From The Beginning To End

كل سنه وانتم طيبين بمناسبة عام ميلادي جديد
يارب يكون عام سعيد علينا كلنا


بعد الكام بوست اللى كلهم كلام جد و أنا ماتعودتش على كده ... علشان كده وفيت بوعدي ووعد الحر دين عليه :( ربنا مايوقع حد في وعد.. وجبت ترجمة البوست ده
أو بمعنى آخر 처음부터 지금까지
처음부터 끝까지
فاكرينه ؟؟؟ أيوه اللي كتبته قبل تسليم مشروع التخرج تمام تمام .. أيوه الاغنيه اللي كتبت كلماتها وأعجبتوا بيها جداً أنا عارفه ... اللي قلتولي ذوقي رائع في اختيار الكلمات واللحن ... طيب ما تدوسوا على اللينك وتفتكروها أسهل
ده بقى النطق والترجمه اللي وعدتكم بيه .. يالا خلينا نبدأ السنه بالعقل كده ( الوفاء بالوعد قصدي)
أنا مش عارفه ايه الهبل اللي هعمله دلوقتي بس حبيت اني أكتب الترجمه بايدي واتعب نفسي يعني
يالا مش مهم الكلمات أهي النطق والترجمه
Please Excuse the Mistakes :D
طبعاً واضح النطق فوق باللون الأزرق والترجمه تحته باللون النبيتي و الأغنيه فوق :)... على فكره لو سمعتوا الاغنيه وقريتوا الكلام اللي في البوست اللي فات بالنطق ده والترجمه هتتعلموا كلمتين كوري ينفعوكوا لما تسافرو اليابان :) بجد دي لغه حلوه أوي ولذيذه أوي والأغنيه تحفه والدراما دي أصلاً كلها تحفه بس للأسف اللينكات اللي كانت على جوجل فيديو اتشالت ومش موجوده حلقاتها علي youtube:(:(
هما استنوا لما أنا شفتها وجالي اكتئاب من المسلسل وشالوا الحلقات تقريباً كانوا عيزين ينكدوا عليه أنا بس
ما علينا النطق والترجمه أهم

Nae ge ol su obs-e'l go la go ,
You will never come back to me
---------------------------
I Jen ge`lol su ob da go
And you can't do it
---------------------------
Je bal ge`man ha la go na le'l dal lae Ji
Please stop doing so, you comfort me like this..
---------------------------
Jong mal iJ-o bo li go sip-o
If I can't see you again,
---------------------------
Da sin bol su ob da mion
Really wanna forget..
---------------------------
Ne le'l Jab go it ne`n, no e mo de`n gol
All about you that hold me
---------------------------
Na ga ut go sip-e'l dea ma da non
Whenever I wanna laugh, you make me cry..
---------------------------
Na Le'l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
When I miss you, I break down like this
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I lot ge ma no Jio bo ligo ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
When I miss you I break down like this
---------------------------
lj-e`l su ob ge ha ni ga
Even though I try to forget, I can't do it

****************************

Jong mal iJ-o bo li go sip-o
If I can't see you again
---------------------------
Da sin bol su ob da mion
Really wanna forget..
---------------------------
Ne le`l Jab go it ne`n, no emo de`n gol
All about you that hold me
---------------------------
Nae ga ut go sip-e`l dea ma da non
Whenever I wanna laugh, you make me cry..
---------------------------
Na Le`l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
When I miss you I break down like this
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I lot ge mu no Jio bo ll go ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
When I miss you I break down like this.
---------------------------
lj-e`l su ob ge ha ni ga
Even though I try to forget, I can't do it
---------------------------
Dan han sa lam-e`l
Even though I try to forget
---------------------------
Sa lang ha ne`n ge I to lok
I can't do it
---------------------------
Him de`n-il-in jul, nan Jong mal mol las-o~
I didn't realize loving one is so hard like this

***************************

Na Le'l ul-o bo li ge man de`ni ga
You keep me from doing even one thing as I want
---------------------------
O ne`got ha na do na e de`t dea lo,
Whenever I miss you, I break down like this.
---------------------------
Non hal su ob ge man de`ne`n gol
Even though I try to forget, I can't do it..
---------------------------
Na ga bo go sip-e`l dea ma da nan
Whenever I wanna laugh, you make me cry..
---------------------------
I ro gem u no jio bo li go ma ni gan
You keep me from doing even one thing as I want
---------------------------
A mu li iJ-e` lio go ae le`l sodo
Whenever I miss you I break down like this
---------------------------
lj-e`l su ob ge ha ni ga
Even though I try to forget, I can't do it

يارب الأغنيه المره دي تكون عجبتكم بعد النطق والترجمه
كده فاضل بوستين وعد مني برضه :(:(:( يدينا ويديكوا طولة العمر

ثقه أم غرور !!!!ا

كثيراً ما أفكر وأتسأل.... هل ما أشعر به هو ثقة بنفسي أم غرور؟.... والغريب أنني لا أجد اجابة مقنعه بالنسبة لي
عندما أشعر بإحساس الثقه وأنني قادره على اجتياز اختبارٍ ما أتراجع خشية أن يكون شعوري هذا غرور
عفواً... من الممكن أن يكتمل المقال لغة عربيه ولكن لا استطيع ذلك نظرا ً لغيابي الطويل عن الكتابه باللغه العربيه و

علشان برضه مش واثقه ان اللغه العربيه اللي كتبتها والل هكمل بيها هي لغه عربيه صحيحه.. ولذلك هكمل الموضوع لغه عاميه دارجه كالعاده
نرجع لموضوعنا.. آسفه على المقاطعه

حقيقي ايه الفرق بين الثقه بالنفس والغرور؟؟؟ أنا أعرف ان الفرق بينهم حاجه بسيطه أوي .. علشان كده كل ما أحس اني واثقه في نفسي أتراجع وأقول لأ بلاش غرور!! وأنا مش عارفه اذا كان اللي حسيت بيه ده غرور ولا ثقه
علشان كده قلبت معايا بتهور منعاً للتردد!!!! مش مهم مش مهم .. يمكن تفهموا الجمله دي في الآخر

