عام جديد

عام ميلادي وهجري جديد كل سنه وانتم طيبيبن
عندي أمل ان السنه دي تكون أحسن من اللي قبلها
على فكره سنة 2008 و 1429 كانت سنه كويسه جداً بالنسبه ليا وحصلت فيها حاجات كويسه وحلوه كتير الحمد لله
وان شاء الله السنه دي تبقى أحسن من كل السنين يارب
علينا كلنا قولوا آميييين

لا تعليق

حتى الآن وصل سعر الحذاء إلى 75 مليون دولار... ده بجد مش هزار
ولكن جاري البحث عنه
أصله مقاس 44 فلازم يكون غالي يعني

عيد مبارك

كل سنه وانتم طيبين
الحقيقه الواحد زعلان على الخروف بتاع المعلم حمبله
بس ده كده ماينفعش تاني مره يتسرق من عيلة سيشوار يعني مره سيد ومره ابن أخته أشرف دوت كوم أنا لو منه أخد حقي بصراحه

كلمات

الميل ده جالي من فتره وأنا بقلب كده في الميل قولت اجيبه هنا بس ما جبتوش كله

المتفائل

رجل يسقط من أعلى برج ويقول في منتصف الطريق أنا لم أصب بعد ..

*****************

المتشائم

شخص يرى أن التاء حرف في كلمة الموت دون أن يربطها لتكون آخر حرف من كلمه حياة ..

*****************

الخ ..

علامة توحي للآخرين بأنك تعرف ما قلت ..

*****************

الخبرة

هي عدد من الأخطاء التي ارتكبتها في حياتك السابقة ..

*****************

الدبلوماسي

شخص يطلب منك الذهاب إلى الجحيم بطريقة تجعلك تستعجل تلك الرحلة ..

*****************

المدير

رجل يأتي متأخراً عندما تكون باكراً ويأتي باكراً عندما تكون متأخراً ..

*****************

التاريخ

مجموعه من الأكاذيب ما كان يمكن أن يكون لها وجود لو كان الموتى يتكلمون ..

*****************

الإنسـان

كائن ترابي .. من التراب خرج .. وعلى التراب عاش .. ومع التراب تعامل .. والى التراب يعود ..

*****************

الناس

معادن تصدأ بالملل .. وتتمدد بالأمل .. وتنكمش بالألم ..

*****************

طيب أنا عايزه أعلق بقى على كذا حاجه من دول .. الدبلوماسي ممكن يكون كده فعلاً بس لما هو كده هل أنا فعلاً دبلوماسيه ولا لأ ؟؟؟؟ ماهو لو كده يبقى أنا مش دبلوماسيه خالص على فكره يا ناس ياللي بتقولولي كده
التاريخ بقى أنا مع المقوله دي 10000000% بصراحه طول عمري بكرهه التاريخ وبما ان التاريخ جغرافيا متحركه والجغرافيا تاريخ ثابت فأنا بكره الاتنين جداً بس كرهي للجغرافيا لأسباب تانيه مش كده بس ...المهم اني بكرهه التاريخ ليه بقـــــــــــــى؟؟ علشان فعلاً هو أكذوبه أغلب المعلومات بتكون وجهات نظر من أشخاص ممكن يكونوا عاصروا الأشخاص التاريخيه دي... ووجهات نظر لأن كل واحد بيحكي الموقف من وجهة نظره وبيتناول الشخصيه من وجهة نظره حتى ولو كان حيادي ... اللي أعرفه ان الكلام لما بينتقل من شخص لشخص بيقفقد نسبه من المصداقيه اومال بقى التاريخ :)
لأ لأ حقيقي مادام الشخصيه التاريخيه مالهاش مذكرات كتبتها بايديها يبقى شكراً مهما كان اللي بيتكلم عن الشخصيه مش هصدقه بصراحه ... على فكره يمكن الكلام يؤخذ عليا وكل حاجه بس حقيقي ماقريتش كلمه ف التاريخ وصدقتها 100% ايه اللي يثبت ؟؟؟؟ هاتلي اثبات وانا أصدق
ممكن كلامي يكون بدافع برضه اني عقلي مش بيستوعب الحاجه اللي مش ليها اثبات و الأكيد اني مابحبش التاريخ ولا الجغرافيا مش بحبهم يعني بجد بكرههم ولما حتى بتفرج على حاجه تاريخيه بشوفها من ناحية اني بشوف شخصيه وخلاص غير اللي بتتجسد يعني
ومن الأخر

التاريخ

مجموعه من الأكاذيب ما كان يمكن أن يكون لها وجود لو كان الموتى يتكلمون

وصبرنا يارب

صابرين وعبير صبري وربنا يصبرني
الناس دي بتستعبط ولا عبيطه ولا بتستعبطنا
أنا مش هتكلم عن عبير صبري وقلعها للحجاب مرتين وياريتها لما تقلعه تلبس عدل لأ بالعكس ماعلينا دي زي مابيقولوا كده مافيش منها فايده وكده ولا كده هي قلعت الحجاب وخلاص حددت موقفها ... مش هقول على أيام ما كانت بتيجي في قناة اقرأ
ولا هقول على وقفة عمرو أديب جنبها وشكرها ليه لما قلعت الحجاب ووقف ف صفها من الهجوم عليها
نيجي بقى لحرقة الدم الكبرى صابرين
صابرين اللي كانت بتيجي في برنامج عم يتسألون وكان ناقص يركبولها جناحين من كتر برأة الملايكه
صابرين اللي كانت زي غيرها من الممثلات اللي لما تتحجب يعتبروها شيخه ولا حتى مصلحه اجتماعيه
صابرين اللي كانت الدكتوره عبله الكحلاوي بتشكر فيها جداً جداً جداً
نرجع كده من الأول خاااااالص من قبل رمضان ده .... كنت بقلب في التليفزيون قبل ما أنام ولاقيت وأنا بقلب المستفذه بوسي شلبي في كواليس مسلسل عرفت بعد كده ان اسمه "الفنار" ولاقيت صابرين من غير حجاب .... أنا مش هعرف أوصفلكم شكلي بصراحه أنا تنحــــــــت وسبت القناه علشان أشوف ده بجد ولا بطارية عيني خلصت أخر الليل وبتجيب أي كلام ... وبعدين حسيت انها باروكه وكنت مستنيه المستفذه تسألها ايه ده ماسألتهاش قلت أستني يمكن دي حلقه قديمه ولا حاجه... في رمضان برضه بالصدفه لاقيتها طالعه بنفس المنظر في مسلسل واضح انه جديد شفت لقطه بتتخانق مع راجل ويضربها ويخنقها ... استغربت
بعد كده لاقيت كاركاتير عليها على النت بنفس المنظر واتأكدت انها باروكه
امبارح بقى جابها الممل معتز الدمرداش اللتيييييف الزرييييف وسألها وردها حرق دمي بصراحه
قالها ازاي موضوع الباروكه ده:: قالتله انا مش هقدر أخدع المشاهد أنا انسانه أهو محجبه وأي محجبه بتقعد ف بيتها مع زوجها من غير حجاب !!!!!! ازاي أخدع المشاهد وفي المسلسل اقعد في بيتي بالحجاب !!!!!!!!!!!!!!!
ياســـــــــــــــــــــــــــلام ايه الجمال والأخلاق دي مش عايزه تخدعنا
قالها فيما معناه ليه تمثيلي أصلاً : قالتله فيما معناه برضه بعمل حاجه ارضي بيها نفسي
يا ماشاء الله
بعد كده بقى كل واحده تلبس باروكه وتقول ان ده مش شعرها ياسلام ياسلام
فضل يسألها في أسئله من نوع ايه رأيك في المحجبات اللي بيعملوا شعرهم عند كوافير راجل والأسئله دي لحد ما قالتله أنا مش شيخه أنا صابرين الممثله
ولما هو كده بتعملوا فيها شيوخ ف الأول ليــــــــــه
وكانت لابسه بادي كارينا بيلمع ولونه دهبي وفوقه بتاع عبيط كده ...والحجاب ...الاسبانيش أحسن منه شويه ...وبنطلون ومكياج كامل... ودلوقتي وأنا بدور اكتشفت ان لبسها بقى كارينا وحجاب سبانيش
أيوااااااان صابرين
نفسي بس أفهم الناس دي ايه بقى يعني .... مش هيبطلوا يضحكوا علينا ولا ايه مش هقول يحترمونا شويه بس يحترموا نفسهم ويحترموا ربنا قبل أي حاجه
بس خلاص .... أنا خلصت كلامي ... وربنا يهدي الجميع

اوعى تغير دمك

السلام عليكم ورحمة الله وبركاته

بعد طول غياب لدرجة اني مش عارفه أوشي ودي فنكم مين ولا حتى أودي وشي منكم فين

قررت ان أكسر الحاجز النفسي بيني وبين المدونه واني أكتب تاني خصوصاً بعد الاشاعات اللي قالت اني اعتزلت التدوين والقاهره اليوم والبيت بيتك أذاعوا الخبر لأهميته القصوى

وعمرو أديب ومحمود سعد اعترضوا بشده

طبعاً يا جماعه انتوا مش مقدرين يعني ايه خبر يقول ان Rehab M.K. (:P برضه) تسيب المدونه

فقولت لازم أرد بقى

المهم اني جيت يعني

كنت عايزه أتكلم عن برامج المسابقات الفذيعه الشنيعه اللي بتتعرض على التليفزيون

على سبيل المثال : قناه زي Melody Trix , Strike (غالباً دي أسمائهم) وحاجات كده كتير مش فاكراها

