأسف للازعاج والكلام الكتير ... وعيشوا شويه في اللينكات دي

http://www.factofarabs.com/healthy12.html

http://www.saaid.net/Minute/108.htm

http://www.amrkhaled.net/articles/articles49.html