يمكن أنا متعقده من موقفين كده زمان والاتنيين كانوا في رابعه ابتدائي !!! هقولهم ولا بلاش لأ هقول وخلاص
الموقف الأول كنا في حصة عربي والاستاذ -المحترم الله يكرمه بجد- أستاذ حاتم سأل سؤال ومش فاكره قال اللي هيجاوب عليه هيعمله ايه (أنا فاكره السؤال بس مش هقوله علشان بعتبر الحاجات الصغيره دي ذكريات سريه) المهم مافيش حد خالص كان عارف الاجابه الا أنا كنت عارفاها بالتخمين وقدرتي المنيله اللي بتوقعني في حوارات قدرتي على التجميع والربط الحمد لله.. بس لعدم ثقتي في الاجابه ماردتش أقوم أقول الاجابه ولما قالها ماقدرش اوصف مدى الحسره والندم اللي كنت فيهم ساعتها ولحد دلوقتي .. بعدها بكام سنه سمعت جملة كده بتقول الندم عى مافعلت أفضل من الندم على ما لم تفعل ومن هنا جيه التهور!! بقيت أعمل حاجات بسرعه علشان ماترددش وأفكر أعمل ولا لأ واندم اني ماقلتش أو ماعملتش... بس ده مش ثقه بالنفس ده تهور يعني الموقف ده له علاقه بتهوري وردودي اللي كنتوا بتشوفوها على الميل جروب ياخوانا يا FCI-HU 2003-2007
بس تهور مقبول الحمد لله
الموقف التاني برضه في امتحان العربي جبت 30 من 30 في امتحان الشهر أعلى درجه وجيت قلت لماما وأنا فرحانه أوييييي شوفتي يا ماما جبت أعلى من إيمان ونهى( ايمان ونهى دول بنات مدرستين في المدرسه وكانوا شاطرين ماشاء الله واصحابي والله ماكنش حقد يعني بس فرحت اني جبت أعلى من أشطر 2 انجاز يعني) قالتلي طيب بس ماتتغريش ... الكلمه دي ماتتخيلوش كان تأثيرها ايه عليه فضلت أبكي باقي اليوم ومن ساعتها خايفه أتغر
أه كان فيه برضه في حصة العربي دي موضوع الغرور والتواضع دردشه يعني مش حصه وكنت نفسييي أسأل أستاذ حاتم وأستاذ أشرف -أحسن مدرس في الدنيا كلها- كان نفسي أقوله هو ممكن الواحد يكون مغرور بانه متواضع!!!ا وندمت ولحد دلوقتي بندم اني ماسألتوش
يالا معلش طول عمري عاقله :$ واضح ان ذكرياتي كلها في سنه رابعه بس :)ا
وواضح اني بعدت عن الموضوع بعض الشيء

***************

بجد بجد بقى.. لما مثلاً الواحد يدخل امتحان ويقول لأ هنجح ان شاء الله ولما يخلص يبقى واثق انه ناجح ده غرور ولا ثقه بنفسه؟
يعني أنا مثلاً فرحانه بذكائي غرور مني ولا ثقه في ذكائي؟
الغريب اني جربت الاختبارات بتاعة الثقه بالنفس دي -من الفيس بوك برضه- لقيت اني واثقه في نفسي يعني ده مش ضعف في ثقتي بنفسي .. كمان لما قريت وسمعت كذا حاجه للدكتور ابراهيم الفقي لقيت اني كويسه واثقه في نفسي يعني .... يمكن ده خوف من موضوع الغرور

في صديق قالي قبل كدده ان المفروض مدام الواحد مش واثق في نفسه يبقى من حقه انه يكون مغرور علشان يقدر يوصل لدرجة الثقه بالنفس المطلوبه الكلام ده عجبني أوي بس برضه لسه خايفه من شعور الغرور
أنا عايزه أبقى واثقه في نفسي :( مش عايزه أتغر في نفسي
اللي أنا متأكده منه اني واثقه في نفسي الحمد لله لكن مش عايزه أوصل للغرور... وبداية البوست تؤكد كلامي
ومن ضمن كلام دكتور ابراهيم الفقي أو من موقف قريته في كتابه يعني يؤكد ان انا لو مش عندي ثقة في نفسي ماكنتش عملت مدونه
ايه اللي يفرق بين الاحساس ده وده؟؟؟؟
أه على فكره الصوره اللي فوق دي أنا بشبه عليها مش فاكره شوفتها في بلوج حد ولا ايه لو أه قلولي علشان اشيلها لو اللي كان حاطيتها مضايق يعني بس انا عموماً جايباها من جوجل
أخيراً وليس آخراً ان شاء الله أتمنى ان كلامي يكون كالـــــــــعــــــاده مفهوم وواضح وصريح :)ا

تاج بقرار رئاسي

أولاً : كل سنه وانتم طيبيين لكل الناس وعيد أضحى سعيد علينا كلنا

وأنا في انتظار العيديات :$ كاش أو شيكات أو حتى يعني هاجي على نفسي وأقبل عيديه بسيطه ماحدش عمره بيقبل عيديه لاب توب بس أنا من تواضعي الشدييد وحرصي على فلوسكم هقبل لاب توب عيديه وأمري لله بقى ... وماحدش يديني خروف ويقولي دي العيديه دي تبقى مشكله كبيره أنا مش بحب اللحمه بتاعته أصلاً ... انتوا حريين بقى دي طلباتي في العيديه ...وممكن برضه أقبل تعليق بسيط في العيديه بتاعتي منكم يااااه ده أنا طيبه أوي... صحيح أنا كل ما بسأل حد يقولي مش باكل لحمة الخروف طيب ليه بقى الخروف بيهرب في العيد مدام أغلب الناس مش بتكله ده عبيط أوي !!ا

---------------------------

ثانياً
أنا اتوجهلي تاج من رئيس جمهورية نفسي يعني تكليف رسمي رغم ان التاج صعب أوي أوي أوي بصراحه بس تكليف بقى أعمل ايه ... وخصوصاً ان بقالي كتير بسرق التاج مش بيتوجهلي :$
المهم ندخل على الأسئله

لو ماكنتش مصري بس عربي كانت هتبقى ايه نظرتك للمصريين واللي بيحصل في مصر دلوقتي؟

للأمانه يعني أنا ماتخيلش نفسي ولا أحب أتخيل اني مش مصريه .... بس علشان أرد على السؤال ... كانوا المصريين هيستفذوني أوي وهقول هما ليه عاملين في نفسهم كده وليه بيعملوا كده بس عموماً أنا مش بحب أفرض حاجه وأجاوب على أساس الفرض ده يعني من الآخر ممكن تكون الاجابه دي أي كلام ولما أكون عربيه مش مصريه كنت هضحك على المصريين بقى ولا يصعبوا عليه.. الله أعلم

***************

لو كنت أوروبي أو غير مسلم هتبقى نظرتك ايه للعرب والمسلمين؟
نفس موضوع الفرض اللي مش بحبه... لو كنت أوروبي وعندي عقل شويه كانوا العرب هيصعبوا عليه أوي.. لكن لو كنت أوروبي وماشي مع أفكارهم من غير تفكير كنت هقول على العرب دوول مش بيفهموا حاجه وهيفضلوا طول عمرهم أغبيه
لو كنت غير مسلم وعندي عقل برضه كنت هعرف ان في كل دين في تطرف وكنت مش هفكر في موضوع المسلمين وغير المسلمين ... و لو كنت غير مسلم ومن الناس اللي اتولدت لقت نفسها كده وبسمع الكلام من غير ماأفكر فيه كنت هشوف المسلمين على انهم ارهاب وغاويين مشاكل ومش عاجبهم حاجه
بس طبعاً الحمد لله على اللسان العربي وعلى نعمة الإسلام

***************

لو قالوا لك انت بقيت رئيس جمهوريه هتعمل ايه؟
أنا أساساً مش بحب المسؤليه الكبيره أوي دي ... رئيس جمهوريه يعني هتحاسب على ان حد يقول آه ومايلاقيش مكان في مستشفى كويسه ولو حد جاع ومالاقش ياكل ولو حد ماشي واتكعبل في الطريق في حاجه وقعته ......... بس لو بعد الشر حصل وقالولي كده مع اني مش عارفه مين اللي قالولي......ا
أنا هقتبس من رئيس جمهورية نفسه بعض النقاط بس فعلاً كنت هعمل كده

ثانياً: هجيب ناس أهل للثقه يمسكوا الوزارات ويمشوا البلد على العجين مايلخبطهوش
ثالثاً: همنع حاجه اسمها واسطه وهلغى أكلة الكوسه والبتنجان من البلد-