في قنوات مخصوصه للمسابقات دي

بس نصيحه اللي عنده الضغط أو لو حتى عصبي شويه يبعد عن المسابقات دي لما تحمله من غباء وحرقة دم وهبل بالعبط

أعتقد ان اختبار المذيعين والمذيعات بيتم على قياس درجة الهبل

والله يا جماعه أنا مش بحب أشتم حد كده خصوصاً على الملأ بس كده كتير بجد

هقولكم حاجات من اللي سمعتها بغض النظر عن الاغاني اللي شغاله والمذيعين اللي بيتنططوا طول البرنامج ولا ماعرفش ده عادي ولا ايه المهم مثلاً جايبين أرقام من 1 لحد 12 ورقم 8 ناقص ويقولك فين الرقم الناقص وتعد تعد وتيجي لحد 7 تقول ها يا جماعه 7 ايوه 8 9 وتكمل ل 12 والمصيبه مش ف البرنامج أكتر من اللي بيتصلوا ويجاوبوا دول اللي بجد يجيبوا شلل

وحاجات تانيه زي أمثال كلامها بعيد عن بعضه ويقولك جمع المثل وهو بيقولوا والناس سبحااااااان الله ع اللي بيتصلوا دول

اللي جامده بقى بجد يعني فزوره بتقول أخت خالك ومش خالتك تبقى ميين ... واحد اتصل بيها وقالها عمتي :( يانهار أبيض دي ماجابتش سيرة عيلة الأب خالص ده أنا لو قلتها لعيل صغير هيفهمها

واللي تجبلك صورة فيلم جعلتني مجرماً وتقولك ها يا جماعه اسم الفيلم جعلتني ايه قصدي..ايه مجرماً

وصورة فيلم مرجان أحمد مرجان... ها يا جماعه الفيلم كان اسمه مرجان حاجه مرجان ها اسمه مرجان أحمد ايه

يعني حتى لو ماحدش بيعرف الافلام دي هيجمع اسمه على طول مش محتاجه حتى تشغيل مخ

يانهاري على الشلل

وغيرهــــــــــــــــــــــــــــــــــــــــــــــا من الحاجات اللي بتقعد اسبوع من غير ما حد يحلها صح :(

الناس دي ايه .... منيين وليه وازاي .... لو الكلام ده بجد والناس اللي بترد دول بجد يبقوا بجد بقى مش عارفه أقول ايه ... تحس انه غباء واضح وصريح غباء بخيره كده مافيهوش لؤم ولا خبث ربنا اداهم الغباء يوزعوا على خلق الله طمعوا فيه كله .... والله أنا مش متخيله ان في ناس هبله كده ولا غبيه كده .... أكيــــــــــــــــــــــــــــــــــــد ده تمثيل

ومن جمهورية الغباء المتحده نحييكم وندعوكم لزيارة قنواتنا المتخصصه لزيادة نسبة الغباء والهبل

بس اوعى ..... مايتحرقش دمك

بس الأكيد انها مؤامره على عقولنا

ملحوظه ::: أنا مش بتفرج عليها بس لما حد بيحول ويعدي عليها كده صدفه وهو بيحول بشوف الحاجات دي لأني أصلاً بكرهه التليفزيون... يعني ماحدش يقولي غيري القناه وماتتفرجيش كده كده مش بتفرج:)

رمضان لسه كريم

كل سنه وانتم طيبين
كل سنه بتيجي بتفرحنا وبتدخل في قلوبنا فرحه غريبه يا رمضان غير اي شهر تاني غيرك ... صيامك ده متعه يمكن أنا كمان علشان مش بحب الأكل متعتي بتكون كبيره شويه
بس افتقدنا جزء من بهجتك .. يمكن علشان الزمن اتغير ويمكن علشان كبرنا والدنيا اتغيرت من حوالينا
وفي حاجات كتير بتحصل فيك .... الناس كمان مش صادقه مع نفسها .... رمضان أه ليه هيبته وفرحته لكن مش معنى كده اننا نفتكر ان اللي حرام في رمضان مش حرام في باقي السنه
يعني ايه واحده تتحجب في رمضان بل قبل الفطار فقط وبعد الفطار ترجع مش محجبه... بكل المقاييس ده يعتبر نفاق بس نفاق مع ميين مع نفسها ولا مع ربنا ... لو شايفه انه حرام يبقى حرام على طول بقى
شيء جميل برضه ان الولحد يزيد من قرأة القرأن بس مايقطعهاش بعد الشهر ما يخلص
هو رب رمضان غير رب السنه كلها ولا ايه
رغم انك رمضان يا رمضان والدنيا بتكون حلوه والله ولذيذه وكله خير والناس بتمتنع عن حاجات كتيره وبتزودها في حجات كتيره برضه
يعني الخناقات بتزيد خصوصاً للناس اللي بتشرب سجاير طبعاً هما عارفين السيجاره بتتحكم فيهم ازاي وقت الصيام ... بيكونوا مستنيين كلمه علشان يتخانقوا وساعتها بقى الالفاظ الجميله تظهر والصيام يضيع... بجد الله يكون في عونكم مش بتقدروا تتحكموا في نفسكم علشان السيجاره هي اللي بتتحكم فيكم وبتعمل فيكم كده ... اللي خلاك تبطلها 12 ساعه استحمل كمان 12 ساعه منهم 8 ساعات نوم وهتتعود على كده
المواصلات وما ادراك ما المواصلات ... اكيد عارفينها خصوصاً قبل الفطار بساعتين لحد الفطار الله عليكي يا مواصلات مصر
كميات الأكل الرهيبه اللي الناس بتشتريها ... الناس بتاكل بعنيها ... بيشتروا الأكل وهما صايمين وطبعاً بيتخيلوا انهم هايكلوا خروف وبط وفراخ وحمام غير الحلويات ... وكلأن الناس بتكون في مجاعه طول الشهر
والأكل بقى غالي أوي ... في ناس مش عارفه تاكل طول السنه.. بس الحمد لله ربنا بيكرمهم في رمضان
ومش عايزه كمان أقول المسلسلات ... الحمد لله اني مش بحب التليفزيون أوي يعني... في ناس بتعمل جدول للمسلسلات دي كلها علشان تعرف تتابع أيوه طبعاً أومال ايه
رغم الغلاء والعناء ورغم ان حديث الشعراوي اللي كان بيجي قبل الفطار على طول وبعديه القران وبعديه الاذان بطل يجيي ... رغم كل ده بس ... رمضان لسه كريم وكل سنه وانتم طيبين وبخير يارب... وعساكم من عواده :)
ومش عايزه أطول عليكم بصراحه
ملحوظه بس:: أنا برضه من بيت مصري وعايشه في مصر

كتب ولم يراجع

شهر 8

كل سنه وانتم طيبين بمناسبة شهر رمضان

عفواً يا جماعه واضح فعلاً ان شهر 8 معايا مش كويس ودايماً بتحصل فيه حاجات بالسنه كلها
عذراً شهر 8 ... 3 موضوعات فقط
نلتقي ان شاء الله بعد ما الشهر ده يخلص
رغم تجهيز الموضوعات بس قدر الله وماشاء فعل :)

مأساة ال FW

في ميل جالي كذا مره من كذا حد طبعاً عن طريق ال
Forward
بس بجد بجد بجد حاجه محزنه جداً ... الميل هو 3 لينكات على اليوتيوب اللينكات دي مسيئه جداً جداً جداً جداً للدين الاسلامي والقرآن الكريم والرسول عليه أفضل الصلاة والسلام والجنه وكل حاجه أصلاً والميل بيقول طريقه لمسح اللينكات والفيديوهات دي بخطوات معينه...
المشكله اني مش من أنصار اني ابعت الميل ده و أنشره فدخلت تأكدت من اللينكات وفعلاً لاقيتها مسيئه جداً وغيبت عقلي وقررت اني ابعتها لكن في ناس قالولي لأ بلاش علشان الكلام ده بيكون هدفه الأول والرئيسي انتشار الحاجات دي وده برضه كان رأيي لما اتكلمت معاكم في
موضوع
Message Offline
بصراحه ساعتها احترت خصوصاً لما لاقيت ان اللينك التالت اتشال من اليوتيوب حسيت ان فيه نتيجه بس المشكله الأكبر لو اللينكات دي انتشرت من غير نتيجه خصوصاً ان عدد الزيارات لباقي اللينكات التانيين وصلت ل 130 ألف من غير نتيجه يعني حوالي 130 ألف واحد بيشوفوا الفيديو غير كم التعليقات اللي منها سب ومنها حسبي الله ونعم الوكيل ودعاء على اللي رفع الفيديو وعملوا
بصراحه أنا كتبت البوست ده علشان أخد رأيكم أبعت ولا لأ
بس دلوقتي بقول ان عند موقفي ومش هبعت الميل لحد
بس في حاجه مهمه أخيره بقى .... اللي يلاقي فيديو مسيء للاسلام أو مش كويس يعمل الحاجات اللي جايه دي
اختر
Flag
- Select a Reason -
وعند الضغط عليها سوف تجد مجموعه من الخيارات اختر الخيار التالي:
Hateful or abusive
سوف يظهر لك خيارين اختر الخيار التالي:
Promotes hatred or violence
ثم عليك باختيار كلمة religion
ومن ثم تقوم بالضغط على المربع المكتوب فيه :
Flag this Video