رابعاً: هرجع العلماء من بره واحافظ على سلامتهم وحراسه بقى وكده واعملهم كل اللي هما عايزيه علشان أبحاثهم
خامساً: هلغي المواكب وانا كمان لو الناس بتحبني همشي من غير حراسه أصلاً

***************

لو سمح ليك برؤية الرسول عليه الصلاة والسلام وإنك تقوله كلمه واحده ؟

والله أنا نفسي ومنى عيني أشوفه بس في المنام
هقوله ايه دي بقى مش عارفه بس غالباً برضه مدام حاجه واحده تبقى حاجه بالدنيا كلها اللي هي الشفاعه طبعاً

***************

لو كنا في عصر اذهار الأندلس كنت تتخيل نفسك إزاي؟
على فكره مش بحب لو دي خالص:)....بس لو في عصر الأندلس يعني هكون بنت برضه ماحبش اني اتخيل نفسي خالص بقى :):):)ا

***************

لو خطبت واحدة أو اتخطبتي لواحد وأثناء الخطبة اكتشفت أو اكتشفتي إن الطرف الآخرغير قادر على الإنجاب هيكون ايه تصرفك؟
مش عارفه ... هو أنا فكرت في الموضوع ده بصراحه قبل كده ومالقتلوش حل ... بس أنا مش ندله الحمد لله وممكن أتنازل عن الموضوع ده هي الحكايه دي صعبه بس المعروف عني اني مش ندله أو يعني اني هبله زي ماتحسبوها بقى ورومانسيه حبتين تلاته كده.... بس لو كان الشخص ده أنا مخطوبه ليه كده وخلاص يعني مش بحبه يعني :) هتفرق طبعاً وهطلع ندله

***************

لو طلعت القمر هتكتب عليه ايه؟
السؤال ده جامد جداً بصراحه ... بس ماعنديش اجابه :)ا
مش عايزه أطلع أكتب حاجه دلوقتي بس لما يبقى فيه حاجه تتكتب هبقى أقول على طول :D

***************

لو مررت التاج لحد وماجاوبش هتعمل إيه؟

هو أنا بضايق شويه يعني -- في فرق بين اني اضايق و اني ازعل-- لكن مش بزعل والله ... يعني لو مش عايز يجاوب يعتزر عنه ويبقى خلاص .... علشان كده مابقتش أتاج حد خالص :)ا

***************

تمرر التاج لمين؟

ما أنا لسه قايله اني مابقتش أمرره لحد :) ا
بس أي حد عايز يجاوب عليه يبقى ياريت يعني... عايزه كل اللي بيعلقوا عندي يجاوبوا :P

Message Offline

أنا عملت تعديل بسيط ياريت يا جماعه تقروا اللي مكتوب باللون الأحمر

السلام عليكم ورحمة الله وبركاته

كل يوم طبعاً لما تفتح الياهو ماسنجر بتاعك تلاقي رسائل كتيييييييير أوفلاين
بصراحه أنا شخصياً بضايق جداً من الرسائل دي إلا إذا كانت رساله فيها دعاء معين بس ماتفرضش عليه اني ابعت الرساله دي لكل اللي عندي
يعني في مثلاً رساله بدايتها يقولك أقسمت عليك بالعزيز الجبار انك تبعت الرساله لكل اللي تعرفه طيب انت مالك انت ابعت ولا مابعتش وتحلف عليه ليه أصلاً ... أنا بصراحه الرسائل اللي بدايتها كده مش بقرأها أساساً طب علشان تكسب الثواب شيل الجزء الأول من الرساله واكتب بقيتها خليني حتى أقرأها
وبعدين أنا أجزم ان مش كل اللي بيبعت الرسائل بيقرأها الأول قبل ما يبعتها مثلاً في رساله كانت منتشره أوي من فتره وأعتقد انها لحد دلوقتي بتنتشر وهي غلط أصلاً ... الرساله دي كانت بتقول ان المسلمين مضطهدين في هولندا أو حاجه كده مش فاكره للأسف المهم ان الرساله دي كان فيها لينك Voting
واللي فهمته من الرساله انك تدخل تعمل فووت على نصرة الاسلام حاجه زي كده يعني
بعد شويه هتبعت طبعاً الرساله دي لكل الناس مع العلم انك مش هتفتح اللينك
بعد شويه تلاقي نفس اللي بعتلك الرساله اللي هو برضه مافتحش اللينك ولا عمل فووت ولا حاجه بيبعتلك رساله تكذيب يقولك فيها معلش أصل اللينك ده بيتغير كل شويه لأنه بطبيعته لينك تصويت المهم أنا دخلت على اللينك ده مره من المرات لقته طبعاً مش مكتوب انجليزي مكتوب بلغه زي الالماني خدت السؤال وترجمته على جوجل
From Dutch to English
طلعلي حاجه مالهاش أي علاقه بالدين خالص وده اللي أكدلي ان ماحدش بيدخل على اللينك وماحدش بيتأكد من أي حاجه قبل ماينشرها
مافيش مانع اننا ننشر الرسائل اللي فيها دعاء معين بس مانقسمش على حد انه يبعتها لحد كده احنا اللي هناخد الذنب.... عامله زي انك تحلف على حد بالطلاق انه يعمل حاجه ومايعملهاش يبقى كده انت اللي خسران
في رساله اتبعتت وانتشرت أوي على الفيس بوك واتبعتتلي أنا كمان ...الرساله دي عن حادثه حصلت لبنت - حادث يمس السمعه- وفي صوره مع الرساله دي لبنت أنا بصراحه أول ماشوفت الرساله قلت طيب ليه صورة البنت يحطوها طيب وأكييد طبعاً مابعتش الرساله لأي حد الحمد لله... بعد يومين أو أكتر نفس الشخص اللي بعت الرساله بعت رساله تانيه مكتوب فيها يا جماعه لو سمحتم تشيلوا الصوره دي علشان دي مش البنت اللي حصلها الحادث وحرام تسؤا سمعتها .... طيب بعد ايه يعني ما كان اللي بعت من الأول شال الصوره حتى لو كانت البنت برضه حرام ... يا جماعه بجد شيء من التفكييييير يا جماعه مش هينفع كده
أخيراً :: ياريييييييييييييت نتأكد من الحاجه الأول بدل ما ننشرها كده واحنا مش متأكدين وتطلع في الأخر غلط

شوية كلام مع الشكر والاعتذار 3

أيوه هو البوست بعينه :$ ا
زودت فيه رقم 16 و 17
أنا طبعاً لحد ما بعرف الشخص اللي بكتب عنه بتبقى حاجه صعبه شويه علشان كده صعب اني اعمل تعديل و أكتب كذا شخص في نفس الوقت وخصوصاً اني عارفه ناس كتير سواء من بعيد أو قريب لأن كمان مش كل ال18 دوول اصحابي أويييييييييي فيهم ناس عارفهم من موقف أو كلام بسيط بس
عموماً البوست ده عزيز عليه أوييي علشان الكلام اللي كتبته على الناس بصراحه مااقدرش أقوله ليهم وجهاً لوجه مع العلم ان الكلام ده لا يعتبر غيبه لأن الاشخاص مش واضحين الا لنفسهم ولو فيهم حد واضح يبقى الناس اللي اتكلمت عليهم كويس لكن اللي وصفتهم انهم مش كويسين (من وجهة نظري وبعض المواقف) هما عارفين اني كتبت عليهم الكلام ده برضه وكل واحد الحمد لله استنتج نفسه حتى لو فيه تشابه حروف
أكرر الملحوظه: كلمة شخصية لا تعني انها مؤنث لكنها مجرد مفرد لكلمة شخصيات
البوست:: شوية كلام مع الشكر والاعتذار

Golden Words

الميل ده اتبعتلي وعجبني أوي الكلام اللي فيه -مع ان في حاجات مش مريحاني نفسياً- بس بحترم أوي رقم 7 -8-10-11-12

ٍٍ

يعني ... ساعات برضه بعض الكلمات بتأثر في الناس أكتر من الافعال

1-Swami Vivekananda

In a day, when you don't come across any problems - you can be sure that you are traveling in the wrong path.