أنا جييييت

جيت منين ماحدش يسألني
أنا لسه ماجتش لنفسي بس قلت أزور نفسي كده يمكن تكون محتاجه حاجه
عارفه اني تقلت ورخمت وغبت عليكم بس معلش :$ سامحوني ... لحد دلوقتي نفسي مسدوده بطريقه مش ممكنه عن الكتابه هنا زي ماهي مسدوده عن الشغل والتفكير
مابين سدة النفس والسفر والانشغال --على اساس اني مهمه بقى:$-- ماكتبتش حاجه
بس كتبت لسبب يكاد يكون مش منطقي وهو ان ده شهر 8 اللي السنه اللي فاتت برضه ماكتبتش فيه ولا كلمه هنا وعيب أوي لما البلوج مايبقاش فيه كلمة
أو أغسطس August
خفت لا الشهر ده ياخد مني موقف ولا حاجه مش عارفه ماله الشهر ده معايا ... بس اكيد مالوش علاقه بانه عيد ميلاد سوووو ولا بانه شهر أغطسطس
أنا مانكرش ان عندي شوية كلام كتير عايزه أقوله بس كل الكلام بيتبخر لما بفكر اني أفتح البلوج وأكتب فيه
من كتر مانا مابقتش عارفه فيا ايه ... قربت أغني الأغنيه الشهيره للمطرب المشهور السوبر ستار :(:( أغنية أنا مش عارفني
أقولكم على حاجه ... علشان أصالح بيها شهر 8 وأصالحكم طبعاً :$... ان شاء الله هنزل بوست قريب جداً تاني وبكده يبقى نزلت 2 بوست ف شهر 8 وما أدراك رقم 2 بالنسبه لي يا شهر 8 ... واحتمال كمان يبقى فيه التاج بتاع هوندا أحسن أتضرب ولا حاجه وكده يبقوا 3 بساتيت أو بوستات 3 مواضيع يعني أو موضوعات وساعتها مش هرضي أزعل شهر 8 وأكتب فيه رقم فردي يووووووه يبقى الحكايه فيها بوست رابع بقى وتبقى حكايه ... يظهر الشهر ده جاي عليا بخساره
صدقوني بجد بجد أنا كنت ناويه أكتب البوست النهارده ... بس لاقيتني ماكتبتوش ورغيت كتير ....قولت اأجله علشان كده أنا رغيت كتيير وماينفعش أول لما أرجع كده أزهأكم برغيي ... نخلي البوست ده بس علشان تسامحوني بيه
سماح مش كده :) ... وماحدش يقولي سماح مين
وبجد بجد بجد شكراً أوي جداً خالص كتييييييير لكل اللي سألوا عليا وقلقوا عليا ... وشكر خاص جداً جداً للجميله جداً خالص فاتيما أم يوسف اللي بجد بحس انها أختي الكبيره رغم اني ماعرفهاش الا من قريب خالص
ولكل كل كل الناس اللي حسوا بغيابي وسألوا عليا

مش عارفه الصوره دي حاطاها ليه بس اقبلوها مني :)
أشوفكم بعد فتره قصيره ان شاء الله ان شاء الله ان شاء الله
استنوا هنا .....طيب لما انتوا بقى مستنين البوست كده ومسامحني على غيابي --أكيد يعني :$:$ ماأنا أختكم القصيره .. قصدي الصغيره ومايرضكمش تزعلوا مني -- فين بقى منك ليه ليها له اللاب توب ؟؟؟؟

HaPpY Birthday

كل سنه وأنا طيبه

أنا ماكنتش ناويه أكتب حاجه دلوقتي بس ماحبتش أفوت مناسبه عظيمه زي دي
عيد ميلادي ... عارفين لو ماكنش ال 22 و يوم الاتنين ماكنتش جيت كتبت حاجه بجد خــــالص دلوقتي ...أصل أنا بعــــــــــــشــــــــــق رقم 2 ودول 22 وبحب أوييييييي ان عيد ميلادي يبقى يوم الاتنين علشان بعشق يوم الاتنين أوي جداً برضه
المهم للسنه التانيه على التوازي بقولكم كل سنه وأنا طيبه كل سنه وأنا طــيــبـــه مش معقول يعني عيب أوي كده كل مره أنا اللي أطلبها بنفسي قولنا لاب توب لاب تــــــــــــــــوب مش طالبه حاجه جامده ... ده لاب توب يعني ... خساره فيا كام ألف ولا ايه ؟؟؟ ده ايه الناس دي ياربي... ده أنا حتى جبت تورته شكلها والله يفتح النفس ياللا بالهنا والشفا

السنه اللي فاتت ماحدش عبرني وجابلي لاب توب بس بصرحه عملوا معايا أحلى واجب ... اصحابي من الكلية وكده .. من رسايل موبايل ومكالمات تليفونيه وفيس بوك وكروت اونلاين ... مانا قولتلكم ساعتها؛ حتى مستر عمرو والله .. لما نشوف السنه دي ايه اللي هيحصل... لما نشوف مين هيجيب اللاب توب والله مش عايزه حاجه خــــــالـــــــــص غيره ... ده أنا حتى طيبه أهو

باقي الهدايا بقى مش عايزاها يالا عفونا عنكم

تحديث بصراحه حصل اللي ماكنتش متوقعاه خالص ... هدايا وفيس بوك ورسايل موبايل من ناس بجد عزيزه عليا أويييييي .... بس برضه ماحدش جبلي لاب توب :( والصوره دي من ضمن الهدايا اللي جاتلي ... تصميم زمايلي ..بجد قاموا معايا بالواجب... باللون الليلاه زي مانتوا شايفين كده :))
وكمان مستر عمرو قاللي على الفيس بوك ... راجل ذوق والله ربنا يكرمه ( اللي مش عارف مستر عمرو يرجع للبوستات القديمه أنا مش لسه هشرح :P

المهم كنت عايزه أشكر الناس اللي كتبت تعليق في البوست اللي فات خصوصاً سوووو و شاهي وغمض عينيك وكل كل الناس اللي علقت ... أنا زي القرده أهو كويسه ماجراليش حاجه الحمد لله :) بس كنت ببعد شويه لظروف ما كده نفسيه شويه ولولا الحدث الفظيع ده ماكونتش جيت :) بجد شكراً كتييييييير

كلام

when life gives you a hundred reasons to cry.... show life that you have a thousand reasons to SMILE :)

الكلمه دي قريتها وعجبتني قلت أجبهالكم:)ا

ياريتني ما عرفتك... كلمه ممكن تتقال لحد بتكرهه أويييي علشان كل ماتشوف وشه تضايق ودمك يتحرق ... أو ممكن تقولها لحد جرحك ....

وممكن كمان تقولها لحد بتحبه أوي علشان مش قادر تبعد عنه ومش متخيل حياتك من غيره وخايف لو بعد عنك يجرى لك حاجه.... مش متخيل أصلاً شكل حياتك ايه من غيره ... ورافض أصلاً فكرة البعد عنه

ما استحق أن يولد من عاش لنفسه فقط .... كلمه كنا بنسمعها كتييير وماحدش بيعمل بيها ...اللي شايفاه ان كل واحد عايش لنفسه بس .. مش مهم مين عايش معاه
في كلام مشابهه للمقوله دي زي مثلاً أنا ومن بعدي الطوفان و مثل سمعته قبل كده بيقول خراب يا دنيا عمار يا دماغي وياللا نفسي وعيش ندل تموت مستور
اكتشفت ان الأنانيه ف دمنا حتى على نفسنا ... احنا ليه بنبكي ونزعل لو حد بنحبه توفى .... مش علشان الحد ده لأ ده علشان نفسنا برضه علشان حياتنا من غيره هتبقى وحشه حياتنا احنا ونفسنا احنا مش هو

حاجه أخيره بقى :) سامحوني لو غبت عليكم شويه الأيااااااااااام اللي جايه
غيابي لأسباب كتيره من ضمن الأسباب دي عدم وجودي بصوره مستقره في البيت وعلى النت وسبب كمان مهم أوييي اني بقالي فتره مش بكتب حاجه مفيده ومش عارفه أكتب حاجه أصلاً لما ألاقي حاجه مفيده أو احس اني مش ممله على قلبكم هكتبها :)

تحياتي ليكم كلكم :)ومع السلامه دلوقتي

13-6

تاج الأحلام :)

قلت أكتب التاج اللي عليا علشان مابقاش مديونه ولا حاجه :) .... التاج المره دي من سلوي (طوق الحرية)

أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟

1- حلمت اني أبقى دكتوره
الحلم ده فضل معايا لحد ثانيه ثانوي وكنت علمي علوم كمان لحد ماشوفت حادثه بسيطه في المترو من غير حتى ولا دم ولاحاجه انهارت ساعتها وفكرت بعدها قلت ايه الهبل اللي انا فيه ده اومال ازاي كلية الطب بقى والكلام ده ... وحولت علمي رياضه :$ -- بس مش ده السبب الرئيسي أوي يعني لتحويلي علمي رياضه وتغير حياتي --ا

2- حلمت اني اطلع القمر
ولسه بحلم... عارفه انه ممكن يكون مستحيل بنسبة 99% لكن الأمل في ال 1% ... عايزه أشوف ايه النظام فوق يمكن يعجبني ولا حاجه ... بس هاخد الكمبيوتر بتاعي معايا

3-حلمت اني أكون ولد مش بنت :))
علشان حسيت ان الولاد عندهم حرية أكبر ... يالا الحمد لله كنت فاهمه غلط :))

4-حلمت اني أكون صاحبة شركة
ولسه بحلم :) وعامله كمان اسم للشركه... بس أنا مش هحقق الحلم ده .. كده مش عايزه أحققه في حاجات تانيه أهم بس حقيقي لو حطيته ف دماغي ممكن يتحقق