********************
2-William Shakesphere

Three sentences for getting SUCCESS:
1) Know more than other.
2)Work more than other.
3)Expect less than other.

********************
3-Adolph Hitler

If you win you need not explain ... But if you lose you should not be there to explain.

********************
4-Alen Strike

Don't compare yourself with anyone in this world. If you do so, you are insulting yourself.

********************
5-Mother Teresa

If we cannot love the person whom we see, how can we love GOD, whom we cannot see.

********************
6-Bonnie Blair

Winning doesn't always mean being first, winning means you're doing better than you've done before.

********************
7-Thomas Edison

I will not say I failed 1000 times, I will say that i discovered there are 1000 ways that can cause failure.

********************
8-Leo Tolstoy

Everyone thinks of changing the world, but no one thinks of changing himself.

********************
9-Abraham Lincoln

Believing everybody is dangerous; Believing nobody is very dangerous.

********************
10-Einstein

If someone feels that they had never made a mistake in their life, then it means they had never tried a new thing in their life.

********************
11-Charles

Never break four things in you life:
Trust- Promise- Relation& Heart; Because when they break they don't make noise but pains a lot.

********************
12-Mother Teresa

If you start judging people you will be having no time to love them.

********************

بس كده :)

أ ب ت

فاكرين الأغنيه دي ياولاد !! ياااااه بجد أنا لحد دلوقتي لما بغلط في الحروف بغنيها علشان أفتكرها... أنا بحب الأغنيه دي أوي

المهم
زمان كنا بنسمع الأغاني اللي زي دي وبنتعلم منها كتيير أوي .... اتعلمنا مثلاً نغسل ايدينا قبل الأكل وبعده وسنانا من أغنية أصحابي وصحباتي لصفاء أبو السعود .... واتعلمنا نقرأ منها برضه في الكتب قرينا ... واتعلمنا ان الجزر بيقوي النظر من هم النم.... واتعلمنا نشرب اللبن من ماما زمانها جايه ....واتعلمنا نحوش من حصالتي ليها كرش للبلبه....واننا مانضايقش القطط علشان مانتخربش في ذهب الليل وشوية حاجات برضه في ذهب الليل.... غير أغاني الاطفال التانيه لنيلي وعبد المنعم مدبولي وغيرها وغيرها

نيجي بقى للبرامج برنامج أبله فضيله اللي كان الساعه 10 إلا 10 ... وكانت بتحكي فيه حواديت بجد جميله جداً وليها معنى وليها هدف وفي الأخر أغنيه مرتبطه بالحدوته وليها نفس الهدف مثلاً *يجري ورانا يجري واحنا ماشيين قدام ولا نسأل عنه اكمنه مابيسمعش الكلام* ..... الله يسامحك ياللي بتقول عليه اني هبله ....يعني 10 دقائق بنستفاد منهم حاجات كويسه
نيجي للتليفزيون ... لأ سيبك من الكرتون دلوقتي .... خلينا في ماما ساميه وبرنامج عروستي ولا ماما نجوى وبؤلوز يا سلاااااااام بجد كان تحفه .... ولا بوجي وطمطم في رمضان ... أنا لسه فاكره ان عم شكشك كان زعلان قوي وبيقول لزيكا ازاي يكتبوا الانجليزي بالعربي زي فايف ستارز مثلاً ... يعني كان عايز إما عربي عربي الترجمه يعني أو انجليزي أومال لو عرف الفرانكو اللي احنا بنكتبوا دلوقتي كان عمل فينا ايه

بصراحه كانت القناه الأولى والتانيه والتالته وبالأخص السابعه مظبطانا على الأخر
طبعاً كل اللي بيقرأ بيقول ايه الهبله دي... الله يسامحكوا

نيجي بقى يأطفال زمان لأطفال دلوقتي ... حد يجبلي حاجه بالمستوى بتاع زمان ده ... محاولات الاغاني كلها من أمثال نوتي ل--- هيفاء وشخبط شخابيط لنانسي ..... الأطفال اللي عندهم 4 سنين مثلاً بيغنوا أغاني عمرو دياب ومصيبه لو غنوا لتامر يابنت الايه أو اعتذري .... أنا أعرف طفل برضه كان في حدود 4 سنين والله بيغني *نازل وأنا ماشي ع الشوك برجليه وانت السبب يابا ياللي خليت بيه...* وأنا معايا التسجيل اللي أخوه سجله ليه ... ينفع يعني طفل بريء يقول كده
البرامج بقى... أبله فضيله .. أعتقد ان البرنامج لسه شغال بس مافيش أطفال أو مافيش حد بيصحى الساعه 10 الا 10 دي-مش عارفه هل السبب في كده عدم وجود البرامج دي ولا العكس ان مافيش برامج علشان الاأطفال نفسها اتغيرت-... بوجي وطمطم! رحمي ويونس شلبي الله يرحمهم ...ماما ساميه وماما نجوى خلاص...... حتى المحاوله الوحيده كانت عقيمه :عالم سمسم اللي بيعلم الأطفال الفرق بين فوق وتحت وبين هنا وهناك ايه الــــهــــبــل ده...مش هما دول الأطفال اللي عايزين يتعلموا الحاجات دي الحاجات دي بالكتيير أوي للأطفال ذوي الاحتياجات الخاصه ...ومافيش محاوله بتبدأ وتكمل

بجد أنا بشفق على الأطفال دي ... بس الكويس فيهم انهم فعلاً كلهم أذكياء جداً ماشاء الله ... بس مش بيسمعوا ولا بيشوفوا حاجه مفيده

لمحبي فولا فولا واللي تاريخ ميلادهم يوافق ميلاد الأغنيه 22-11-1986 أنا ماردتش أحطها علشان 7 دقائق طويله شويه
عموماً دي بعض الأغاني
أ ب ت
فولا فولا
هم النم
جدو علي
أبريق الشاي
حصالتي ليها كرش
بابار فيل
ماما زمانها جايه
أنا عندي بغبغان
الشاطر عمرو

kalam

السلام عليكم
أنا بقالي كتير ماجتش هنا .... رغم ان في الكام يوم اللي النت كان فاصل فيهم كنت بفكر في كذا موضوع بس لما النت جيه مش عارفه ايه اللي سد نفسي :D
ماعلينا أنا جيت هنا علشان أقول كام حاجه كده
***أول حاجه :: كل سنه وانت طيب ياعماد يا صديقي بمناسبة عيد ميلادك ال22 والغيييييييير عادي ... ومبروووووووك على الاعفاء .......ا

***تاني حاجه برضه مبروووك للناس اللي خدوا اعفاء زي أحمد عيسوي سابقاً وخالد عادل واحمد سعيد وعقبال أحمد مبارك إن شاء الله ياااااااااااارب.... والله فرحتلكوا بجد اخدموا البلد بقى بره الجيش زي أحمد عيسوي كده