5-نعم ... مش كفايه اربع أحلام ولا ايه

***************

أذكر خمس أحلام على الاقل ..تخص مستقبلك؟؟

1- حلمت اني أسافر ألـــمـــانـــيـــا

ألمانيا البلد مش المحطه --علشان في ناس هتسألني ألمانيا البلد ولا المحطه--... والحلم ده اتعدل وبقى نفسي أسافر اليابان أوييييييييي ... الناس هناك جميله خالص وطولي :$ لأ بجد :)) بلد حلوه أوي جداً بجد

2- عايزه أشتغل حاجه بحبها
زي مثلاً Web Developer
وان شاء الله الحلم ده يتحقق

3-بحلم اني اتجوز حد فاهمني وبيحترمني وياسلام لو كان مبرمج زيي كده
علشان يحس بيا ومايقولش عليا مجنونه :$

4-بحلم بحاجه
الحاجه دي اتمنى انها تحقق .. بس هي حاجه خاصه بيني وبين ربنا بس

5-نفسي ربنا مايحوجنيش لأي حد
***************

أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
في أشخاص عارفه نفسها كويس :)

***************

أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلاً ..
بجد بجد بجد انسان نفسي كان يبقى موجود لحد دلوقتي وكنت نفسي أروح أشوفه وأقعد معاه واتكلم معاه وأسأله واتعلم منه ... الشيخ الشعرواي الله يرحمه
غير كده الحمد لله :)

***************

تمرير التاج
وانت داخل على ايدك اليمين في لينكات لناس مدونين
FCI and Others
يالا بقى وروني هتحلوا التاج ده ازاي مع اني عارفه ان مافيش حد هيعبرني كالعاده :)ا

wrote on 19-05-2008

للأسف محجبه

بصوا بقى يا بنات وياولاد صلوا على النبي كده... عليه الصلاة والسلام ... الأول أي كلمه هتتقال مش مقصود بيها أي تعميم

قولولي بقى .... ايه موضوع الحجاب ده ... وايه نظرية البنات في لبسها الغريب العجيب ده ... وايه الالوان الفاقعه والمستفزه دي ... راح فين الذوق يا جماعه
هقولكم عينات من نوعيات مختلفه من البنات
بنت بتبقى ماشيه محجبه --يعني ايه هنا كلمة محجبه يا ولاد؟؟ يعني مغطيه شعرها بــــــس و100 خط تحت شعرها بس دي --.... المهم ..في الشتاء لابسه بوت وعليه جيب وبين الجيب والبوت رجليها باينه .... ايه يا جماعه ماهي مغطيه شعرها مافيهاش حاجه واحتمال وأكيد ان اللي فوق الجيب بادي .... في الصيف بقى نفس البنت المحجبه دي أيوااااان هي هي لابسه بانطلون برمودا أو حاجه كده مالهاش لازمه وفوقها أي حاجه كده مالهاش لازمه برضه... ماهو شعرها متغطي والدنيا حر برضه لازم نراعي الظروف

بنت تانيه بقى... محجبه أيوا أيوا ... لابسه بادي قصير وتحتيه الجيب ذات الوسط الساقط وبين االبادي والجيب انتوا عارفين يا بنات ايه اللي بيتلبس ونسبه كمان من الشباب عارفين ...علشان ظهرها مايبانش ماقولناش حاجه ... مع اني بــكـــرهه المنظر ده أوييي ... وممكن تكون حاطه خليط من البرفانات على شوية جبنه لكن ايه تيجي تسلم عليها يابني تقولك لأ معلش أنا مش بسلم .... يعني هي جات على دي ... طيب ايه حكم اللي انتي لابساه والبرفان ده وحكم السلام معلش يعني... يعني أهلك قالولك ماتسلميش على حد علشان حرام وماقالوش حرام البرفان ولا ايه أفهمها دي .... شوفت نوعيات كتيير كده

بنت تالته بقى... يووووه أيوه محجبه ... لابسه ألوان أعوووووذ بالله ... غالباً بيكون بنفسجي --مش مووف ها-- بــنــفــســجــي على أصفر وغالباً البادي أصفر والبادي اللي فوقيه بقى بنفسجي ... أو أخضر ... أخــــــضــــــر أخضر مش أي كلام يعني على أصفر برضه أو بـــرتـــقـــالي ... كله حاجات فاقعه كده وكلها حاجات من نوع بادي بـــــادي بادي يعني مش أي كلام برضه... والحجاب بيكون في فوق الشعر كده حاجات كده مكلكعه ومن نفس الألوان .... يا نهاري على التلوث البصري يا جدعان ايه ده ... الكارثه ان اللي بتعمل كده سوري يعني مليانه شويه ... برضه مع نوعيات البرفانات .... ولو كلمت واحده تقولك ماهو ماحدش بيشمه غيري مايعرفوش ان بعد فتره هي بتتعود على رائحة نفسها لكن اللي جنبها بيشمه وده حرام ولو أنا غلطانه حد يقولي

غير البنات المحجبات برضه ... اللي بتحب تسيب ظهرها باين عاااااادي وبتكون عارفه ان ظهرها باين

السؤال بقى لـيـــــــــه كل ده ؟؟؟ ....لو كان لفت نظر الشباب بس دي نسبه قليله ..... أنا أعتقد ان الكلام ده أه يلفت نظر الشباب بس بالسلب مش بالايجاب
ياعني مافتكرش ان الشباب بيبصوا للبنات دي نظره كويسه واللي متأكده منه بقى ان مافيش بنت بتبص للبنت دي نظره كويسه خااالص يبقى ليه بقى ؟؟؟؟ لو تفكير غلط مافيش مشكله ان الواحد يغير تفكيره للصح لو أنا اللي غلط أنا بعتذر على البوست كله
راعو ربنا بجد

ملحوظه:: اعتبروني مش أنا المره دي

يارب

لا إله إلا الله الحليم الكريم، لا إله إلا الله العلي العظيم، لا إله إلا الله رب السموات السبع و رب العرش العظيم


حسبي الله لا إله إلا هو عليه توكلت وهو رب العرش العظيم


لا إله إلا انت سبحانك إني كنت من الظالمين


رضيت بالله رباً وبالإسلام ديناً وبمحمد (صلى الله عليه وسلم) نبياً ورسولاً



اللهم يا مؤنس كل غريب ويا صاحب كل وحيد ويا ملجأ كل خائف ويا كاشف كل كربة أسألك أن تقذف رجاءك في قلبي حتى لا يكون لي همُ ولا شغلُ غيرك وأسألك أن تجعل لي من أمري فرجاً ومخرجاً إنك على كل شيء قدير

هبني اللّهم الصبر والقدرة لأرضى بما ليس منه بد، وهبني اللّهم الشجاعة والقوة لأغير ما تقوى على تغييره يد، وهبني اللهم السداد والحكمة لأميز بين هذا وذاك

اللهم آت نفسي تقواها , وزكّها, أنت خير من زكّاها , أنت وليّهاومولاها ،اللهم إني أعوذ بك من علم لا ينفع, وقلب لا يخشع , ونفس لا تشبع ,وعين لا تدمع ,ودعوة لا يستجاب لها ،اللهم إني أعوذ بك من شر ما عملت , ومن شر ما لم أعمل , وأعوذ بك من شر ما علمت , ومن شر ما لم أعلم اللهم إني أعوذ بك من زوال نعمتك , وتحول عافيتك , وفجاءة نقمتك , وجميع سخطك

اللهم من اعتزّ بك فلن يُذل، ومن اهتدى بك فلن يضِلّ، ومن استكثر بك فلن يقلّ، ومن استقوى بك فلن يضعف، ومن استغنى بك فلن يفتقر، ومن استنصر بك فلن يُخذل، ومن استعان بك فلن يُغلب، ومن توكل عليك فلن يخيب، ومن جعلك ملاذه فلن يضيع، ومن اعتصم بك فقد هُدي إلى صراط مستقيم، اللهم فكن لنا وليّاً ونصيرا، وكن لنا معيناً ومجيرا، إنك كنت بنا بصيرا

!!!!!!!!!!!!!!!؟؟؟؟

سألت نفسي كتير مارستش يوم على بر ...أنا اللي فيا الخير ولا اللي فيا الشر .. مليان عيوب ولا خالي م الذنوب ولا ايه
كل يوم بسأل نفسي -يمكن كل لحظه- أنا ميين؟؟؟؟ طيبه ولا شريره
اللي اكتشفته اني مش أنا بس اللي بفكر كده ... ومش ناس كتيير برضه بتفكر كده والناس اللي مش بتفكر كده دوول يحمدوا ربنا على كده
من ساعة ماقرأت أفلام وكواليس اللي كان كاتبها عماد --بس للأسف شال البلوج -- وأنا لاقيت ان مش أنا لوحدي اللي بفكر كده وكمان زود التفكير ده عندي
كان كاتب ان الانسان بيحاول يبين قدام نفسه وقدام الناس انه ملاك أو انسان كله خير وحب وطيبه ... لكن كواليس الحاجات دي كلها شر أو كتير منها شر... ممكن يكون تفكيرك من جواك انك تبين للناس انك طيب وتحاول تقنع نفسك انك فعلاً طيب لكن جواك بتقول أنا هبين اني طيب علشان بس يحبوني أو علشان أخد منهم اللي أنا عايزه أو علشان أكسب ثقتهم أو أو أو أو ........ا
لكن انت مين فعلاً ؟؟؟؟ انت الانسان العادي اللي جواه الخير والشر --زي ما طول عمري مقتنعه ان جوه كل واحد فينا نص خير ونص شر-- ولا الانسان اللي بتحاول تقنع نفسك بيه
اتناقشت كمان مع واحد في الموضوع ده وقالي انه بيحاول يبين لنفسه انه وحش وشريير
المشكله ان فعلاً ساعات تبين لنفسك انك انسان أسوأ ما يكون علشان انت بتفكر في الموضوع ده بالطريقه دي ... يجي حد يقولك يا عم انت طيب والله وكويس تقوله في سرك يا عم روووووووووح طيب ميين بس ده انا شخصيه سيئه جداً جداً جداً.... برمجه سلبيه لذاتك وتشتييت وجنان جنان يعني
ويبقى السؤال.............
انت ميين؟؟؟؟
عقلك بيفكر ازاي ... عايز تبان كويس وقلبك من جواه مش صافي ومش كويس ولا انت فعلاً كده وعايش على طبيعتك من غير أي زيف ولا كدب حتى على نفسك
المشكله انك لما تتخدع في حد كنت عايش معاه فتره طويله سنيييين وسنيييييين ... واثق فيه يمكن ثقتك بنفسك... وفجأه ومن غير سابق انذار ولا أي مقدمات تكتشف اذ فجأة انك كنت مخدوع فيه وكأنك اتخبطت على دماغك مره واحده وانت حاسس بالأمان التــــــــام
ده مش هبل منك ولا حاجه ... القضيه مش دي ... المشكله حاجه تانيه خاااااااااااااااالص
لما تكتشف ان ده كداب ودي كدابه وده منافق ودي بتخدعك ويبان ليك منهم كل الحب والطيبه والقلب الطيب الكبير الحنون وبعدين تتفاجيء ان ده كله كان كـــــــــــــــــــــــــدب ... هتحس ان الدنيا زي ماتكون كده اتهدت من حواليك
ساعتها ممكن تتصرف تصرفات كتيره -- على حسب انت طيب ولا شريير-- برضه مش دي القضيه
المشكله انك ممكن تحس انك انت كمان كده... بتخدع نفسك ... بمنطق اذا كان الانسان اللي وثقت فيه وعشت معاه كتيير وكنت شايفه صافي وقلبه أبيض طلع كده.... ايه اللي يمنع ان انا كمان أكون بخدع نفسي
تفكير غريب شويه ... غريب أوي ... بس ده اللي بيحصل فعلاً
ترجع تقول لنفسك -- ده لو انت لسه بعقلك-- هو أنا اتجننت ولا ايه ... أنا ميييين ؟؟ هو أنا طيب ولا مش طيب
تفضل تسأل الناس اللي حواليك .... أنا ميين قولولي ايه عيوبي .. انتوا شايفني ازاي
بس ياترى هتثق في كلامهم ؟؟؟؟؟؟؟؟؟؟؟ ممكن يكونوا بينافقوك أو انت نفسك بتنافقهم وعلشان كده يقولوليك كلام كويس عليك أو ممكن تكون انت بتسألهم علشان تبين لهم انك كويس أو تبين لنفسك كده
صحييح ......... هو أنا اتجننت ولا ايه؟؟؟؟؟؟؟؟؟؟؟؟
بس نرجع نقول.... سيبكوا من الكلام اللي أنا بقولوا ده ... اللي ممكن يعتبر تهييس أو جنان رسمي أو أي حاجه
مافيش أحسن من كلام ربنا
وَنَفْسٍ وَمَا سَوَّاهَا فَأَلْهَمَهَا فُجُورَهَا وَتَقْوَاهَا قَدْ أَفْلَحَ مَنْ زَكَّاهَا وَقَدْ خَابَ مَنْ دَسَّاهَا
صدق الله العظيم

ملحوظه: الكلام ده برضه ممكن يكون أفلام مش كواليس

published on May 26, 2008

تاج

ياااااااااااه الواحد ليه فتره ما جالوش تاج ويوم ما يجي يبقى واحد صعب أوي كده
لأ حقيقي صعب ... أصعب تاج هحله بصراحه بس تكليف من الباشمهندس أحمد مبارك أعمل ايه بقى
التاج عايز ايه بقى...!!! أقول عشر حاجات عني .... نقول بسم الله الرحمن الرحيم ونبدأ الاجابات بس خدوا نفس عمييييق وسموا انتوا كمان

أولاً: لو حد قالي قولي عشر حاجات عن نفسك مش بعرف:$ ..... لأ بجد مش بعرف أتكلم عن نفسي
ممكن أقول اني مش فاهمه نفسي كويس خالص .. يعني ماتثقوش في اللي هتقروه ده :))

ثانيأً: كتير يعرفوا عني اني رومانسيه ... ممكن زياده عن اللازم ويعرفوا برضه اني متهوره وعصبيه ومندفعه ومجنونه وجريئه وذكيه .... بس الكلام ده فيه منه غلط وأنا مش هقول ايه الصح فيه اعرفوه انتوا بقى وقولولي عليه :)) اللي ماحدش يعرفوا بقى اني دايماً مستعجله أنا نفسي مش عارفه ليه ... بس تقريباً الكمبيوتر علمني كده

ثالثاً: هي دي ثالثاً ولا تاسعاً :$:$:$ أنا مش بعرف أعد ... خلاص من غير ضرب هقول أهو
بحب الهواء وبحب الشوارع الفاضيه الواسعه وبحب البحر وبحب السماء وبحب أجري وبحب الشعر وبحب الكتابه وبحب صوتي الواطي رغم انه عاملي مشاكل :)) وبحب الكمبيوتر والنت والبرمجه والتكنولوجيا ...وكفايه حب بقى

رابعاً: بكره حاجات كتير أوي في البنات ومش بطيق الستااااااااات .... اسمعوني الاول بس :$ .... أكيد مش كلهم ده طبيعي يعني -- التعميم جهل-- اللي مكرهني فيهم طريقتهم وتصرفاتهم وطريقة تفكيرهم .... --أكرر مش كلهم-- بحس فيهم بتاتش هبل على شيء من التفاهه وعدم التضحيه وعدم تقدير قيمة الصداقه ....... وكفايه كده علشان مااتضربش :$ .. وبكرر تاني أنا ليا اصحاب بنات كتييير ومن زمان معايا وبحبهم وبحترمهم وبحترم طريقة تفكيرهم
وبكره فيا أنا حاجات لمجرد كونها متعلقه بالبنات

خامساً: هو مش المفروض برضه ان بعد الاربعه سبعه ولا ايـــــه
مش بزعل بسرعه... يمكن مش بزعل خالص...ولو.. لو.. لو يعني حصل في يوم وزعلت ممكن ارجع تاني في ثواني وكأن لم يكن شيء... والموضوع ده عاملي مشكله مع نفسي .. لأني بدي للي قدامي أعذار كتيييييير وماحدش بيعذرني ... وفي فرق كبير جداً جداً جداً عندي بين الزعل واني أكون مضايقه
لو في حاجه صغيره اضايقت فيها من حد معين لازم أقوله ... قولتولي ليه؟؟ أقولوكوا ليه بقى... او ماعملتش كده وطلعت كل اللي في قلبي الحاجات الصغيره بتتراكم فوق بعض وبتعمل معايا سد منيع بيني وبين اللي مضايقني.... ولما بضايق من حد بيبان على وشي ومعاملتي معاه على طووووول وهو بيعرف اني مضايقه منه

سادساً: :| لسه سادساً .. ياربــيييي
بيقولوا عليه دبلوماسيه ..... مش عارفه ده عيب ولا ميزه بصراحه
بس في نفس الوقت صريحه جداً لدرجه ممكن تضرني
أيوه عادي يعني صريحه بس دبلوماسيه

سابعاً: بحب أقعد مع نفسي .. مش علشان انطوائيه.. بالعكس أنا علاقتي بالناس الحمد لله كويسه والاتصال بيني وبينهم كويس يعني :) لكن بحب أفكر كده مع نفسي و أسرح معاها أويي .. يمكن حتى وأنا مع الناس ممكن أتوه منهم شويه بتفكيري

ثامناً: بفكر كتييييييييييييييييير في كل حاجه وأي حاجه ... مخي شغال على طول يمكن حتى وأنا نايمه ... ودي حاجه متعبه جداً جداً جداً جــــــــــــــــــــــــــداً

تاسعاً: تلقائيه شويه كتير أوي جداً يعني

عاشراً وأخيراً الحمد لله: فيا عيوب كتييييييره أوييييييييييييييييي ... حتى مميزاتي عيوب ... من الأخر كل العشر حاجات دول عيوووووب فيا
في حاجات كتييير في نفسي مش حباها ... ماحدش يسألني ايه الحاجات دي لأني مش قادره أحددها بالظبط

مطلوب مني أتاج خمسه: مممممم مع اني مش بحب أتاج حد علشان ماحدش بيعبرني بس ياللا أمري لله ...
1- أي حد عايز التاج
2-هوندا
3-رئيس جمهورية نفسه
4- رجل المطر
5-خالو أحمد الصباغ

وطبعاً مش هيرجع تاني لأحمد ... طبيعي يعني .. ولا ايه !!!!
ملحوظه:: التعميم جهل ....حقوق الملكيه الفكريه محفوظه لأحمد مبارك:))ا

ليه بقى!!!!ا

بجد بجد بجد كده كتير بقى
أنا عايزه أفهم هي الناس بقيت عامله كده ليه!! ليه دايماً قرفانين من بعض ومش طايقين نفسهم
ليه مابقاش حد بيراعي ربنا في الناس
ليه كل واحد مايلتزمش بحد حريته من غير مايتعدى على حق الأخرين .... مثال على كده ... الميكروباصات اللي بتشغل أغاني مستفذه بصوت مستفذ ... وكمان في بنت ركبت جنبي ومعاها موبايل شكلها كده فرحانه بيه ولا حاجه وشغلت عليه أغاني بصوت عالي --وأغاني من اللي هي برضه بتتشغل في ميكروباصات يعني ياريت أغاني كويسه-- وفي ناس بتقرأ قرأن !!!!! هو ليه الناس مش بتقول حرية يدك تنتهي عند بداية حرية أنفي