***تالت حاجه بقى كنت هكتبها في بوست بس كسلت أقرأ عنها واكتب بوست بصراحه..... كل واحد فينا ليه اسلوب في التعبير ولو اسلوب التعبير واحد زي مثلاً الناس اللي بتعرف تعبر بالكتابه بيفرق أوي اسلوب الكتابه من حد لحد تاني ومافتكرش ان في حد ممكن يقلد اسلوب حد وخصوصاً في الكتابه .... ممكن حد يقلد طريقة حد في الكلام لكن في الكتابه مافتكرش لو حتى حاول هيقع في النص .... على فكره انا فيه حاجه عجيبه أنا اسلوبي في الكتابه لغه عربيه من زمااان أوييي حتى لما كان حد بيقرأ اللي كنت بكتبه ماكنش بيفهم الكلام دلوقتي بعيد عنكم قلة القرأه خلتني أنسى الكلام العربي وبقيت أكتب كده زي مانتوا شايفين :$ا

***رابع حاجه:: كان جايلي دعوه على جروب كده ضد ناس معينه (مش مهم اسمه) على الفيس بوك دخلت اشوف مين الناس اللي عملت الجروب ودخلت على الصور المفروض ان الجروب ده يكون عقلاني جداً وناس متحضره بس اللي لقيته ان الناس كلها بتشتم في بعض واساليب غير حضاريه بالمره (قريت ده على تعليقات الصور بس) ... فيها ايه لو اسلوب الكلام بين الناس بقى متحضر عن كده ... فيها ايه لو نحترم رأي بعض ... فيها ايه لما نختلف بأدب وننقاش باحترام .. مافيهاش حاجه لو افكارنا مختلفه أو حد مقتنع بحاجه وحد مش مقتنع بس نقنع بعض بالذوق مش نهاجم من غير حجه ... فيها ايه لو واحد اعترف انه كان غلطان في فكرته وتراجع عنها مافتكرش فيها حاجه..... زي بالظبط الاهلويه والزمالكويه (أنا أهلويه) بشوف برضه على الفيس بوك ناس تبعتلي الزبلكاويه طيب ليه كده هما زمالكاويه وبيشجعوا فريق زي الاهلويه في حاجه اسمها منافسه شريفه حتى في الحوار ... ياريت نرتقي شويه وبلاش تعصب ونحترم رأي بعض حتى لو مختلفين

***خامس حاجه:: هتكلم عليها لما أخلص حلقات برنامج الحقيقه اللي بيتكلم فيها عن المصرين المقيمين في اسرائيل واللي معاهم جنسيه اسرائيليه واللي شغالين هناك واللي متزوجين من عرب48 والمصرين اللي في مصر وبيروحوا السفاره الاسرائيليه تحللهم مشاكلهم .... لما البرنامج يخلص أنا كتبت بس هنا علشان انا بنسى:D

سادس حاجه:: البوست اللي فات لا يتعارض مع البوست اللي قبل اللي فات حبيت أقول كده علشان فيه ناس كتيير فاهمه اني متناقضه في الموضوع ده بس اللي فاهمني كويس هيعرف معني كل بوست

سابع حاجه بقى:: بجد أنا فخوره أوييييي اني خريجة حاسبات ومعلومات حلوان حاسه أوي الموضوع ده اليومين دول مش عارفه ليه ... خصوصاً بعد ما عمرو غنيم رفع راسنا يارب دايماً كده

***أخر حاجه : كفايه كده بقى علشان مش عارفه أكتب حاجه بصراحه بس الحكايه اني مش بحب أفضل فتره كده ماكتبش حاجه :) بس بصراحه الهدف الاساسي من الكتابه هو أول وتاني ورابع حاجه كتبتها

شوية كلام مع الشكر والاعتذار 2

السلام عليكم يا بشر
فاكرين العنوان ده ؟؟؟
أيوه بالظبط كده ...... على فكره البوست ده اتعدل حوالي 4 مرات لحد دلوقتي
المره الأولى زودت فيه رقم 15
والتانيه 4
والتالته 13و14
المره دي زودت رقمين كمان 3و11
معلش بقى مش هينفع أنقل كل البوست تاني هنا ولا ينفع اني أجيب التعديل بس هنا علشان البوست مايفقدش احساسه
:) اتعب شويه ودوس على اللينك (شوية كلام مع الشكر والاعتذار) يمكن تكون واحد منهم
وعلى فكره كمان أنا عملت تعديل بسيط عند بعد الشخصيات

في يوم في شهر في سنه!!!!!ا

بتاريخ 29 -10

زمان كنت دايماً اسمع ان من علامات القيامه ان السنه تعدي زي الشهر والشهر اسبوع والاسبوع يوم واليوم ساعه وهكذا

زمان برضه كان اليوم بيعدي بسرعه مش زمان اوي يعني من 4 سنين بس.. لما كنت في ثانوي يعني... بس الفرق اني لما كنت بفكر انا عملت ايه في اليوم ده أو انجزت ايه كنت بلاقي نفسي عملت كتيير اوييي وكنت دايماً بقول اليوم بيعدي بسرعه أه بس لو حسبنا احنا بنعمل فيه ايه هنطلع بحاجات كتيير

زمان أكتر كان اليوم والساعه فيها بركه ... بجد كان فيها بركه .... أنا مش عارفه ايه اللي حصل
يمكن علشان رتم حياتنا بقى سريع !!!! بس لو ده كان سبب يبقى النتيجه في صالحنا ان اليوم طويل لأننا بنعمل حاجات كتير بسرعه
ولا ده احساسي انا لوحدي علشان كنت بقدر أعمل اكتر من حاجتين في نفس الوقت بمنتهى التركيز !!!!!! وعلشان كده كنت بحس ان اليوم اقدر اعمل فيه حاجات كتير.... الله يرحم أيام زمان

كنا بنقول يااااه احنا فييين وسنة 2000 فين وكانت الناس مش متوقعه ان 2000 هتيجي بعدها جيه احتفال الالفيه واتفرجت عليه وانا مستغربه وكنا بنقول لما كانت تيجي اعلانات 2010 ياااااااااااه يامين يعيش .. فوجئنا لقينا فاضل عليها سنتين وشويه !!!!
أنا عن نفسي ماحستش بالاربع سنين بتوع الكلية الا طبعاً أيام المشاريع والصراعات وشمردن لكن غير كده لما بفكر بلاقي انهم عدوا في لمح البصر حاسه ان الزمن نط بينا .........
طول عمري عارفه ان اللحظات الحلوه بتعدي بسرعه والايام اللي فيها حزن بتعدي علينا ببطء وبيكون حملها تقيل أوييييي ..... أنا قربت يجيلي لا مبالاه علشان عرفت ان كله بيعدي بسرعه قربت مازعلش علشان عارفه اني هنسي اللي حصل في دوامة الأيام اللي احنا متاخدين فيها ........