الحاجه بجد اللي بتحرق دمي أويييييي اني لما أخبط في حد وأبص ليه وأبتسم وأقوله سوري .... الحد ده يبصلي كده شظراً وقرفاً ويبقى عايز ياكلني ... طيب يعني أنا لو حتى كنت قاصده على الاقل ابتسم يا عم لما تسمع سوري ولا هي سوري دي بقيت شتيمه وانا مش واخده بالي ولا ايه ... والمصيبه ان لما حد يخبط فيا وأبص له بابتسامه منتظره كلمة سوري علشان أقول ولا يهمك بابتسامه برضه ... ألاقي وش خشب قدامي ده انت اللي خبطتني يعني مش أنا اللي غلطانه .... على فكره الموضوع ده بالذااااااااات مع الستات
هو فيه ايه !!!! بجد هو فيه ايه بالظبط يعني
اللي كنت أعرفه ان الابتسامه عدوى ... لكن لاقيت غير كده خالص

أنا هقول مثالين على الكلام ده لسه قريبيين جداً
1- كنت ماشيه مع ماما وغصب عني خبطت واحده بايدي والله مش بشاكوش ولا حاجه ... وابتسمتلها وقولتها سوري وانا بشاور بايدي بمعني سوري برضه ... واستنيت شويه كده علشان استقبل رد الفعل ... للأسف كل اللي استقبلتا تكشيره رهيبه كأني ضربتها بالنار ... قلت لماما ليه كده قالتلي ماهي شنطتك برضه تقيله قولتها لأ دي ايدي مش الشنطه .... ده أنا بقولها سوري قالتلي يمكن ما سمعتش .. قولتلها طيب ماشفتش ايدي !! طيب تبتسم زي مانا مبتسمه!!! ماما بصراحه مالقيتلهاش حل ... سكتت

2- واحد أعرفه حب يجرب موضوع الابتسامه عدوى ده ... ركب المترو لقى الطبيعي ان الناس مكشره... راح لواحد كده كان واقف جنب الباب ... اتجه ناحيته وهو مبتسم ... مستني يشوف الابتسامه عدوى فعلاً ولا ايه وبكل برأه منتظر ابتسامه كرد فعل من الراجل لكن كل اللي الراجل عمله انه قال : استغفر الله العظيم يارب!!!!!!!! على اساس ان الابتسامه دي ايه طيب !!! مش فاهمه ..... ده كان ناقص يقوله انت عبيط يابني ولا ايه
ايه الناس دي بـــــــــــــــجـــــــــــــد

ليه البنت تكون محجبه وهي مش محجبه.... ليه محسوبه علينا انها مغطيه شعرها -- ده لو كان متغطي يعني -- ولابسه هدوم ضيقه أو ...... أو .....أو ........ بجد بتكون مستفذه جداً بكون عايزه أقولها احترمينا بقى شويه واحترمي الحجاب واحترمي انك تكوني محجبه ... يعني احترمي نفسك من الأخر... مش عاجبك شيليه بدل ماتبوظي الدنيا كده

ليه السواق بيشرب سجاير من غير ما يراعي ان في ناس صدرها تعبان أو مش بتقدر تشم السجاير



ليه كل واحد فاكر نفسه انه اشترى الدنيا باللي فيها والمفروض انه ياخد كل الحقوق ومش عليه أي واجبات
ليه مش بنراعي ربنا ف بعض

على فكره أنا طول عمري كنت فاكره اني عايشه مع الناس واني عايشه في مصر لكن تقريباً كده أنا كنت ف مكان تاني مع ناس تانيه وانا مش واخده بالي

بجد أنا مش فافي ولابتاع .... بس بجد المفروض نهون شويه على بعض ونحترم بعض وقبل كل ده نراعي ربنا في نفسنا وفي الناس

Iam Sorry

أسفه على الـتأخير ده... ممكن أكون اتأخرت لدرجة ان الناس نسيتني وبطلت تقرأ :$:$:$:

بجد مش عارفه أكتب حاجه ... يمكن ماليش نفس ... بس ليه ماليش نفس مش عارفه!!!!!ا
يمكن الوضع مش عاجبني
يمكن كل ماأكتب حاجه أمسحها
يمكن عندي حاجات كتيره نفسي أكتبها من كترها ماكتبتش أي حاجه
يمكن مش عندي أفكار علشان أكتبها
مش عارفه فيه حاجه مش مريحاني
شايفه كل الدنيا ملخبطه حولي ....
مش عارفه ليه

انتوا مالكوش ذنب تقروا الكلام ده بس انتوا سألتوا عليه وانا حبيت أرد عليكم
بس بيني وبينكم يعني أنا فرحت ان في ناس بتسأل عليا ... وان في ناس مستنياني أكتب حاجه مع اني مش شايفه اني بكتب حاجات جامده يعني
شكراً بجد على سؤالكم وادعولي بقى اني أكتب بوست جديد في موضوع محدد بدل الأفكار اللي في الخلاط مع بعضها دي

Published on 17-04-08 11:47PM

أمي

بعد الحب ده ايه اللي تعمل كل ده تستاهل ايه... بعد الحب ده ايه اللي تدي حنان كده من غير حساب نبوس التراب اللي ماشيه عليه

بعد الأم فيه ايه دعوه حلوه فاتحه سكه مقفله... بعد الأم فيه ايه يهدي باله اللي في عياله الدنيا كلها مفتوحه له وراضيه عليه

أعملها تمثال اللي طيبة قلبها فوق الخيال... أعملها تمثال اللي سهرت واللي تعبت واللي ربت واللي شالت حمل جبال

لو هعملك ايه تستاهلي مية ألف عيد ع اللي عملتيه... لو هعملك ايه مين ف تعبي سهر مانمشي مين ف أول مره بمشي سندت عليه

بعد اللي عملتيه أعمل ايه يوم ف اللي وصلتيني ليه... بعد اللي عملتيه من حنانك من سماحتك الجنه تحتك ده اللي ربنا قال عليه

والله لو عملت ايه مش هقدر ادي لأمي حقها ... إلا الأم... الأم دي بجد أكبر كنز في الدنيا ربنا خلقه لينا ... حضنها يخفف أي ألم ... نفسها (بفتح الفاء) يدفي لو في عز البرد... حنانها يهون أي هم.... بصراحه مافيش أييييييييي كلام هيقدر يوصف احساسي بأمي
ماما دي كل حياتي ربنا يخليها لي يااااااااااااااااارب ويخليلكم أمهاتكم
وربنا يعوض الناس اللي ربنا أراد ان أمهاتهم تسيبهم

كل سنه وانتي طيبه يا ماماتي يا حبيبتي يا عمري كله يا حياتي كلها
على فكره مش بس عيد الأم اللي ليه فرحه والكلام ده لأ خاااالص .. كل يوم بيمر عليك وانت في حضن أمك احمد ربنا ان ربنا رزقك بيها وبالحضن الدافي ده وبوس ايدها ورجليها كمان أيوه بجد
ولو مزعلها يبقى انت اللي خسراااااااان
يالا بجد روح صالحها لو مزعلها وقولها كل لحظه وانتي طيبه يا ماما

المولد النبوي الشريف

كل سنه وانتم طيبين بمناسبة المولد النبوي الشريف

HaPpY BDay My Voice

لأ لأ اعمل Refresh وهي هتيجي ... هو ده اللي انت عايزه؟؟

والله لو عملت كام Refresh على Reload هي نفس الصفحه اللي هتطلعلك
أصل ايه بقى .....
النهادره عيد ميلاد My Voice واللي مايعرفش My Voice يبقى مش عايش في الدنيا :$:$ مش أوي يعني... معلش كل ما أجي أبطل تناكه الاقيني لسه تنكه:$

المدونه دي عاشت معايا سنه... شافت معايا أياااااااااااام !!! على الحلوه والمره ... شافت معايا أصدقاء وزمايل ومناقشات وأراء واختلافات .. ومنعت عنها الخناقات والكلام في السياسه --علشان مش بحبه وهي كمان مش بتحبه-- واتكلمت معاها بصراحه شديده وبلغه ماحدش فاهمها الا أنا وهي بس ... كتيييير كنت بكتب كلام ليه معني غير اللي الناس شايفاه.. مش معني بعيد لكن معني مختلف بعض الشيء .. كل كلامي كان من قلبي ... اتكلمت عن اصحابي وقلت رأيي فيهم كلهم على أد ماقدرت ... قلت رأيي بصراحه في اللي أنا شايفاه ... ناس اتأثرت وناس اتعلمت وناس فهمت حاجه ماكنش فيه فرصه أقولها ليهم وجهاً لوجه... المدونه عاشت معايا مأساة مشروع التخرج والمشرف على المشروع ...عاشت معايا يوم التخرج واحساسي وانا خارجه من الكليه وكأني بنسلخ من جلدي -- بلا مبالغه--عانت معايا كتيير ... كانت أكتر حد بيسمعني وأنا تعبانه ... حتى لو ماكنتش بنشر اللي بكتبه أو أنشره وأحد أصدقائي يقولي: شيلي اللي انتي كاتباه ده أومال أنا روحت فين؟! وبالفعل أشيل البوست وأحتفظ بيه لنفسي... ومره اتُهمت اني دبلوماسيه –اذا كان ده اتهام—واحتمال أكون دبلوماسيه بس برضه صريحه يمكن بقول كل اللي عايزه أقوله بدبلوماسيه ...ومره اتقاللي يارايقه ويافاضيه... وناس تقولي الله حلو أوي اللي انتي كاتباه ده.... شافت معايا فرحتي وزعلي واختلافي واتفاقي مع ناس معينه وتعليقات معينه... شافت معايا كتير كتير يعني ...

علشان كده قررت في عيد ميلادها أعملها حاجه جديده ... ألبسها هدوم جديده وكده أظبطها يعني ;) ... بس يارب ال Design الجديد ده يعجبها .... أنا تعبت أوي علشان أجيبه وعذبتني معايا... واكتشفت اني عشريه أوي وصعب أغير حاجه كنت بتعامل معاها دايماً.... والحقيقه أكتر حد تعب لحد ماوصل لل Design ده هو الأخ العزيز أحمد مبارك قام معاها بأحلى واجب بجد... ده أنا لو منه كنت كرهتني من التعديلات اللي عدلها دي كلها... علشان كده أول واحد هياكل من التورته ... اللي هو برضه هيجيبها :P

اللي مش كتير يعرفوه عني: اني كنت بكتب --وحطوا خـــط تحت كلمة كنت-- لما عملت المدونه كنت فاكراني هكتب هنا اللي كنت بكتبه زمان.... لكن ماحصلش وبصراحه أحسن اني معملتش كده وكتبت حاجات تانيه خالص... الغريب بقى ان اسلوبي ده غير اسلوب كتاباتي تمــــامــــاً.

شكر واجب بقى وحاجات كده

في ناس كان ليهم فضل في المدونه دي وليهم يد في نجاحها – وان كانت مش ناجحه من وجهة نظركم لكن ناجحه عندي أنا— وليهم يد في اني اكمل فيها

1- أحمد مبارك طبعاً كفايه الشكل الجديد اللي انتوا شايفينه ده واللي من غيره كنت هتعب أوي لحد ماعمل حاجه

2- أحمد عيسوي و رامي محروس: الفكره كنت واخداها منهم ...أول ماعرفتها عرفتها من رامي وأول حد دخلت عنده .... ولما لقيت أحمد بيكتب حاجات شخصيه مش Programming بس، الفكره عجبتني جداً وقررت اني اعمل المدونه دي وأكتب اللي في نفسي.

3- أحمد مبارك تاني وخالد عادل: أثروا كتيير على طريقة كتابتي بصراحه واسلوبي في الكتابه.

4-وفاء اللي بجد أكتر واحده خلتني أصلاً اكمل البلوج ده بأول تعليق ليها

حاجه مهمه عندي بقى... أنا في موضوعات حباها أوي وفي موضوعات الناس مش حباها وفي ناس ليها اعتراضات على أي حاجه وفي ناس عجباها حاجه

المهم في الحاجات دي كلها أنا عايزاكم تقولوا لي رأيكم .... ردوا على الاسئله اللي جايه دي لو حابين:

1- ايه أكتر موضوع عجبكم ؟

2- ايه أكتر موضوع اضايقتم منه أو مش عاجبكم؟

3- ايه اللي مش عاجبكم في اسلوبي؟

4- أكيد هيكون السؤال ده ايه اللي عاجبكم في اسلوبي ؟

5- ايه رأيكم في الشكل الجديد؟؟؟؟؟؟؟

والاجابات دي تعتبر هدية عيد الميلاد..... أما الهدايا التانيه من فلوس وكده تحول على حساب رقم ...... ولا بلاش أحسن تفتكروني طمعانه فيكم ولا حاجه :$

بس كده خلاص .... شكراً انكم وصلتوا لحد هنا

يوم جميييييل !!!ا

النهارده صحيت من النوم بدري علشان بنام بدري وبرتاح في النوم وباخد وقت النوم بتاعي راحه تامه يعني
وطبعاً خدت الفطار بتاعي كالعاده ونزلت الشارع .... ياااه الشارع فاضي ومافيش ريحة دخان المواصلات
الميكروباصات واقفه بنظام وهدوء ومن غير صداع ووجع دماغ روحت للعربيه اللي حسيت انها مريحه بالنسبه لي .. ... سألت السواق: هو حضرتك رايح فين؟ قالي .... قولتله شكراً وركبت ....سواق محترم مش بيشرب سجاير كمان علشان الركاب مايتعبوش
الولد طلع لم الاجره من سكات وهدوء... والقرأن شغال وصوته هادي السماعت يعني سليمه ومشغل قرأن ومش معليه على الاخر علشان كمان يسمع لو حد قاله نزلني هنا لو سمحت
الهواء نظيييييييف مافيهوش ريحة الدخان ولا مخنوق وعارفه اتنفس كويس...نزلت من الميكروباص لقيت الميكروباص التاني واقف سألته رايح فين وركبت
وصلت في معادي وقلت السلام عليكم قبل سوري ودخلت وأنا الموود كويس أوييي وفايقه ومركزه وقعدت في مكاني الحر اللي بحبه وبتحرك بالكرسي بتاعي بحريه
وبعدين
.
.
.
.
.


أكيد صحيت من النووووووووووووووووووووم :(:(:(:(:(:( حــــــــــــــلم نفسي يتحقق :(((((( كل كلمه اتقالت نفسي تتحقق.... نفسي ألاقيني كده ... نفسي أنام كويس ... نفسي أروح في معادي ... نفسي أشم هواء نظيف... نفسي مالاقيشناس بتترمي من جوه لبره وبتندفع من بره لجوه ... نفسي الشخصين اللي بيركبوا معايا دول يتغيروا بقى :@ ونفسي العربيه اللي بتعدي من جنبي وأنا على الباب دي ماتعديش مش ممكن نفس الشخصين ونفس العربيه في مواعيد مختلفه بدري متأخر هما هما
:@

الحمد لله بجد ... هي مشكلتي الأولي والجذريه المواصلااااااااااااااااااااات والناس

كنت فاهمه غلط خالص!!!

مش عارفه أقول إيه ولا أبدأ بإيه بجد
المواصلات العامه والميكروباصات دول حكااااااااااايه بجد
ايه الناس دي وايه الشوارع دي ... أنا ماكنتش عايشه في الدنيا على كده
الكلام ده كله واضح طبعاً انه مش مدح في الميكروباصات... اطلاقا مطلقاً
أنا كنت أعرف ان الواحد بيوقف الميكروباص ويعرف هو رايح فين ولو يناسبه يركبه ... يا نهار أبيض ده أنا كنت هبله بقى على كده :(
اللي اكتشفته ان أي حد بيركب أي حاجه ماشيه على اربع عجلات مش مهم كام مين فين ليه ... بصوا الحوار اللي جاي بين شخص من الحشد الرهيب اللي واقف مستني الميكروباص والساعه دلوقتي حوالي 8.45 صباحاً
الشخص: رايح فين يا استى؟
السواق: --صمت رهييييييب --
الشخص: السابع؟
السواق: توء
الشخص: رابعه؟
السواق: توء
الشخص: أول عباس؟
السواق: توء
الشخص: كلية البنات؟
السواق: توء
الشخص:مكرم؟
السواق: توء
الشخص: أومال رايح فين ؟؟؟
السواق: --صمت رهيب ومشي من قدام الراجل--ا
ايه ده بقى:|:| أنا فضلت بجد متنحه وبضحك والله وأنا في الشارع... هي الناس عندها استعداد تركب أي حاجه كده وخلاص ... وايه تناكة السواقين دي!!! والمصيبه انك لما تركب مش بينزلك في المكان اللي انت عايزه ... يعني ينزلك قبلها بكتيييييير مسافه كده محتاج لها تاكسي ... طيب ليييييييييييييه
وكلمة ان الميكروباصات واقفه والولد ينده والحياه حلوه وكده دي مافييييييش دي اشاعات :(
وياسلام بقى على اتحاد الشعب في كل مكان تنزل تلاقي حشد رهيييييييييب ... الشارع بيقف علشان كم الناس اللي بتعدي .... رغم ان الطريق اللي بعدي منه سريع بس الناس كلها بتعدي مره واحده يعني اللي مش بيعرف يعدي الشارع بيعديه مع الناس عادي ...

والتجمع بقى قدام الموقف أو المحطات ... اييييييه ده!!!!!!! ده احنا لو مافيش حريه ممكن يتقبض علينا بتهمة التجمهر -- لو كانت تهمه يعني مش عارفه-- ولما يجي بقى ميكروباص يجروا وراه والله من غير مايعرفوا رايح فين ويشوتوا اللي قدامهم مش مهم ميين اللي قدامهم.. والله ولد اتخبط من واحد حتة خبطه وبنت كانت هتقع .. علشان الكل بيجري وخلاص ... أنا بقى :))) مش عايزه أقولكم ... هو مافيش خبط ولا الكلام ده الحمد لله بس فيه اصابات والله في جسمي من أمن ونتانة الميكروباصات وقوة الناس التي لا تستغل الا في ركوب المواصلات

وأنا رايحه بقى الصبح... ست كبيره ركبت الميكروباص .. الولد الي بياخد الفلوس من الناس بيقول يا جماعه حد يقوم للست دي ... الناس ماردتش ولا عملت رد فعل حتي... الولد قال تاني: يا شباب يا جدعان حد يقوم للست الكبيره التعبانه دي ... واحد تكرم ورد وياريته مارد قاله: مافيش يا عم شباب جدعه هنا ... مش عارفه بصراحه انا الكلامه دي ودني اتسدت بعدها ماعرفش هي قعدت ولا لأ!!!!!!!!!!!ا

عارفين بقى طريق الترام ... اللي هي القضبان دي الله ينور عليكم.... الميكروباص علشان ينجز بيمشي عليها ... مش مهم بقى الترام جاي ولا لأ :( المهم مصالح الناس طبعاً ... متشكرين يا انكل سواق بصراااااحه
وقال أنا ايه كان شغلي الشاغل اني ازاي هقل السواق كلمة يا استى دي اللي مش بحبها خالص:( ولسه مش بقولها برضه... بس المشكله الأكبر اني اتعامل أصلاً مع الميكروباصات والمواصلات دي وابرمي يا أم خلف والكلام ده ... واضح اني محتاجه كورسات كتيييره.... أنا مش فافي على فكره بجد ولا حاجه بس فعلاً ماليش في الحاجات دي خالص

نكتفي بهذا القدر الحقيقه كفايه أوي كده ... ربنا يصبرني بقى
المره الجايه أقولكم على مكالمه هاتفيه حصلت لراكبتين في الميكروباص برضه ... والمواقف اللي بتحصل فيه.....والأغاني الحلوه اللي بسمعها كمان
سلام دلوقتي :)

HaPpY ..........