زمان برضه لحد ثانوي كنت بذاكر في اليوم 5 ساعات بسسسسس وده كان اقصى وقت ليه لما أقول اني قطعت نفسي مذاكره بس كانت الساعه بثمنها بجد يعني كان ممكن أخلص ماده في ساعه بمنتهى التركيز وكنت بسمع جنب المذاكره وخصوصاً الرياضه أغاني وكنت بقرأ كتب كتير خارج الدراسه وكنت بحفظ قرأن كــــــــــــــــل ده في يوم واحد بس دلوقتي مش عارفه اعمل حاجتين اتنين بس من دول ...... الله يرحم أيام زمان
لكن دلوقتي مجرد ما افتح الكمبيوتر الاقي الساعه بتجري بطريقه مش معقوله أنا نزلت برنامج الى صلاتي مخصوص علشان كنت بقعد على الجهاز مش حاسه بالوقت ولا حاسه بحاجه حوليه خالص وكان ممكن افتكر الفرض قبل الفرض اللي بعده بحاجه بسيطه بتخنق أوييي نزلته علشان احس بالوقت ..... هو أنا بس اللي كده ولا كل الناس؟؟!!!ا

كنت زمان بفكر ....... ده أنا لما اكبر هعمل وهعمل وهعمل ... دلوقتي صعب اني احقق حاجه بفكر فيها مش عارفه ليه يمكن علشان لمست الواقع واتصدمت بيه زي مابيقولوا ..... يااااااااااااااااه على الرومانسيه اللي كنت فيها والنشاط وماكنتش بنام تقريباً وكنت سعيده جداً جداً رغم ان دايماً الرومانسيه مصحوبه بالشجن لكن كنت حابه نفسي على كده ..... كنت بتحسد على رومانسيتي دي لكن دلوقتي حسيت ان كل حاجه في الدنيا كلام فاضي والمشاعر مش عند كل الناس حسيت اني غبيه في تعاملي مع الناس غبيه اوييييييييييييييي اني بحب الناس وبتعامل معاهم بمنتهى التلقائيه ..................... ماعلينا ... أنا عارفه اني دخلت في حوارات كتير أوي بس لما بقارن الزمن دلوقتي بزمان بحس اني مفتقده حاجات كتيير اهمها اني احس بنفسي نفسي بالنسبه لي هي احساسي بنفسي .... ولا حد فاهم حاجه

كنت دايماً بقول ان الدنيا مش هي السبب ان الناس تنسى بعض وكنت بعاهد نفسي اني افضل مع اصحابي وان الدنيا عمري ما هتاخدني منهم ولحد دلوقتي فعلاً لسه مع اصحابي اللي كانوا معايا في ابتدائي واعدادي وثانوي ... و اصحاب الكليه مش كلهم بصراحه لأني لقيت من بعضهم برود ولا مبالاه تخليني مش عايزه اعرفهم مش كلهم طبعاً في ناس بصراحه ربنا يكرمهم وفي ناس ماتوقعتش خاااااااااااااااالص انهم يسألوا عليه لقتهم بيسألوا وفي ناس لما بسأل عليهم واكلمهم بينفضوا أااااااااااااااخر تنفيض ...... يعيني عليكي يا طيبه

كان المفروض اسمي البوست ده .... حاجات كتير اتغيرت
ماعلش ماكنش قصدي اضايقكم :$:$:$:$:$:$:$:$ا

نعيب زماننا والعيب فينا..............وما لزماننا عيب سوانا
ونهجو ذا الزمان بغير ذنب.....ولو نطق الزمان لنا هجانا
وليس الذئب ياكل لحم ذئب....وياكل بعضنا بعضا عيانا

21 Ways to Add More Hours to the Day .. by Hossam M.Sadek

**************************************************************

Tag

طبعاً بما اني متطفله وبحب التاج أويييي هجاوب على الاسئله دي اللي سرقتها من أحمد عيسوي :$:$ا

لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟

كان نفسي ابقى في عصر الناس اللي أسلموا في عهد الرسول ( عليه الصلاة والسلام)

أول ‏أولويه فى حياتك عيلتك ولا شغلك ولا أصحابك؟
اصحابي - عيلتي - شغلى

إيه أكتر ‏حاجه بتحبها في رمضان؟
الصيام والناس بيبقى شكلها حلو أوييي ومحترميين أوي ورمضان نفسه بيكون ليه هيبه كده غير الشهور التانيه :D

اوصف ليا ‏أجمل فطار ممكن تفطره
في البيت ... مش بحب أكل بره ولا عند اقاربي

لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟
هحاول .... مش عايزه أبقى حاكم أصلاً بصراحه لو كنت بعد الشر هباشر كل حاجه بنفسي

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟
30% الحكام

20% الحاشيه

50% الشعب

مين ‏أكتر إعلامي مصري بتحترمه؟
عمرو أديب- محمود سعد - تامر بس مش فاكره اسمه تامر ايه :$ اللي بيجي ف البيت بيتك برضه


قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟
لأ ....

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟
لأ أنا حابه اللي أنا فيه

ايه تانى بلد تتمنى تعيش فيها بعد ‏مصر؟
ألمانيا :D
اوصف ليا ‏ترتيبات أجمل فرح ممكن تحضره
أهم حاجه أصحاب الفرح


بتراعي ‏كلام الناس والقيل والقال؟ لو اه او لو لا قول لى ‏ليه؟
الناس كده كده بتتكلم مابقتش أراعي بصراحه زي الاول
صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟
هفقد الوعي أو اتجنن أو أموت... وخصوصاً لو كان الكمبيوتر


السعاده ‏هى؟
الرضا ثم الرضا ثم الرضا وتحقيق الاحلام ومساعدة اصحابي

عندك أمل ‏؟؟ أسبابك
أملي في ربنا بسسس لكن في الدنيا ضعيف اوييي علشان ربنا معنا دايماً

لما تحب ‏تهرب من كل شئ بتروح فين؟
نفسييييييييييييييييييييييييييييييي .........بس لو متاح ليه بقف قدام البحر كتيير برتاح أوي

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟
مش عارفه مافتكرش


لما ‏بتعمل عمل خيرى بيكون ايه هو دافعك الاول؟
ضميري هو اللي بيدفعني ... بعدها بحس براحه نفسيه


بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟
لأ .... بقرف بصراحه


بتعرف ‏ايدك اليمين من الشمال ازاي؟
بعمل نفسي كأني بسلم على حد:D:D

ايه اكتر ‏اله موسيقيه بتحبها ؟ ؟
البيانو

فى رأيك ليه الذوق والنخوه ‏اتعدموا؟
يمكن علشان الناس مابقتش تحترم بعض


ايه ‏الحاجه اللى لو حصلتلك تبقى سعيد قوى؟؟؟
سؤال صعب أوي بس متهيألي لما احقق حاجه كان نفسي اعملها ...... لما احس ان اللي عملته في حد بيتردلى ..... لما اكون ناسيه الدنيا باللي فيها


تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟
فلوس في البنك


البحر و ‏لا النيل؟؟؟
البحر


مركب و ‏لا طياره؟؟
طياره


مجنون و لا ‏عاقل؟؟
غالباً.....مجنونه :D


تقرأ ‏كتاب و لا تتفرج عليه فيلم؟
كتاب


أمررة لمين ؟
اللي عايز يجاوب

الملك فاروق

على غير العاده هتكلم في حاجه أنا مش بحبها خالص وعمري ما اهتميت بيها .... التاريخ
علشان ماحدش يفهمني غلط أنا هتكلم عن مسلسل الملك فاروق

أخر صوره له على الأرض المصريه

ضريح الملك فاروق

لو حد فينا اتفرج على مسلسل الملك فاروق أنا ماشوفتوش في رمضان يعني لسه بشوف الحلقات الاولى بتاعته بس سمعت من اللي شافه انهم جايبين صورة الملك فاروق كمثل أعلى وشخصيه كويسه أوي وده فعلاً اللي لاحظته في الحلقات اللي بشوفها؛ انسان مظلوم في طفولته محب للشعب المصري ومحبوب أيضاً لدى الشعب.... فهل كان يستحق ماحدث له ؟ا
نرجع بس بالذاكره للخلف كام سنه كده في كتب التاريخ اللي درسناها والافلام المصريه اللي بتعرض عن بطولات جمال عبد الناصر وأنور السادات هل كانت شخصية الملك فاروق بنفس الصوره !!!! لأ طبعاً مطلقاً تماماً .... بل كان الملك الفاسد العابث الغير مهتم بشئون البلاد و الغير محبوب لدى الشعب المصري
أنا قلت قبل كده أنا مش بحب التاريخ ده خــــــــــــــــــــالص علشان بحس انهم بيدرسولنا على مزاجهم يعني مدام احنا شيلنا الملك ده يبقى كان علشان هو وحش واحنا حلوين أنا مش بصدق ولا كتاب تاريخ لو فكرت يعني أقرأ في التاريخ لا سمح الله .... لحظه بس ده مش معناه اني مصدقه كلام المسلسل 100% بس على الاقل مصدقه 70% وخصوصاً ان فريق العمل مش مصري :D
على فكره المسلسل ده أثار جدلاً حول الملك فاروق وشخصيته
على قناة الام بي سي استضافوا صاحبة السمو الملكي: فريال فاروق ابنة الملك الراحل فاروق واتكلمت عن حياتها وعن حبها وحب الراحل والدها لمصر
برنامج العاشره مساءً وعمرو أديب ناقشوا الموضوع ده ... خلينا في العاشره مساءً اليوم 21-10-2007
الاستاذه منى الشاذلي اتكلمت في موضوع المسلسل وشخصية الملك فاروق وسألوا للناس في الشارع :: اذا كانت تلك هي الشخصيه الحقيقيه للملك فاروق ، تحب ان تعيش في العصر الملكي أم الجمهوري ؟؟؟؟؟ السؤال ده أنا سألته لنفسي امبارح قبل البرنامج ولقيت الاجابه على نفسي نعم !!!!! والعجيب ان دي كانت اجابة بعض الناس؛ في واحد منهم قال كلمه حكمه.. قال :............................................................................................ا

أنا بصراحه مش عارفه هل هو فعلاً كان فاسد !!!! ولا هما علشان شالوه يبقى كان وحش !!!!!!!ا
مش بقولكوا مابحبش التاريخ :S
دي بعض المواقع اللي اتكلمت في الموضوع ده
"الملك فاروق" دراما تحرك المياه الراكدة
وده بيتكلم عن الملك فاروق
ذكريات آخر شاهد على عصر الملك فاروق..!!ا
ملحوظه أخيره: أنا مش بصدق أي كلام يتقال الا اذا كان منطقى ولا حتى المواقع دي ولا أحب أن أكون من مروجي الاشاعات أبداً أبداً أبداً اللي يقرأ حاجه لازم يقتنع بيها الاول مايصدقهاش كده وخلاص

How Many Germs Live On Your Keyboard?

There are about 1,483,020 germs on my keyboard right now!!

1,483,020How Many Germs Live On Your Keyboard?

Free California Personals

wanna know yours!!!

Untitled

بتاريخ 11 سبتمبر 2007

السلام عليكم ورحمة الله وبركاته
أولاً كل سنه وكل المسلمين طيبيين بمناسبة رمضان الكريم
ثانياً بقى:: من كام يوم كده -يعني 3 أو 4 أيام- جيه في برنامج العاشره مساءً اللي أنا مش متبعاه علشان مش بحب التليفزيون أصلاً ... جيه ايه بقى
المشكله اللي حصلت في ليبيا مع أهالي قرية شبراباص (أعتقد ان ده اسمها)أنا مش هقول التفاصيل بالظبط بس اللي لفت نظري حاجه واحده .... احنا ليه مش واخدين حقنا في أي مكان نروحه وفي نفس الوقت بنحاول نهج من البلد دي اللي احنا عايشين فيها احتمال برضه مش واخدين حقنا بس على الأقل عايشين بين أهلنا
وكمان حاجه: فين السفاره بتاعتنا في كل بلد؟ ليه هي الوحيده اللي مش بتحمي ولادها لو أي اجنبي اتهان هنا ولو بكلمه بيعرف ياخد حقه من سفارة بلده كويس أوييييييي
أنا هحكيلكم موقف ممكن يهمكم أو لأ المهم وباختصار فظييييييييع الموقف ده حصل لواحده أعرفها مغربيه هي من الأخر زوجة ابن خالتي دي كانت ماشيه عادي في الشارع وفي شاب سخيف رخم عليها وكان ماسك في ايده كلب هي طبعاً خافت وحست اني دي اهانه فظيعه ليها ولآدميتها لما روحت قالت لابن خالتي- زوجها يعني - لازم نبلغ البوليس أه والله بجد هو طبعاً علشان عارف اللي فيها ماوافقش في الأول بس بعد كده وافق ولما راحوا هناك وبما انها عايشه هنا بقالها فتره وبتعرف تتكلم مصري عادي فافتكرها الظابط انها مصريه عادي يعني وطبعاً في ضميره بيقول ايه الهبله اللي جايه تبلغ عن التفاهات دي ولما هي لقت انه مش مهتم وبيعاملها بمنتهى الامبالاه ... ببساطه طلعت جواز سفرها وحطته على المكتب وقالتله لو ماجبتليش حقي أنا هعرف أخده من السفاره وبلا مبالغه الراجل قام من على الكرسي ومش عايزه اقولكم هو عمل ايه بعد كده وراح بالقوه كلها للمكان اللي اتعرضت ليه للموقف ده وقلب الدنيا والله أنا لو حكيت بالظبط هتقولوا اني ببالغ أو بقول أي كلام بس فعلاً ده اللي حصل
يعني من اسم السفاره بس الراجل اتنطر من مكانه أمال لو كانت بلغت بقى ... وعلى العكس التااااااااام واحده مصريه بتقول ان في واحد مجنون كل يوم يخبط عليها وفي ايده سكين ويبقى عايز يقتلها ولما بتبلغ يقولولها في دم؟؟؟ حصلت الجريمه؟؟؟ تقولهم لأ يقولوا خلاص ويطنشوا طبعاً (أصلها مصريه مننا وعلينا يعني تستحمل) والله هو ده اللي حصل أنا مش بألف

طيب لو في حد مصري في بلد عربي أو غير عربي وحصله الموقف ده .... في حد هيتهزله شعره لو سمع اسم سفارتنا!!!!!!! مافتكرش ... ليه بقى ؟!!! الله أعلم
أنا بس دمي محروق لسببين... الموقف اللي أنا قلته ده بمقارنته باللي حصل في ليبيا والكلام اللي الناس قالوه في البرنامج + ان قرايبي كلهم تقريباً هناك وعارفين ايه اللي بيحصل كويس أوي

حسبي الله لا اله الا هو عليه توكلت وهو رب العرش العظيم

للأسف أنا دورت على النت على المعلومات الحقيقيه للموضوع ده بس مالقتش الكلام اللي الناس قالوه بلسانهم

C.V.