HaPpY Champions Day
HaPpY Valentine Day

أه وانا كمان أول مره أسمع الكلمه دي ... أصل أنا اللي مخترعاها :$ ... البلد كان شكلها حلو أوي يوم الماتش واللعب كان حلو أويي أويييييييي... على فكره أنا كنت زماااااان ليه في الكوره بس دلوقتي ماليش فيها ومش بتفرج الا على الماتش النهائي ولما بتفرج عليه ببقى في قمة حرقة الدم وشدة الأعصاب لدرجة اني بقول الله يكون في عون المتابعين الجادين ....... مبرووووووووك لمصر بجد من كل قلبي فعلاً حقيقي أكتر مناسبه تحس فيها ان الشعب ايد واحده.... والناس كلها فرحانه وبتضحك

بلا عيد حب بقى بلا كلام فاضي
أنا عن نفسي مش بعترف بيه من غير ضرب يعني.. أه بجد حاجه كده مالهاش لازمه ولا معنى ... تمشي في الشارع تلاقي كل المحلات جايبه دباديب وقلوووب بقى حمراء وورد أحمر وداهنيين المحل باللون ده غير الناس اللي ماشيه في الشارع وكله لابس أحمر في أحمر ... أنا أساساً مش بحب اللون ده لما بيكتر كده ... ايه بقى مين عيد الحب ده على أساس ايه والنبي يعني حد يقلي
حتى وجهة نظري مش هتتغير لما ألاقي حد أقوله هابي فالنتين داي لأني مش هقولها ليه أصلاً... الحب موجود في كل مكان وفي كل وقت والحاجه الوحيييييده اللي مش ليها ميعاد يبقى ليه بقى !!! .... أنا ماتعرضتش للموضوع من الناحيه الدينيه .....ا
النهارده شوفت أحد المحلات دي مشغل أغاني والمحل كله تحس انه لابس بدلة اعدام وايه بقى كمية بنات رهييبه جوه ... أعتقد ان البنات هي اللي بتعترف بللي بيسموه عيد الحب ده أكتر من الولاد ... ا

شوية كلام

Published on Feb. 6 2008

تعديل بتاريخ 12-02-2008

يا جماعه أي نقطه بتكلم فيها مش بتكلم عن الكل يعني التعميم جهل --الكلمه لها حق الملكيه الفكريه للباشمهندس أحمد مبارك-- يعني أنا مش معنى اني بقول حاجه في البنات يبقى أقصدهم كلهم
أه بس مش مع الشكر والاعتذار المره دي يعني ده تقدروا تقولوا عليه تهيييس
البوست ده من فتره وبما اني غايبه عنكم ومش عندي بجد أيييي حاجه أكتبها والموود كمان مش مساعد والبوست ده كان في الخطه يعني جاهز ... قلت أكمل عليه يمكن كلمه كده ولا كده تبقى مفيده بعد الشر ولا حاجه ولا يمكن يخرجني من الموود
النهارده وأنا راكبه الميكروباص -- أصلي عقبال عندكم بقيت أركب مواصلات غير المترو-- لقيت الراجل مشغل أغنيه أو البوم أو شريط حزين لأ مش حزين كئيب ... الراجل بيغني يقول فيما معناه انه كان مع حبيبة واحد صاحبه واتكلموا عليه وجابو في سيرته يعني وعمال يقوله معلش يا صاحبي ماتزعلش مني احنا برضه اصحاب... الأغنيه غريبه أوي ولفتت نظري ... وبعدها أغنية اعتبره قلب ورااااح :) وحاجه كده كمان ... الناس دي بتجيب الكلام ده منين بجد ده كلام جامد بس عايز صوت يغني ولحن نضيف ...مع احترامي :$

على فكره يا جماعه عن تجربه في مقوله بتقول ضاقت ولما استحكمت حلقاتها فرجت وكنت أظنها لا تفرج... بجد طول الواحد مابيقرب لربنا ويدعي له ربنا بيفرج همه ... أصلاً ربنا بيحطنا في اختبار علشان يشوف احنا هنصبر ولا لأ وهندعي ولا لأ ولما الهم يزول هنشكره ولا ايه ... طبعاً الواحد بيعجز عن شكر الله بجد ربنا ده كرييييييييييييييييييييم --الكلام ده بتاريخ قديم بس مازلت برضه متمسكه بيه--


عارفه عارفه الكلام مالوش دعوه خالص ببعضه مانا قلت في الأول انه تهييس بس ممكن نطلع منه بحاجه مابحبش أهيس بصراحه الا لو هستفيد

أعتقد ان احنا البلد الوحيده اللي بتنطق الضاد وأحسن ناس نقول السين بدل الثاء والزاي أو الزال بدل الذال حتى لما بنيجي نقرأ قرآن بنعمل كده للأسف ولما بنيجي نقرأ انجليزي برضه بنعمل كده ... اشمعنى لسانا طالع في كل حاجه ماعدا الثاء والذال
بمناسبة اللسان اللي طالع بقى ... أنا عايزه كورسات في الموضوع ده :$ أنا ماليش فيه خالص:( وعايزه جلسات أحبال صوتيه :( علشان لما بزعأ صوتي بيعطل في النص ولما بتكلم عادي ماحدش بيسمعني :(:(:( بجد دي مأسااااه يا جماعه

لما النت اتقطع سمعت كلمه كده ماعجبتنيش:: بيقولوا انه هيفضل اسبوع أو اسبوعين على كده!! هما ميين دول اللي بيقولوا يا نااااس ... أي حد بيقول وخلاص ... على أساس ايه يسيبوا النت مفصول يعني وهما أكتر ناس بيخسروا من الموضوع ده... هما ميين دوول؟؟... اللي بيقولوا!!! .... للمره المليون اتأكدوا الأول يا شعب الاشاعات والشائعات وبعدين انشروا الكلام براحتكم...--ملحوظه أنا فيا برضه عيوب كتيييييير أنا لست واعظه--

انتوا طبعاً عارفين اني متحيزه --بس غير متعصبه-- للرجال دوناً عن النساء ليه بقى؟؟؟ حد يقولي ليه... هقولوكم ليه: النساء فيهم كذا عيب لو اتغير --وطبعاً مستحيييييييييييييل التغيير لأنه طبيعه ربنا خلقنا على كده-- هيبقوا 100% أنا برضه فيا بعض العيوب دي وكارهه جداً كونها فيا بصراحه....اللي أنا شايفاه يتمثل في ::
1-التفكير بالقلب وبسسسسس ليس بالعقل... بجد النساء دوول ممكن مايراعوش ظروف اللي قدامهم ويهاجموه من غير مايعرفوا كل الحقيقه
2-تحويل المشاكل الشخصيه الى أزمه فظيعه... والكلام ده حصل قدامي.. مشكله شخصيه حولت وجهة النظر من موافق الي معترض اعتراض تااااااااااام دون النظر للمصلحه العامه ولا أي حاجه
3-أي واحده ست في منصب بتكون يا ساااااااتر يارب على قلبة الخلقه شراب مقلوب فعلاً (مع مراعاة الاستثناءات)ا
4-طبعاً اذا ذكرت السيدات ذكر الرغي الفظيييييع
5-صعب تثق في أنثى صعب تلاقي أنثى تحفظ سرك (كصديقه) صعب تلاقي أنثى مش بتغير من أنثى زيها لأي سبب( صعب وليس مستحيلاً)ا
بما ان التعميم جهل على رأي الباشمهندس أحمد مبارك وبما اني بحترم النسب أوي وبما اني من هذا الجنس اللطيف... برغم اللي قلته ده كله ده لا يمنع ان فيه سيدات قويه وتعرف تاخد قرارات كويسه أوي وعقلها كبير وبجد أنا بحترم السيدات القويه بعقلها أويي وبحترم اللي تكون في منصب وتكون حبوبه ومتواضعه ... أنا أنثى وأمي أنثى وليه أصدقاء بنات لكن دي تحفظاتي على جنسنا هذا

أقولكم على حاجه حلوه..... كفايه كده ... كويس اني كتبت حاجه ... بس بجد الكتابه وحشتني واديني اتكلمت شويه وهلاقي حد يتخانق معايا علشان أخر نقطه :))) وشكراً انكم استحملتوا تقروا ده كله
يالا تصبحوا على خير أو صباح الخير أو السلام عليكم أو سلام على حسب انتوا فين