ده ميل وصلني فيه السيره الذاتيه بالعربي والانجليزي علشان لو حد حب يكتب السيره الذاتيه بتاعته أكيييد هيحتاج الفورمات ده بس لازم يبقى معاك قاموس أطلس الالكتروني ....... ممكن مايكونش معاك!!!! ساعتها ابقى استخدم translate.google

Note: Click 3ala el sora 3lshan tzhar full screen
or download from --> Image

Tag

السلام عليكم
بما اني بقالي فتره مش لاقيه حاجه أكتبها -أو بمعني أصح كتبت حاجات ومش راديه أعملها بابلش- وبما اني لو كتبت حاجه تانيه هزعل مني ناس كتيير.. وبما ان التاج حق لكل مدون وبما ان الاسئله دي عجباني يعني -اللي في بلوج أحمد عيسوي- قررت أجاوب عليها رغم ان ماحدش عملي تاج :$ بس هي رخامه بس المهم
ندخل في الأسئله

1-اسم مدونتك؟

My Voice

2- لماذا اخترته ..وماهي نيتك من وراء اختياره؟

بصراحه علشان صوتي واطي :$ ومحدش بيسمعني والكتابه عندي أحسن من الكلام وكتيير يعرف عني الموضوع ده

3- هل فكرت في إغلاق مدونتك؟ والسبب؟

لا طبعاً ... لأن ده أكتر مكان برتاح فيه رغم ان ساعات مش بكتب حاجه وساعات بكتب حاجات ممكن تكون تافهه بالنسبه لوجهة نظر ناس كتيير لكن اصحابي بس هما اللي بيفهموا اني مش قصدي تفاهه

4- صورتك في المدونة ورمزيتها ؟؟

ماحبتش أحط صوره ....

5- لماذا دخلت عالم التدوين من الاساس؟

زي ماقلت الكتابه عندي أحسن من الكلام بكتيير ولأني أصلاً بحب حكاية التدوين دي من زمان أويي

6- جمله قيلت لك فى وصف مدونتك؟

في ناس قالولي البلوج بتاعك حلو أويي وبنحب ندخله وفي مواضيع كويسه أوي ... مش عارفه ده بجد ولا ايه :
D

7- التعليقات بالنسبه لك ,اهميتها؟

في حاجات بكتبها ببقى نفسي الناس تعلق عليها يعني اختلاف الرأي بيخليني أفكر أكتر وأخد بالي من حاجات ماكنتش واخده بالي منها

ا8- احلى بوست كتبته ...ضع اللينك , ثم اذكر لماذا؟

ليه ماتسبش الناس في حالها
علشان كان بوست موجهة والهدف وصل + ان كان في آراء كتيير أويي احترمتها وفهمت الناس بتفكر ازاي

أشوفكم على خير يا أحسن ناس عرفتها :)
السبب واضح في البوست والتعليقات

FCI tag

لنفس السبب اللي فات

شوية كلام مع الشكر والاعتذار

علشان قلت فيه كل اللي ف نفسي وفيه اللي خد باله واللي ماخدش باله

شباب اليومين دوول

علشان برضه التعليقات اللي جت بس ده ماكنش فكرتي أصلاً بصراحه

10- أفضل مدونة قرأتها؟

من اللي بقرأهم
Ahmed Essawy
بيكتب في كل حاجه وباسلوب كويس جداً وأول مابدأت أقرأها كان كاتب فوق ال 20 موضوع قريتهم كلهم ودي المدونه اللي شجعتني اني أعمل مدونه خاصه بي
HOssam Sadik
موضوعاته جاده وبتعجبني أوي

WafaaShaban
بحب مواضيعها واسلوبها أويي وبرضه قريت كل المدونه
Ahmed Mubarak
في موضوعات كتيير بتعجبني أويي وبتفكرني بحاجات غريبه
Khaled Adel
برضه قريتها كلها وفيها حاجات عجبتني أوييييي
Ahmed Said
دي بقى مش هقول سبب اللي هيدخل هو اللي هيحكم

11- حد قل أدبه فى التعليق إيه رد فعلك؟

برد عليه بطريقة التهزيق بمنتهى الذوق بس لو حاجه ماينفعش يترد عليها بمسحها بس ده أخر احتمال لأني بكره أمسح تعليق مش علشان الكم والله بس مش بحب الأسلوب ده

12- أسوأ بوست أسوأ مدون؟

مش بقلب كتيير يعني ماشوفتش كتيير سيء

13- هيحصل ايه لإيميلك لما تموت ؟؟

في واحد سألني السؤال ده بس ماعرفتش أجاوب :( قلتله تقريباً هكتب وصيتي في البلوج بس الله أعلم هموت امتي :D

14- اديت الباسوورد لحد قبل كده؟
بتاع البلوج لأ ...

ا15- اسمك؟

Rehab MK :P

16- المشهور بيه وسط اصحابك؟

Rory, Ra7oba,may be RwRw :D w rorty (koky hea ely bt2oly kda) w w7da sa7bty bt2oly Rere
w ma7desh be2oly tenek 5aleeeeeeeeeeees 3ala fkra :$
معدل--- نسيت 3 أسماء مهميين :$
Roby (by mega w Dina), Re3o :@ (by Samir) Re3ab :@(by 3mr w Hany) Nefesa (by 3mad :S:S:S:S :D)l

17- شخصيتك نوعها إيه؟
الله أعلم !!!!

18- السفر بالنسبة لك؟

متعه جــــداً بس بتعب أثناء الرجوع بس

19- وقت فراغك بتعمل فيه إيه؟

على حسب أنا عايزه أعمل ايه ....

20- المود بتاعك؟

متغير جـــــداً..... عصبيه جداً ....رايقه بس مش جداً
مطمنه وقلقانه .... متفائله ومتشائمه
كل حاجتيين ضد بعض موجودين

21- الاكلة المفضلة؟

الأكلتين المصريتين الملوخيه والبميه بسسسس + كل النواشف (كل الصواني) + كل المشويات ... أكيد في استثناءات

22- صفات اللي أخدتها من بابا؟

العصبيه وشوية قلق (الحمد لله مش كله) ، الحنيه والطيبه

23- الصفات التي أخدتها من ماما ؟

الذكاء، الطيبه ، التضحيه للأسف، العدل ، الضمير في الشغل، النظافه ، التفكيير المستمر، اني أسمع أكتر ما أتكلم، اني بحب أتعب نفسي جداً وارهقها :$، الحظ القليل مع الناس ..... وكل حاجه كويسه في شخصيتي تقريباً

24- اكتر ست حاجات بكرهها؟
هما مش 6 بس :$

الكدب بكرهه جــــــــــــداً ، النفاق،الحقد، الغيره، الخيانه والغدر، الغباء، الظلم والقهر على أي حد، اللي يفضل يتكلم كلام فاضي وهو مش فاهم حاجه أصلاً وحاجات مش فاكراها

25- اكتر ست حاجات بحبها؟

الصراحه، الصدق، الصداقه اللي بجد مش كلام فاضي وكل حاجه عكس كل اللي فوق

26- الشغل بالنسبة لك؟

متعه لو حباه

27- الانترنت بالنسبه لك؟
عالم تاني واسع أويييي فيه كل حاجه عايزاها وكل الناس اللي بحبها

بالنسبه لتمرير التاج بما اني واخداه أصلاً رخامه من غير تمريير مش هقدر أمرره لحد :$